NUPINPLỌN 58
Zindonukọn Nado to Nugbonọ Yin Na Jehovah
Klistiani nugbo lẹ nọ magbe ma nado dike gbede na nudepope kavi mẹdepope ni glọnalina yé nado sẹ̀n Jehovah. Matin ayihaawe, mọ wẹ e te na hiẹ lọsu. Jehovah nọ yọ́n pinpẹn etọn eyin a yin nugbonọ. (Hia 1 Otànnugbo lẹ 28:9.) Ninọmẹ tẹlẹ wẹ sọgan whlé nugbonọ-yinyin towe na Jiwheyẹwhe pọ́n, podọ nawẹ a gán duto yé ji gbọn?
1. Nawẹ mẹdevo lẹ sọgan whlé nugbonọ-yinyin mítọn na Jehovah pọ́n gbọn?
Mẹdelẹ na nọ tẹnpọn nado glọnalina mí nado sẹ̀n Jehovah. Mẹnu lẹ wẹ gán wà nuylankan mọnkọ na mí? Mẹdelẹ he ko jo nugbo lọ do nọ dolalo lẹ gando titobasinanu Jiwheyẹwhe tọn go, po yanwle lọ po nado hù yise mítọn sudo. Atẹṣitọ lẹ wẹ yé yin. Humọ, nukọntọ sinsẹ̀n tọn delẹ nọ hẹn linlin agọ̀ lẹ gbayipe gando mí go, ehe nọ zọ́n bọ mẹhe ma to aṣeji lẹ nọ jo nugbo lọ do. Owùnú wẹ e yin nado nọ dọnnu hẹ nukundiọsọmẹtọ depope, nado hia owe yetọn lẹ, kavi yì nọtẹn Intẹnẹt tọn yetọn lẹ ji, kavi pọ́n video yetọn lẹ. Jesu dọ gando mẹhe nọ tẹnpọn nado hẹn mẹdevo lẹ gbọjọ ma nado sẹ̀n Jehovah po nugbonọ-yinyin po lẹ go dọmọ: “Mì jo yé do. Alihiamẹtọ nukuntọ́nnọ wẹ yé. Enẹwutu, eyin nukuntọ́nnọ do ali hia nukuntọ́nnọ, yé omẹ awe lẹ na jai do odò mẹ.”—Matiu 15:14.
Etẹwẹ lo eyin mẹyinyọnẹn mítọn de basi dide ma nado sọ yin dopo to Kunnudetọ Jehovah tọn lẹ mẹ ba? Ehe sọgan hẹn mí jẹflumẹ taun eyin mẹvivẹ mítọn de wẹ wàmọ. Mẹlọ tlẹ gán hẹn mí po huhlọn po nado de mẹhe mí na hodo to ewọ po Jehovah po ṣẹnṣẹn. Jiwheyẹwhe wẹ mí dona magbe nado yin nugbonọ na hugan mẹdevo depope. (Matiu 10:37) Enẹwutu, mí nọ setonuna gbedide Jehovah tọn ma nado nọ dogbẹ́ hẹ omẹ mọnkọ lẹ.—Hia 1 Kọlintinu lẹ 5:11.
2. Nudide mẹdetiti tọn tẹlẹ wẹ sọgan whlé nugbonọ-yinyin mítọn na Jehovah pọ́n?
Owanyi mítọn na Jehovah na whàn mí ma nado doalọ to nuwiwa sinsẹ̀n lalo tọn depope mẹ. Vlavo agbasazọ́n mítọn wẹ ya kavi pipli he mí to azọ́nwa hẹ de kavi nuwiwa mítọn depope ma dona do kanṣiṣa hẹ sinsẹ̀n lalo. Jehovah na mí avase dọmọ: “Mì tọ́n sọn [Babilọni Daho lọ] mẹ, omẹ ṣie lẹ emi.”—Osọhia 18:2, 4.
DINDONANU DOGỌ
Gbadopọnna nuhe a gán wà ma nado dike mẹdepope ni dekanpona nugbonọ-yinyin towe na Jehovah. Sọ pọ́n lehe a gán do nugbonọ-yinyin towe hia bo tọ́n sọn Babilọni Daho lọ mẹ do.
3. Nọ payi mẹplọntọ lalonọ lẹ go
Nawẹ mí dona nọ yinuwa gbọn eyin mí sè ohó agọ̀ de gando titobasinanu Jehovah tọn go? Hia Howhinwhẹn lẹ 14:15, enẹgodo dọhodo kanbiọ ehe ji:
-
Naegbọn mí nọ nọ̀ aṣeji ma nado kẹalọyi nuhe mí nọ sè lẹpo?
Hia 2 Johanu 10, enẹgodo dọhodo kanbiọ ehelẹ ji:
-
Nawẹ mí dona nọ yinuwa hẹ atẹṣitọ lẹ gbọn?
-
Eyin mí ma tlẹ nọ wanu dopọ tlọlọ hẹ atẹṣitọ lẹ, aliho devo tẹlẹ mẹ wẹ mí sọgan jẹ ayidonugo na nuplọnmẹ yetọn lẹ ji te?
-
Nawẹ e na ṣí na Jehovah eyin e mọdọ mí nọ na ayidonugo kavi dotoaina ohó agọ̀ he mẹlẹ nọ dọ gando ewọ kavi titobasinanu etọn go lẹ?
4. Yin nugbonọ na Jiwheyẹwhe eyin mẹmẹsunnu de tlẹ waylando
Eyin mí sè dọ hagbẹ agun lọ tọn de waylando sinsinyẹn de, etẹwẹ mí dona wà? Lẹnnupọndo nunọwhinnusẹ́n dopo ji sọn Osẹ́n he Jiwheyẹwhe na Islaeli hohowhenu tọn mẹ. Hia Levitiku 5:1.
Sọgbe hẹ anademẹ he wefọ ehe bẹhẹn, eyin mí sè dọ mẹde jai jẹ ylando sinsinyẹn de mẹ, e to dandan mẹ dọ mí ni yì dọ nuhe mí yọnẹn gando whẹho lọ go na mẹho lẹ. Amọ́ whẹpo mí nido wàmọ, mí gán gbọn homẹdagbe dali biọ to ylanwatọ lọ lọsu si nado yì mọ mẹho lẹ bo yigbe ylando etọn tọn. Eyin mẹlọ gbẹ́ nado ze afọdide ehe, nugbonọ-yinyin mítọn na Jehovah dona whàn mí nado yì mọ mẹho lẹ bo dọ nuhe mí yọnẹn na yé. Nawẹ afọdide mọnkọ zize nọ dohia gbọn dọ mí tindo owanyi nugbo na . . .
-
Jehovah Jiwheyẹwhe?
-
mẹhe waylando lọ?
-
hagbẹ agun lọ tọn he pò lẹ?
Eyin yisenọ hatọ de jai jẹ ylanwiwa de mẹ, gọalọna ẹn!
5. Tọ́n sọn Babilọni Daho lọ mẹ
Hia Luku 4:8 gọna Osọhia 18:4, 5, enẹgodo na gblọndo kanbiọ ehelẹ tọn:
-
Be yinkọ ṣie gbẹ́ tin to sinsẹ̀n lalo de si, bọ yé gbẹ́ nọ lẹn mi di dopo to hagbẹ yetọn lẹ mẹ wẹ ya?
-
Be n’tin to pipli de mẹ he tindo kanṣiṣa hẹ sinsẹ̀n devo wẹ ya?
-
Be azọ́n he n’nọ wà nọ nọgodona sinsẹ̀n lalo to aliho de kavi devo mẹ wẹ ya?
-
Be e gbẹ́ biọ dọ n’ma nọla na sinsẹ̀n lalo to adà gbẹzan ṣie tọn devo depope mẹ wẹ ya?
-
Eyin gblọndo ṣie na depope to kanbiọ ehelẹ mẹ yin mọwẹ, vọjlado tẹlẹ wẹ n’dona basi?
Depope he e na yindo, basi nudide de he na zọ́n bọ a na do ayihadawhẹnamẹnu wiwe de bosọ dohia dọ a to nugbonọ yin na Jehovah.
Etẹwẹ a na wà eyin yè biọ to asi we nado basi nunina do nọgodona nuwiwa sinsẹ̀n de tọn?
MẸDELẸ NỌ DỌ DỌ: “N’dona dindona nuhe atẹṣitọ lẹ nọ dọ gando Kunnudetọ Jehovah tọn lẹ go, na ma do penugo bo yiavùnlọna nugbo lọ.”
-
Be a lẹndọ enẹ yin nuyọnẹnnu ya? Naegbọn a do dọ mọ?
BLADOPỌ
Nado to nugbonọ yin na Jehovah zọnmii, mí dona dapana gbẹdido hẹ mẹhe ma nọ yin nugbonọ na ewọ lẹ. Podọ mí dona nọla mlẹnmlẹn na nuwiwa sinsẹ̀n lalo tọn lẹpo.
Dogbapọn
-
Naegbọn mí ma dona nọ pọ́n, hia kavi dotó nudepope he bẹ linlẹn atẹṣitọ lẹ tọn hẹn?
-
Nawẹ mí dona nọ yinuwa hẹ mẹhe masọ yin Kunnudetọ Jehovah tọn de ba lẹ gbọn?
-
Aliho tẹlẹ mẹ wẹ mí sọgan setonuna avase lọ nado họ̀n sọn sinsẹ̀n lalo mẹ te?
PỌ́N NUDỌNAMẸ DEVO LẸ
Gbadopọnna lehe a gán nọ yinuwa do to whenue mẹdevo lẹ hẹn linlin agọ̀ lẹ gbayipe gando Kunnudetọ Jehovah tọn lẹ go.
“Be A Nọ Dindona Whẹho lẹ Ganji Ya?” (Atọ̀họ̀ Nuhihọ́ lọ Tọn, août 2018 tọn)
Nawẹ a sọgan yọ́n pipli kavi nuwiwa delẹ he nọ nọgodona Babilọni Daho lọ gbọn?
Aliho tẹlẹ mẹ wẹ agọjẹdomẹtọ delẹ nọ tẹnpọn nado dekanpona yise mítọn te?
To otàn lọ “N’Ko to Jiwheyẹwhe Dín sọn Ovu Whenu Gbọ́n” mẹ, pọ́n lehe yẹwhenọ Shinto tọn de gbàgbẹ́ sinsẹ̀n lalo he mẹ e te dai tọn do.
“Biblu Nọ Diọ Gbẹzan Mẹtọn” (Atọ̀họ̀ Nuhihọ́ lọ Tọn, octobre-décembre 2011 tọn)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
