ˈCƖAANDHƐ- 58
Kpʋn ˈo Zoova ˈˈbun in
Kletiɛn ˈjɛʋn se ˈbhɛɛ- ʋʋ ˈye dhɛ ooˈˈ dhɛ -aeˈˈ ɲɔn ooˈˈ ɲɔn i ˈˈtai- ɔ ˈyeɛ nʋn ʋʋ ˈye Zoova aˈ ˈˈɲɩan in -ɲnaan. -A jhibhiˈ ˈkamɔn- ɛ -nɩn -ke ˈdhe -manˈ dɩ ˈdhi. ˈKpɩ -man poa ˈe -wɛeˈ -ˈyea ˈo Zoova ˈˈbun in kpʋn ɛn, ɩn ˈdha dhɛ ˈdhe ɔ ˈˈjhriɛ ˈdhe. (Zro 1 Chroniques 28:9) ˈDhe dɩwɛ- ˈdhi Zoova ˈˈbun in -kpʋɛn- ˈbhɛɛ ɛ ˈye ˈˈɩkman- -an? ˈˈDhe dhɛwɛ- ˈbhɛɛ -ɛ ˈye ʋn sʋn bho po -wɛeˈ -ˈye dɩ -ˈnɩn ˈˈdhru ˈjha -a?
1. Dhɛwɛ- ɲʋn -ˈnʋʋn ˈbhɛɛ ʋʋ ˈye nʋn ˈˈdhe -a ˈye Zoova bho -tɛɛn?
Ɲʋn -ˈnʋʋn an muɛn -aʋ ˈˈtun- -wɛeˈ -a ˈye Zoova aˈ ˈˈɲɩan in -ɲnaan. Ɲʋnwɛ- ˈbhɛɛ -ʋʋ ˈye ɛɛˈ dhɛ tu nʋn -ɛn? Ɲʋn -ɲnaan Zoova aˈ ˈˈɲɩan in ˈˈdhe -ʋa- ˈtmʋan sɩ ˈdhe ɔɔˈ -glibha aˈ dɩ ˈdhi ɛ, ʋa nʋɛnˈ -wɛeˈ -aaˈ dhɛgwlɩdeɛ- ˈye ˈghwla. ˈBho -ˈmɛn ˈdhe -kenɛnˈ ɛn, pliegbi aˈ ˈˈdhrujheʋn an gbaa sɩ i ˈdhe -aaˈ dɩ ˈdhi -wɛeˈ ɲʋn si jhibho- -ka ɛ nɩan sɩ ɛ, ʋʋ ˈye Zoova aˈ ˈˈɲɩan in -ɲnaan. Ɲʋn -ʋa- ˈtmʋan sɩ ˈdhe Zoova aˈ -glibha aˈ dɩ ˈdhi ɛ, -bho -a -nɩn ʋa sa dɩ zi, -aa sa ʋaˈ ˈsɛɩ ˈdhii zro, -aa sa ˈbho ʋaˈ ɛntɛɛnɛtɩ aˈ -dein ˈˈkpe mun -aeˈˈ -aa sa ʋaˈ videe i ˈjhe ɛˈ, ɛɛ muɛn -aʋ dhɛsaʋn ˈˈdhrui -nʋn. Ɲʋn -ʋa- nʋɛn -wɛeˈ ɲʋn ˈyea Zoova aˈ ˈˈɲɩn dɩ ˈbhɔ ɔ, dhɛ Zezi ˈtmʋan ˈdhe ʋaˈ dɩ ˈdhi ɛ ka: “Aʋ ˈˈtai ʋbʋ i. Ʋʋ -nɩɛn- ˈˈdhɔʋn- -ʋa- poa ɲʋn jie bho ɛ. -Bho ˈˈdhɔi- ɔɔ sa ˈˈdhɔi- jie bho po ɛˈ, -ʋʋ nɩan ˈsɔɔn, ʋa muɛn ˈe ˈˈbhie ˈdhi ˈkpa-.”—Matthieu 15:14.
2. Dhɩ -aa za ˈo ɛ, ɩan toɛˈ -ka -a kpʋan ˈo Zoova ˈˈbun in?
-Bho -a -kman Zoova aˈ dɩ ɛˈ, ɛɛ muɛn -nʋn -a ˈse ˈe pliegbi- -saɩn anˈ dhɛ ooˈˈ dhɛ ˈdhi -nɩn in. Dhbho -aa nʋan -e, -glibha- -a nɩan ˈe ˈdhi -e dhɩ aˈ klɛɛ -aa nʋan, pliegbi- -saɩn ɩanˈ sɩn ˈse ɩn ˈdhi -nɩn in. Zoova zela -aʋ -glʋˈ ˈdhe “Babilɔnɩn Klaaˈˈ” aˈ dɩ ˈdhi ɔ ˈnaan: “Aʋ ˈghwlʋ ˈe ʋn ˈdhi ˈman ˈcɛ.”—Révélation 18:2, 4.
KPA DHƐ I ˈŊWƆƐN ƝAN
-Ka -ˈyea nʋn ˈˈdhe ˈsea ɲɔn ooˈˈ ɲɔn in ˈˈtai- dhi ɔ ˈsea jhbhɛɛ- nɩan ˈo -mɔn -e Zoova ˈɲnɩn ˈkɔɔ i ˈˈdhe -ka -ˈyea nʋn -wɛeˈ -ˈyea ˈe Babilɔnɩn Klaaˈˈ ˈdhi ˈghwlʋ ɛ, ɛmɛn- -man mun ˈcɩan-.
3. -A ˈsroo- -ˈgwlɩi ˈdhe sɩtmʋn- anˈ dɩ ˈdhi
-Bho ɲʋn an sa sɩ ˈtmʋn ˈdhe Zoova aˈ -glibha aˈ dɩ ˈdhi ɛˈ, ka -a ˈye nʋn -ɛn? Zro Proverbes 14:15, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- -a ˈse dhɩ aˈ klɛɛ -aa ˈŋwɔan -gwlɩˈˈ -de i -ɛ?
Zro 2 Jean 9-11, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋn ˈbhɔa Zoova ˈˈɲɩn dɩ ˈˈdhe -ʋa- ˈkɔɔa ɔɔˈ -glibha aˈ ˈɲnɩn ɛn, -kawɛ -a ˈye -aaˈ ˈˈjɛ -ˈgwlɩi ˈsroo- sʋn nʋn ˈdhe ʋbʋ bho -ɛ?
-
Ɲʋn ˈbhɔa Zoova ˈˈɲɩn dɩ ˈˈdhe -ʋa- ˈkɔɔa ɔɔˈ -glibha aˈ ˈɲnɩn ɛn, -bho -aa sʋbʋ bho tɛɛn -mɔnˈ -dhe ɛˈ, dhɩ -ˈnɩɩn -wɛ ˈbhɛɛˈ -ɩn ˈyeɛ nʋn -wɛeˈ -a ˈyʋbʋ i ˈkpaa-?
-
-Bho -aa sa sɩ ɲʋn an ˈtmʋan ˈdhe Zoova -e ɔɔˈ -glibha aˈ dɩ ˈdhi -dheinˈˈ bho po ɛˈ, -kawɛ ɛɛ mun -nɩn ˈbho ɔ -gwlɩˈˈ -ɛ?
4. Kpʋn ˈo Zoova ˈˈbun in, -bho ˈdhoudhi nʋn dhɛsaʋn-
-Bho -a jhibhi -ka ˈdhoudhi dhueˈ nʋan dhɛsaʋn klaaˈˈ aˈ, dhɛwɛ- -a ˈye nʋn -ɛn? -Bho -a ˈyeɛ jhibho- ɛˈ, -a ˈtmʋn ˈtee dhueˈ Ɲɔnsoa ˈˈɲɩan Israɛkɔʋn ɛnˈ dɩ. Zro Lévitique 5:1.
ˈSrɩn nɩan ˈe Biiblʋ aˈ ˈˈjhriɛ nɛn ˈdhi ɛ, ɩn ˈnaan -bho -a jhibhi -ka ɲɔn nʋan dhɛsaʋn- klaaˈˈ aˈ, -a ˈyeɛ ɲankɔʋn- ˈtmʋʋn-. -Bho -a ˈye ɛɛˈ dhɛ tu nʋn ɛnˈ, -a ˈye ɲɔn nʋan dhɛsaʋn- ˈkpɩ po -mɔnˈ ke, ɔɔˈ ˈˈjɛ ˈye ˈe ɲankɔʋn bho mun ɔ ˈye ɔɔˈ dhɛsaʋn ŋwɔn -za. -Bho ɔ ˈse ˈbɔn ɔ ˈyeɛ nʋn ɛnˈ, dhɛ -a kpʋan ˈo Zoova ˈˈbun in ˈye -aʋ ˈˈtun -a ˈye dhɛ ɔ nʋan ɲankɔʋn ˈtmʋʋn-. Ka ɛɛ nʋn ɛnˈ -to sʋn -ka -a kman...
-
Zoova aˈ dɩ -ɛ?
-
ɲɔn nʋan dhɛsaʋn ɔɔˈ dɩ -ɛ?
-
ɲʋn nɩan ˈe ɲɔnsoagbu ˈdhi aˈ dɩ -ɛ?
5. -Tɛɛn Babilɔnɩn Klaaˈˈ bho
Zro Luc 4:8 -e Révélation 18:4, 5, -ˈmɛn aʋ ˈtmʋn ideedɩ- nɩn anˈ dɩ:
-
ˈMan ˈɲnɩn nɩn ˈe pliegbi- -saɩn anˈ ˈsɛɩ ˈdhi ˈmɛn ke?
-
-Nɩɛn- ˈe -glibha ˈdhi -ɔ -nɩn pliegbi- -saɩn an nʋʋn dhbho i?
-
Dhbho ˈman nʋan, ɔɔ poɛ pliegbi- -saɩn sʋn bho ˈdhe dhɩ -dhee -ˈnɩɩn ˈdhi?
-
Dhɩ -nɩn -e ˈman ˈkmʋn ˈdhi ˈye ˈˈɩ zian- -wɛeˈ ˈye pliegbi- -saɩn bho -tɛɛn -ɛn?
-
-Bho ˈɩn -nɩn ˈe dɩ -ˈnɩn anˈ kpɔ dhueˈ ˈdhi ɛˈ, dhɩwɛ- ˈye nʋn -wɛeˈ ˈye ˈˈɩ -zian -an?
-Ka dɩ nɩan ˈe ˈdhi ˈjhe ɩn -nɩn ɛnˈ, dhɛ -man muan ˈo -za ˈyeɛ nʋn -ˈye -glʋˈ ˈdhɔɛe ˈbhle ˈˈdhe -ˈyeɛ -to -ka kpʋan ˈo Zoova ˈˈbun in ɛn.
-Bho ɲʋn ˈnaan aʋ -za ˈghwɛi aʋ ˈye pliegbi- -saɩn ˈˈɲɩn ˈˈdhe ɩn ˈye ɲʋn sea dhɛ ˈbhle sʋn bho po ɛˈ, dhɛ -man mun -nʋn -ɛn?
ƝƲN -ˈNƲƲN ˈNAAN: “Dɩ ɲʋn an ˈtmʋan -ɩn sea tɔˈdɩ -nɩn ˈdhe Zoova aˈ -Bobhlaʋn anˈ dɩ ˈdhi ɛ, ˈyɩ jhibho- -wɛeˈ ˈye tɔˈdɩ aˈ -gbaˈ ˈbhle ka jhibho-.”
-
ˈBhoo- -gwlɩˈˈ ɛ, ɛɛˈ dhɛ tu -nmɔn ˈˈjhrii? Dhɛɛdɩ- -ɛ?
DHƐWƐ- ˈCƖAN-?
-Bho -aa sa ˈbɔn -a ˈye ˈo Zoova ˈˈbun in kpʋn ɛnˈ, mɛnˈ -a -nɩn ɲʋn -ʋa- ˈbɔan -ʋʋ ˈyea -aʋ ˈdhe dhɛsaʋn ˈdhi po aˈ nanˈ -dhe.
Dhɛwɛ- -ˈŋwɔn in -ɛn
-
Dhɛɛdɩ- ɲʋn -an ˈtmʋan sɩ ˈdhe Zoova aˈ -glibha aˈ dɩ ˈdhi ɛ, -a ˈsʋbʋ -dheinˈˈ bho -po i -ɛ?
-
-Bho -a ˈŋwʋɩn -ka ˈdhoudhi nʋan dhɛsaʋn- -klaaˈˈ aˈ, dhɛwɛ- -a ˈye nʋn -ɛn?
-
ˈSrɩn -ɩan- ˈtmʋan pliegbi- -saɩn ɩanˈ bho -teɛn ɛnˈ dɩ ɛ, -kawɛ -a ˈye ɩanˈ ˈˈjhriɛ ˈˈdu sʋn nʋn -ɛn?
ˈBƆN DHƖ -ˈNƖƖN ANˈ I ˈŊWƆAN IN
-Bho -a ˈŋwɔn dɩ sea tɔˈdɩ -nɩn ˈdhe Zoova aˈ -Bobhlaʋn anˈ dɩ ˈdhi ɛˈ, dhɛwɛ- -a ˈye nʋn -ɛn?
“As-tu vraiment tous les faits?” (La Tour de Garde, août 2018)
-Bho dhbho -aeˈˈ dhɩ -ˈnɩɩn an sa -aʋ ˈˈtun ˈˈdhe -a ˈye ˈˈɲɩnsʋn saʋn- kwa ˈdhei de ɛˈ, dhɛwɛ- -a ˈye nʋn -ɛn?
Dhɛwɛ- ɲʋn -an vɔan -aʋ bho ʋa ˈbɔn ʋʋ ˈye nʋn ˈˈdhe ʋʋ ˈye -aaˈ dhɛgwlɩdeɛ- ˈkɔɔ -ɔ?
-A ˈsroo- -aaˈ ˈˈjɛ -ˈgwlɩi ˈdhe ɲʋn ˈsrɛipoʋn anˈ dɩ ˈdhi (9:32)
ˈˈJhu dhueˈ nɩan sɛntoisɩ ɛˈ ˈˈpɛekui- tɛnˈˈ -dhe ˈˈdhe -ɔ ˈbhɔa ɔɔˈ ɲɔnsoagbu ɛ, ɔɔˈ -bo -man mun ˈjhe-. (biographie “Je recherchais Dieu depuis mon enfance”)
“La Bible transforme des vies” (La Tour de Garde, 1er juillet 2011)
