Fo real kine Christians no goin let anyting o anybody get in da way of dem worshipping Jehovah. Garans dass how you feel, aah? Is worth plenny to Jehovah wen you choose fo stay tight wit him. (Read um 1 Records 28:9.) Wat kine tings can tes how tight you stay wit Jehovah, an wat can help you?

1. How oddas can tes how tight we stay wit Jehovah?

Some peopo goin try stop us from serving Jehovah. How come dey like do dat? Some peopo who no serve Jehovah anymoa, bulai about his hui cuz dey like wipe out oua faith. Dese guys stay apostates. Also, some church leada guys tell bulais about us fo get guys who donno betta fo stop serving Jehovah. If we try talk wit da guys who go agains us, read dea books, o blogs, check out dea websites, o watch dea videos, dat can jam us up real bad. Talking about da guys who like try pull us away from serving Jehovah an sticking tight wit him, Jesus wen tell: “Laytas wit dem awready! Dey jalike one blind guy stay go aroun, an show anodda blind guy wea fo go. Bumbye da two blind guys goin fall down inside one puka.”​—Matthew 15:14.

Wat if somebody we know no like be one Witness Fo Jehovah anymoa? Wen somebody we close to do dis, can make us all bum out an soa inside. Dat person might make us choose him o Jehovah. We gotta make up oua mind fo stick tight to Jehovah moa den anyting else. (Matthew 10:37) So we lissen wat Jehovah tell fo no hang out wit dose kine peopo.​—Read um 1 Fo Da Corint Peopo 5:11.

2. How wat we choose fo do can tes how tight we stay wit Jehovah?

Cuz we love Jehovah, we goin have notting fo do wit bulai kine religion. Oua job, da huis we stay in, an anyting we stay doing no can be part of one bulai kine religion. Jehovah tell us fo watch out: “Eh, my peopo, get outa [Babylon Da Great]!”​—Jesus Show 18:2, 4.

 DIG MOA DEEP

3. Watch out fo peopo who teach bulais

If we hear bad kine stuff about Jehovah’s hui, how we goin ack? Read um Smart Guys 14:15, an den talk story about dis question:

• How come we no like believe eryting we hear?

Read um 2 From John 10, an den talk story about dese questions:

• How we goin treat da apostates?

• Even if we no talk story wit apostates, wea else we can run into wat dey teach?

• How you tink Jehovah goin feel if we wen lissen to bad kine stuff about him o his hui?

4. Stick tight wit Jehovah wen one braddah sin

Wat we gotta do if we learn somebody in da local hui wen do someting really bad? Try look wat da Bible wen tell fo da Israel peopo befoa time. Read um Da Prieses 5:1.

Like da scripcha tell, if we learn somebody wen do someting really bad, we gotta tell da eldas wat we know. But befoa we do dat, would be nice fo tell dat person fo try go to da eldas an tell wat he wen do wrong. If he no do dat, oua love fo Jehovah goin move us fo tell da eldas wat we know. How doing dis goin show we stick tight wit . . .

• Jehovah God?

• da person who wen sin?

• oddas in da local hui?

 5. Stay outa Babylon Da Great

 WAT WE WEN TALK ABOUT

Fo stay tight wit Jehovah, we gotta stop hanging out wit da guys who no stay tight wit him. We gotta get out an have notting fo do wit bulai kine religions.

Wat You Wen Learn

• How come we no like watch, read, o lissen wat da apostates tell?

• How we gotta treat da guys who no like be Witnesses Fo Jehovah anymoa?

• How we can lissen da warning fo get out of bulai kine religion?