Ovakriste vatjiri kave yandjere otjiṋa poo omundu okuzunḓa omerikotameneno wawo ku Jehova. Otjingaperi kutja imbwo oomuano mbu u fula. Jehova u vara ouṱakame woye. (Lesa 1 Ekuruhungi 28:9.) Ozongaro zeṋe nḓu mape ya aze tjiti kutja i rire ouzeu kove okurira omuṱakame ku ye, nu ovikwaye mbi mavi yenene okukuvatera?

1. Varwe mape ya ave roro vi ouṱakame wetu ku Jehova?

Ovandu tjiva ve kondja okututjaera okukarera Jehova. Oouṋe mbu mape ya ave tjiti otjiṋa ho? Ovandu tjiva mba isa okurikotamena ku Jehova nu mbe handjaura ovizeze ohunga notjira tje, mena rokutja ve vanga okunyona ongamburiro yetu. Owo ve tjiukwa otjovandu mba isa okurikotamena ku Jehova nu mbe mu pirukira. Wina, ovanane vozongamburiro tjiva ve handjaura ozondjivisiro zoposyo ohunga na eṱe, okutjita kutja imba mbe he nokukengeza ve ise okurikotamena ku Jehova. Otjiṋa otjinaumba ku eṱe okuhungira ku novetupirukire, okulesa omambo wawo, okuyenda kotungovi twawo poo okutarera ouvidio wawo. Ohunga novandu mbe kondja okutjita kutja tu ise okukarera Jehova nouṱakame, Jesus wa tja: “Amu rikende [na wo]! Owo ovanane ovapoṱu vovapoṱu; nomupoṱu tji ma nana omukwao korupangu, indino aveyevari mave wire motjitoto.”—Mateus 15:14.

Hapo tjike indu omundu ngu matu tjiwa tja tye kutja ke nokuvanga okurira umwe wOvahongonone va Jehova rukwao? Indu omundu wopopezu na eṱe tja tjiti nao, ku tu hihamisa tjinene. Omundu ngo mape ya e tu ṋiṋikiza kutja tu toorore pokati ke na Jehova. Eṱe matu sokurimanena okukara nouṱakame ku Mukuru kombanda yoviṋa avihe. (Mateus 10:37) Ku nao, tu kara nonḓuviro komarakiza wa Jehova wokuhinokukara ku novandu otja imbo.—Lesa 1 Ovakorinte 5:11.

2. Ozondando nḓu tu tjita ze raisa vi kutja oweṱe ovaṱakame ku Jehova poo indee?

Orusuvero rwetu ku Jehova ru tu hinga kutja atu ha kara norupa mozongamburiro zoposyo. Nandarire oviungura vyetu, otjira ku tu ri poo oviṋa ngamwa avihe mbi matu tjiti, kavi sokukara norupa nozongamburiro zoposyo. Jehova u tu rakiza nomambo nga: “Piteye, tjiwaṋa tjandje! Piteye mu [Babilon otjinene]!”—Omavandururiro 18:2, 4.

 KONḒONONA OUKOTO

3. Ṱakamisa ovahonge voposyo

Hapo matu sokuraisa ongaro iṋe indu tji matu zuu oviṋa ovivi ohunga notjira tja Jehova? Lesa Omiano 14:15, nu okuzambo hungirira kepuriro ndi:

• Ongwaye tji tu ha sokukambura moviṋa avihe mbi matu zuu?

Lesa 2 Johanes 10, nu okuzambo hungirira komapuriro nga:

• Matu sokutjinda vi ovandu mba isa okurikotamena ku Jehova nu mbe mu pirukira?

• Omomiano viṋe omahongero wovandu mba isa okurikotamena ku Jehova nu mbe mu pirukira mu maye tu ṱunu, nandarire kutja katu hungire ku na wo?

• Hapo mo munu kutja Jehova u fula vi, indu tji matu puratene komambo omavi ohunga na ye poo notjira tje?

4. Rira omuṱakame ku Mukuru indu omukambure omukweṋu tja tjiti ouvi

Indu tji twa tjiwa kutja omundu mombongo wa tjiti ouvi ounene, hapo ovikwaye mbi matu sokutjita? Tara komurari okuza ketwako Mukuru nda yandjere kOvaisrael. Lesa Levitikus 5:1.

Otja tji pa raisiwa mezeva ndo, indu tji twa tjiwa kutja omundu mombongo wa tjiti ouvi ounene, eṱe matu sokuraera ovanene vombongo imbi mbi matu tjiwa. Ngunda atu hi ya tjita nao, ma rire nawa okuraera omundu ngwa tjiti ouvi okuyenda kovanene vombongo okukahepura ouvi we. Indu tja panḓa okutjita nao, ouṱakame wetu ku Jehova mau sokutuhinga okuraera ovanene vombongo imbi mbi matu tjiwa. Indu tji twa toora omukambo mbwo, tu raisa vi orusuvero . . .

• ku Jehova Mukuru?

• komundu ngwa tjita ouvi?

• ku varwe mombongo?

 5. Kara kokure na Babilon otjinene

 OKUYARUKIRA PO OUSUPI

Kutja tu rire ovaṱakame ku Jehova, katu sokukara pu novandu mbe ha raisa ouṱakame ku ye. Eṱe wina matu hepa okupoka oparukaze kozongamburiro zoposyo.

Okurizemburukisa

• Ongwaye tji tu ha sokutarera, okulesa, poo okupuratena koviṋa vyovandu mba isa okurikotamena ku Jehova nu mbe mu pirukira?

• Matu sokutjinda vi imba mbe ha vanga okurira Ovahongonone va Jehova rukwao?

• Omomuano uṋe mu matu yenene okuṱakamisa erakiza rokupoka kozongamburiro zoposyo?