Jehovah rinduka orang ke taluk ngagai Iya. (Bacha 1 Bansa Israel 28:9.) Nya alai, orang Kristian ti bendar deka mengkang taluk ngagai Jehovah sereta ngenuluka Iya ba pengidup. Tang tu enda senang laban kekadang sekeda orang tauka utai deka nguji penaluk kitai. Nama ulih nguji penaluk kitai lalu baka ni kitai ulih mutarka nya enggau mujur?

1. Baka ni orang engka nguji penaluk kitai ngagai Jehovah?

Sekeda orang deka nguji nagang kitai ari nyembah Jehovah. Sapa sida tu? Sekeda orang kala nyembah Jehovah, tang udah nya sida ninggalka gerempung Jehovah lalu sida madahka utai ti bula kena ngerusakka pengarap kitai. Sida dikumbai orang ke udah limpang sereta ngelaban Petara. Bisi mega tuai pengarap ke nguji ngerembaika berita ti pelesu kena nyarutka runding orang ngambika ninggalka Jehovah. Jesus ngasuh kitai ngenyauhka diri ari sida. Ku iya madahka: “Anang ibuhka sida. Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.” (Matthew 15:14) Nya alai, manah agi enti kitai enda bekelikuh enggau sida, macha bup tauka blog sida, ngelawa laman web tauka meda video sida.

2. Baka ni kitai ulih nunjukka penaluk ngagai Jehovah lebuh ngaga pemutus kediri empu?

Jehovah meri kitai pesan tu: “Pansut ari [Babilon ti Besai], kita ke nembiak Aku.” (Pemandang 18:2, 4) Pengerindu kitai ke Jehovah meransang kitai ngenyauhka diri ari pengarap pelesu. Nya alai, kereja ke dipilih kitai, gerempung ke dititihka kitai, indah pengawa ke digaga kitai enda patut bisi sebarang kaul enggau pengarap pelesu.

 BELAJAR MAYUH AGI

3. Bejimat ari pengajar ti pelesu

Nama digaga nuan lebuh ninga utai ti enda manah pasal gerempung Jehovah? Bacha Jaku Dalam 14:15, lalu kerandauka tanya tu:

• Nama kebuah kitai patut bejimat sereta enda pechayaka semua utai ti didinga kitai?

Bacha 2 John 9-​11, lalu kerandauka tanya tu:

• Nama patut digaga kitai enggau orang ke udah limpang ari pengarap sereta ngelaban Petara?

• Taja pan kitai enda betunga mua enggau orang ke udah limpang ari pengarap, tang baka ni ajar ari sida agi ulih datai ba kitai?

• Ba runding nuan, nama asai ati Jehovah enti kitai ninga ngagai penerang ti pelesu pasal Iya tauka gerempung Iya?

4. Mengkang taluk ngagai Petara lebuh bala menyadi kitai ngereja dosa

Enti kitai nemu seiku ari bala menyadi kitai ngereja dosa ti besai, nama patut digaga kitai? Peratika siti prinsip ari Adat Petara ngagai orang Israel. Bacha Adat Lewi 5:1.

Nitihka ayat tu, kitai patut madah ngagai tuai gempuru enti kitai nemu seiku ari bala menyadi kitai ngereja dosa ti besai. Tang, sebedau nya, kitai patut meransang iya ngiga tuai gempuru ngambika bulih tulung ari sida. Enti iya enggai ngaku dosa iya, penaluk kitai ngagai Jehovah deka meransang kitai madahka utai tu ngagai bala tuai gempuru. Baka ni tu ngayanka pengerindu sereta penaluk ngagai . . .

• Petara Jehovah?

• orang ti ngereja dosa ti besai?

• bala menyadi ke bukai?

 5. Pansut ari Babilon ti Besai

 LANSA

Ngambika ulih mengkang taluk ngagai Jehovah, kitai enggai begulai enggau orang ke nguji deka ngelimpangka kitai.

Ulang Kaji

• Nama kebuah kitai enda ninga utai ti ditusui ari orang ke udah limpang ari pengarap sereta ngelaban Petara?

• Enti kitai nemu seiku ari bala menyadi kitai udah ngereja dosa ti besai, nama patut digaga kitai?

• Baka ni kitai ulih ngasika pesan ke ngasuh kitai pansut ari pengarap ti pelesu?