LEKSION 58
Mattalupaddian nga Matalo Kani Jehova
Determinadu i kurug ira nga Cristiano nga awan tu mamagimmang ta paddayawda kani Jehova. Siguradu nga kunnatun gapa i matageno mu. Tagibaloran ni Jehova i kinamatalo mu. (Bibbigan i 1 Cronicas 28:9.) Kunnasi mapurueban i kinamatalo mu nisa? Kunnasim marubang yatun?
1. Kunnasi mapurueban i kinamatalo tam kani Jehova megafu ta tanakuan?
Purueban na karuan nga pagimmangan ittam ta passerbi kani Jehova. Sinni ira i magangngua tatun? I apostata ira. Ira i totolay nga nagimmang nga masserbi kani Jehova anna mangiwara-wara tu kinaladdug meyannung ta organisasion ni Jehova tapenu pakkafian i pangurug tam. Mangiwara-wara gapa i karuan nga lider ira na relihion tu falsu ira nga informasion meyannung nittam tapenu panawan na karuan i kinakurug. Delikadu i pakiddiskusion, pabbibbig tu libru, paningan ta website, onu paggiraw ta video na opposer ira. Kinagi ni Jesus turi ira ta mamagimmang ta matalo nga passerbi tam kani Jehova: “Pagurayan nu laman ira! Vuling ira nga mangipollu ta totolay nga kagitta da nga vuling. Nu ipollu na tolay nga vuling i kagitta na nga vuling, ira ngana nga dua i mataga ta avvu.”—Mateo 15:14.
Kunnasi nu ari ngana masserbi kani Jehova i tadday nga kakilala tam? Siguradu nga maraddam ittam mas ngana nu mesimmu yatun ta tadday nga madukko nittam. Awayyana nga fuersanna ittam nga tuttulan yayya imbes nga si Jehova. Determinadu ittam nakuan nga mattalupaddian nga matalo ta Dios. (Mateo 10:37) Yari tu tuttulattam i bilin ni Jehova nga ariattam makikavulu ta kunnatun ira nga totolay.—Bibbigan i 1 Corinto 5:11.
2. Kunnasi tam mepasingan ta desisiottam nga matalo tam kani Jehova?
I aya tam kani Jehova i mamaguyu nittam nga lillitan i maski anni nga konektadu ta falsu nga relihion kagitta na trabahu, organisasion, onu maski anni nga kuattam. Kinagi ni Jehova: “Sikamu nga totolè ira, panawan nu i Babilonia!”—Nepakannammu 18:2, 4.
GIGIAMMUAN I ARU PAGA
Ammuan i makuam tapenu awan tu maski sinni i makadaral ta determinasiommu nga mattalupaddian nga matalo kani Jehova. Ammuan gapa i importansia na pallawan ta Babilonia nga Dakal tapenu mepasingammu i kinamatalo mu.
3. Ari ka mangurug insigida
Anni i kuattam nu egga i negatibo nga maginna tam meyannung ta organisasion ni Jehova? Bibbigan i Proverbio 14:15, anna paguvovugan yaw nga pakkiavu:
-
Ngatta ariattam nakuan nga kurugan i ngamin nga maginna tam?
Bibbigan i 2 Juan 10, anna paguvovugan yaw ira nga pakkiavu:
-
Kunnasi nakuan i pattratu tam ta apostata ira?
-
Maski nu ariattam nga makiyuvovug tu direkta ta apostata ira, kunnasida ittam mainfluwensian ta tuttudduda?
-
Anni i matageno ni Jehova nu ginnattam i marake ira nga informasion meyannung nisa onu ta organisasionna?
4. Mattalupaddian nga matalo ta Dios nu egga i makaliwa nga kapangngurug
Nu nammuattam nga nakakua tu madammo nga liwa i tadday ta kongregasion, anni i mawag nga kuattam? Ikonsidera i prinsipio ta dob na Dios para ta Israelita gari. Bibbigan i Levitico 5:1.
Kagitta na nakagi ta teksto, nu nammuattam nga nakakua tu madammo nga liwa i tadday, mawag nga kagiattam yatun ta elder ira. Ngem nige tam nga kuan yatun, pangipasingan tu allo nu kibbidattam i nakaliwa nga yayya mismu i umaranni ta elder ira anna mangikagi tatun. Nu arianna nga kuan yatun, paguyuan ittam na kinamatalo tam kani Jehova nga ikagi ta elder ira i ammu tam. Nu kunnatun i kuattam, kunnasi tam mepasingan i aya tam . . .
-
kani Jehova nga Dios?
-
ta tolay nga nakaliwa?
-
ta karuan paga ta kongregasion?
Nu mappeligro i kapangngurug mu, uffunammu yayya!
5. Mallawakka ta Babilonia nga Dakal
Bibbigan i Lucas 4:8 anna Nepakannammu 18:4, 5, anna paguvovugan yaw ira nga pakkiavu:
-
Nakalista paga kari i ngagakku nga miembro na falsu nga relihion?
-
Miembro ngà kari na organisasion nga konektadu ta tanakuan nga relihion?
-
Suportan kari na trabahù i falsu nga relihion?
-
Egga paga kari i mawag nga kuakku tapenu mapanawakku i falsu nga relihion?
-
Nu wan i tabbag ku ta maski anni taw nga pakkiavu, anni i mawag nga kuakku?
Siguraduammu nga maski anni i desisiommu, kanayun nga marenu i konsensiam anna mepasingammu nga matalo ka kani Jehova.
Anni i kuammu nu makkiddaw tu donasion i tanakuan nga relihion?
I KAGIAN NA KARUAN: “Mawag nga mammuakku i kakkagian na apostata ira meyannung ta Saksi ira ni Jehova tapenu ammù nu kunnasi tabbagan yatun.”
-
Fustu kari yatun onu ari? Ngatta?
ANNI I NAGIGIAMMUM?
Tapenu mattalupaddiattam nga matalo kani Jehova, ariattam makikavulu ta totolay nga ari matalo nisa. Mawag gapa nga ariattam ngana konektadu ta falsu nga relihion.
Review
-
Ngatta ariattam nakuan nga girawan, bibbigan, onu ginnan i tuttuddu na apostata ira?
-
Kunnasi nakuan i pattratu tam ta totolay nga ariadda ngana kayà i masserbi kani Jehova?
-
Kunnasi tam matuttul i bilin nga panawan i falsu nga relihion?
I AWAYYAM PAGA KUAN
Ammuan nu anni i kuammu nu egga ira i mangiwara tu kinaladdug meyannung ta Saksi ira ni Jehova.
“Fustu Kari i Informasion nga Egga Nikaw?” (Passifusifutan, Agosto 2018)
Kunnasim mammuan nu konektadu i organisasion onu aktibidad ta Babilonia nga Dakal?
Anni i kukukuan na opposer ira tapenu makkafi i pangurug tam?
Ta istoria nga “Ala-alegakku i Dios Namegafu Paga ta Kabbikku,” bibbigan i meyannung ta tadday nga pari na Shinto nga pinanawanna i falsu nga relihion.
“Pakastan na Biblia i Pattolay” (Passifusifutan, Hulio 1, 2011)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
