Angịnyị nya ịKịrayịsị nyịlẹhị wuu cheje nyọka ya iwe da ká ịngịngịhyẹ lee ọngọngọhẹ ka bịrị igu oriri nyaa bala iJihova ka. Ịwẹẹ ọdada á juwa ka, ịnyị ọ lang ahụ ịnyịnyị lẹ. Ọ kaa myị̀ iJihova lẹhị kori ká godayị giri-giri họọ. (Wa 1 Ego Ogbegbe 28:9.) Iwe-ahụrụ ụma iyina à tị́ ka du kọ ka lang ujwo nyọka godayị giri-giri ha iJihova myị́? Ịyẹ à tị́ ka dang ụbwọ?

1. Ányị angịkịla à tị́ ka ma o-godayị giri-giri nyang yẹ?

Angịhyẹ ka tịtọ nyọka huhi abwọ la ọ-ka gbịgba ha iJihova. Owo à tị́ ka họ uguru nya ang ọlịnyị? Angịhyẹ ịlẹ kị rụ hi ẹlịlẹhị kaa me ọnọọkịla ba ogu nya iJihova chajị nyọka ta ọmyịmyị nyahị ayịreji. Angịwẹ ri angị ji ẹkpẹ da ogu nya iJihova. Alegbeju nya ịgba ọgbagba ịhyẹ kaa me ọnọọkịla baahị chajị nyọka pịrị angịlẹ kị dụmwọ-dụmwọ ka, rụ hi ẹlịlẹhị. Ahị ka hu ịlọhị ju ka ẹpwụ nya akama myị́ kori kahị da ịwẹẹ lee o-ya ẹla bala angịlịnyị, wa apwụ nyaa, ka intanẹtị nyaa, lee ọ-yẹ ifim nyaa. IJisọsị ya ẹla ọlẹ u-uhye nya angịlẹ kị kaa maga nyọka hu angịkịla abwọ hi ịgba ọgbigba nya iJihova: “Anụ ba [hyaa] chịng odu mẹ. Ịwa ayịdang kpụ idu nya olegu. Ma, ị tị juwa kpa alidu ịkịla ụgbẹyị. Ụka myị́ ụka ká alidu á juwa kpa alidu ịkịla aanaa ụgbẹyị lẹ aalẹ, ẹpwụ nya ụjẹ-ọpyị, ịwa wuu a kaa ju ka wurum lẹlẹ.”—ỊMatiyu 15:14.

Kori ká ọngọhẹ ọlẹ kahị jẹ́ á tị cheje nyori ọwa nyị́ ka ri Olibeenu nya iJihova kaka bẹẹ? Ọ kaa tolujwo lụmẹ kori ká ọngọhẹ ọlẹ ko juhi chwẹẹ á họ ịnyị. Ọngọọwa ka tịtọ kahị ka bọọ jẹ ọkọkọ nya iJihova myị́. Ma, ahị ka cheje nyọka ji oye nya iJihova ọkọkọ nya ọngọkịla ọlẹlẹhẹ. (ỊMatiyu 10:37) Lẹ ahị ka ju ihi nya ehile ọlẹ ká iJihova da nyori ahị nyị ju ogu ta angịlịnyị ka.—Wa 1 Ala ịKọrịntị 5:11.

2. Ányị eje ọchịchị nyahị à tị́ ka mẹjẹ kori kahị godayị giri-giri ha iJihova?

Ọháha nyahị ẹ-ẹga nya iJihova ka guhi gbịla nyọka cheji ba hi ọ-ka la ịngịngịhyẹ ka họ bala ịgba ọgbagba nya ọnọọkịla. Ụkụrwọ nyahị, ogu ọnyị myị́ ọnyị kahị ji, lee ịngịngịhyẹ kahị kaa họ á chịla kọ ka dori wu ịgba ọgbagba nya ọnọọkịla ka. IJihova gbileehi ụbwọ ụ-ụrụ yẹkẹẹ: “Anụ angịnyị nyam Am Ohe Oluhye, anụ gba kpehe bwu ẹpwụ . . . nya ịBabịlọn ọwẹ mẹ.”—Ọwụrụụ-wụrụ 18:2, 4.

 JẸ́ GỤ ỌỌWA

3. Dụmwọ-dụmwọ ẹ-ẹga nya angịmẹjẹ nya ọnọọkịla

Ányị ahị tị́ ka họ kori kahị wo ẹla ọtịpyọ u-uhye nya ogu nya iJihova? Wa Etu 14:15, kanụ ya ẹla u-uhye nya ịtọ ẹla ọlẹ:

• Ịyẹ tị́ du kahị ka myị ju ẹla myị́ ẹla ọlẹ kahị wo ka?

Wa 2 ịJọn 10, kanụ ya ẹla u-uhye nya ịtọ ẹla ịlẹ:

• Ányị ahị tị́ ka họ ẹ-ẹga nya angị ji ẹkpẹ da ogu?

• Kori kahị dọmwụ ya ẹla bala angị ji ẹkpẹ da ogu ka wẹwẹ, ụgbẹyị oyina ọmẹjẹ nyaa à tị́ ka wuhi ọyị myị́?

• Ányị a tị́ me irya kọ ka la iJihova kori kahị ke ụrụ wo ẹla ịtịpyọ ịlẹ ká angịnyị kaa ya rwọọ lee ogu nyamwụ?

4. Godayị giri-giri ha iJihova ụka ká ọọnahị á họ ọhọbịrị

Kori kahị jẹ́ nyori ọngọhẹ ọọjịra-jịra nyị họ ọhọbịrị ọtụka, ịyẹ à tị́ chịla kahị ka họ? Kụ ẹhị yẹ ẹlẹhẹ ọlẹ kahị ka jẹ́ bwu ehile ọlẹ ká Ohe ya ha ala Isirẹlụ wẹẹ. Wa Ala iLivayị 5:1.

Jaabwọ ká ọgba ọwẹ mẹjẹ, kori kahị jẹ́ nyori ọngọhẹ họ ọhọbịrị ọtụka, ahị ka ya ẹla ọlẹ kahị jẹ́ je angịgbahị nya ọjịra-jịra. Ma, ene kahị ka họ ịnyị, ahị baba nyọka mẹ ọnahị jẹ bwula o-byi ọngọọwa ayịdang nyị kele lịlọmwụ ka ya ọhọbịrị nyamwụ jaa. Kori kọ tị họ ịnyị ka, ọháha ọlẹ kahị la ẹ-ẹga nya iJihova ka guhi gbịla nyọka ya ẹla ọlẹ kahị jẹ́ je angịgbahị nya ọjịra-jịra. Ányị ẹla ọlịnyị ọhọhọ à tị́ mẹ ọháha o-gbenyi-ka jẹ ẹ-ẹga nya . . .

• iJihova?

• ọlọhọbịrị?

• angịkịla ịla ọjịra-jịra?

 5. Chị ịlọng ebwo hi ịBabịlọn Ọtụka

 ẸLỊYẸ A TỊ́ JẸ́?

Nyọka godayị giri-giri ha iJihova, áhị ka yẹ jula angịlẹ kị ji ẹkpẹ dọọ ka. Ahị baba nyọka chị ịlọhị ebwo hi ịgba ọgbagba nya ọnọọkịla gbang-gbang ịnyịnyị.

Ẹlịyẹ A Tị́ Yụbwọ Chị?

• Ịyẹ tị́ du kahị ka yẹ ẹla ọlẹ ká angị ji ẹkpẹ da ogu kaa mẹjẹ i-ifim, lee ọ-waa ụ-ụpwụ, lee o-ke ụrụ wo laa ka?

• Ányị ahị tị́ ka họ ẹ-ẹga nya angịlẹ kị tịtọ nyọka ri aligu nya iJihova kaka?

• Ányị ahị tị́ ka bwu ju ihi nya ehile ọlẹ ká Ohe dahị nyọka gba kpehe hi ịgba ọgbagba nya ọnọọkịla?