Abo Kraist ochochi ach’alu du ku ma neke che ku ma we jẹñwu ẹñwu du abẹki ẹnẹ du ki kp’ọna nyu arẹ ma ñwu Jihofa. A ma kaki abalẹ i dẹ ef’ẹdọ wẹ. Jihofa che fẹdọ alu k’ẹ gwọnyu-wñ kpaka. (Gba 1 Iko Iko Ẹwñ 28:9.) Am’uña ẹñwu neke jẹñwu gbiti ñwẹ k’ẹ neke gwọnyu Jihofa kpaka, ẹñwu la neke ch’atẹko wẹ?

1. Abu abomunẹ neke jẹñwu gbiti ñwu wa k’a gwọnyu Jihofa kpaka?

Abo ka neke kp’ọna ñyu wa k’a we na rẹ Jihofa. Abo neke ch’abalẹ? Abo ka ku ma ma rẹ Jihofa gẹ n ar’ọlemi lugbo ujọ Jihofa ku ma neke kp’ukẹdọno wa biẹ. Ma adọ abo lẹ kọ amẹnayechi. Abalẹ gẹ, amagboji ọna-Ọjọ-egwa ka ar’ọlemi lugbo wa todu ku ma jẹñwu abo ka ku ma netiru ma kwefu ujọ Jihofa. Ejiñwa kp’abo ku ma ar’ọlemi lugbo wa, egb’ọtakada ma, egba am’inabali ku ma kọ oji intanẹti, abẹki eg’amifidio ma neke biẹnẹ ñwu wa. Jisọs kọla lugbo abo ku ma atene kpọna nyu wa egwọnyu Jihofa kpaka, i kakini: “T’uma nọ; amakpejufọ ku ma ña amakpejufọ ọna ma che. I la chẹwñ k’akpejufọ aña akpejufọ ọna, ejeji-ma awanẹ ef’ọgọ.”​—Matiu 15:14.

Ichẹñwu k’ẹnẹ k’ẹ ma kakini owñ ch’Ẹnibenu Jihofa gẹ n, abu i adẹ ọla wẹ? I neke kp’uwa ẹdọ biẹ nyọnyọ ichẹñwu k’ẹnẹ lẹ ch’abalẹ. Ẹñwu k’ẹnẹ lẹ che neke jẹñwu gbiti ñwu wa k’a tu ẹnẹ k’a lebọ, owñ abẹki Jihofa. Ama, otila i che k’a gwọnyu Jihofa kpaka t’ẹnẹ du le. (Matiu 10:37) Todulẹ, otila i ñọ che k’a leb’ọda Jihofa k’a we n’ẹñwu du eche kp’abo lẹ.​—Gba 1 Abo Kọrint 5:​11.

2. Abu amẹñwu k’a tu ñw’ọla wa k’a che neke jẹñwu gbiti ñwu wa k’a gwọnyu Jihofa kpaka?

Ufẹdọ k’a nẹ ñwu Jihofa ajẹñwu wa k’a we n’ọwọ ef’ẹñwu du ki lugbo ọna Ọjọ egwa ọlemi. Ukọlọ k’a che, ujọ du k’a defu-wñ abẹk amẹñwu du k’a che ki we n’ọwọ kpai ọna Ọjọ egwa ọlemi. Jihofa d’ufeti ñwu wa kakini: “Amonẹ-mi, mẹ kwefu [Babilọn Lile] dufu wa.”​—Ọla Ebitẹ 18:​2, 4.

 N’UMA NYỌGBA

3. Ẹ neti r’amakukọ ọlemi n

Ẹñwu dukpẹ k’a che ichẹñwu k’a gbọ k’amonẹ ar’ọlemi lugbo ujọ Jihofa? Gba Ita Ita 14:​15, ubilẹ mẹ ch’oluka oji ene-i:

• Ẹñwu chi ki ma dukpẹ ki ch’amọla duu k’a gbọ owñ a gbagbọ n?

Gba 2 Jọn 10, ubilẹ mẹ ch’oluka oji am’ene-i:

• Abu i dukpẹ k’a na che kp’amẹnayechi?

• Dagba k’a ma chẹñwu kp’amẹnayechi eju kp’eju n, am’ọna ẹñwu a neke li am’ẹñwu ku ma akọ?

• Abu ẹ neju kaki i adẹ eju Jihofa ichẹñwu k’a neti r’amọla ọlemi ku ma arọ lugbo-wñ kp’ujọ-wñ?

4. Gwọnyu Jihofa kpaka ichẹñwu k’ẹnẹ ka ef’ujeju abudọ t’adure

Ichẹñwu k’a ma kaki ẹnẹ ka ef’ujeju abudọ f’adure inaina ta, ẹñwu i dukpẹ k’a che? K’a g’ọla-ukọ k’Ọjọ du ñwu abo Israẹl. Gba Abo Lifai 5:1.

Dabalu k’ọgba Baibul-i ka, ichẹñwu k’a ma kaki ẹnẹ ka ef’ujeju abudọ f’adure inaina ta, i dukpẹ k’a ka ñwu abogijo ẹñwu k’a ma lugbo ọla lẹ. Tak’a ka ñwu abogijo, i anyọ k’a ka ñwu ẹnẹ lẹ todu ki na gbalu adure-wñ ọgba abogijo. Ichẹñwu ki ma ka ñwu abogijo n, ufẹdọ k’a nẹ ñwu Jihofa ajẹñwu wa na ka ñwu abogijo ẹñwu k’a ma lugbo ọla lẹ. Abu e-lẹ adu ña kaki a fẹdọ . . .

• Jihofa Ọjọ?

• ẹnẹ ki t’adure lẹ?

• abo ki bọ ef’ujeju abudọ?

 5. Dufu Kwefu Babilọn Lile

 ẸY’ỌLA UKỌ-I

K’a neke gwọnyu Jihofa kpaka, i dukpẹ k’a we n’ẹñwu du eche kp’abo ki ma fẹdọ Jihofa n. I ñọ dukpẹ k’a we n’ẹñwu du eche kp’amọna-Ọjọ-egwa ọlemi.

Ẹñwu ẹ kọchẹ?

• Ẹñwu chi ki ma dukpẹ k’a na g’amifidio, k’a gb’ọtakada abẹki eneti r’amẹñwu k’amẹnayechi aka n?

• Abu i dukpẹ k’a na che kp’abo ku ma ma atene ch’Ẹnibenu Jihofa gẹ n?

• Abu a neke leb’ufeti k’a ra kwefu am’ọna-Ọjọ-egwa ọlemi?