Gesii Christtuuduo-otubo Kẹnịye anịghakpọ kẹnị ụbọ kpọ bụọmọ wẹrị a mọ mọ Jehovah mọ ovuru seimọgha fa bara kị gbinipẹlẹ wẹrị emi. Tamanaịnyọ fa bara bị ị́mịnị kpọ bịsẹ bara gbinipẹlẹ dẹ. Jehovah iné gbinipẹlẹdẹ ye diidụbamọ wẹrị emi. (1 Chronicles 28:9 goo.) Te yeama kị ị́ mọ Jehovah mọ kpẹkpẹrẹẹ emi yọ daadi a paa emi a, anịa teeki baratụa ị́ pịrị a paa emi a o?

1. Zịnịotu tebara ka kị wó mọ Jehovah mọ ovuru seimọ a paa emi a o?

Zụa kịmịama omịnị Jehovah karị kụmọ bara gbaa wó pịrị a paa emi. Te kịmịama kị laa bei paa ye gbaa wó pịrị a paa emi a? Anị kịmịama nẹ ikpé egberiama kị Jehovah ogbo gbaịn mọ wẹrị wó peibolou seimọ dọụ mịnị otu. Gbaamaba zụa kịmịama nẹ Jehovah ogbo duo serii dẹ otu. Zụa ikpé karịbụọ tịbị-otu kpọ ikpé egberiama gbaa wẹrị zụa bịnaotu mịẹ Jehovah ogbo duo serii dẹ. Anịduonị a mọ mọ́ dọnọ, anị funbo goo, anị website duo sụọ, bá anị vidiobo diimụ yọ kpọ benebene ebigha. Jehovah karị mịnị kịmịama mịẹ suusụọ dọụ mịnị kịmịbo gbelemọ yọmị, Jesus gbaa mị: “A pei kụmọ. Asẹẹ tọrụ baan emi kịmị daa otuama. Anịa, tọrụ baan kịmị zịnị tọrụ baan kịmị daa wẹnị daba, anị maa kịmịbosẹ mú ogugu ka korosụọ mịnị.”—Matthew 15:14.

Wó nimi wẹrị emi kịmị anịghakpọ wó mọ naịn emi kịmị bá Jehovah karịgha fa bara gbaa wó pịrịdẹ a? Mị yebị kịmị dọọn fa k’emi. Bịsẹ ụbọ mị wó mọ Jehovah mọ kpẹkpẹrẹẹ emi yọmị akị daadiye bolou a tụa a paa emi. Paadẹ barasẹ omịnị Jehovah mọ kpẹkpẹrẹẹtimi mịnị bara gbinipẹlẹ. (Matthew 10:37) Anịduonị omịnị Jehovah gbaa ye pei wẹrị bịsẹ bara kịmịbo mọ kẹnịsụọmọ ye mịẹ gbeleigha.—1 Corinthians 5:11 goo.

2. Wó tọn angọ pịrị mịnị yebo tebara ka kị wó mọ Jehovah mọ kpẹkpẹrẹẹ emi yọ gbele a paa emi a o?

Omịnị akị Jehovah ghọ nana wẹrị emi tarị mị baratụa wó pịrị wẹrị ikpé karịbụọmọ wẹnị gbeleigha fa. Wó wẹnị mịnị fịrị, wó sụọ emi ogbo bá wó mịẹ mịnị yesẹ, benebene ikpé karịbụọmọ kẹnịsụọmọgha. Jehovah berifaan ye kọn wó pịrị wẹrị emi: “Ine kịmịama [Opu Babylon], duo baịn serii.”—Revelation 18:2, 4.

 EBIBARA TUUDỌỤ

3. Ikpé egberiama akị kịmịotu tolumọ mịnị otuama nimipẹlẹ

Omịnị Jehovah ogbo gbelemọ yọmị sei egberiama naa daba teeki mịẹ agbẹị emi a? Proverbs 14:15 goo dá, bei biibịbị kẹrị ẹrẹtei:

• Omịnị tetuu kị duonị wó naa mịnị yebosẹ pei agbẹịgha o?

Wẹrị 2 John 10 goo dá, mị biibịbịbo kẹrị ẹrẹtei:

• Omịnị tebara ka kị gesii duo korodẹ otu mọ inyenrin agbẹị emi a o?

• Omịnị gesii duo korodẹ otubo mọ ẹrẹgha kị gbaa kpọ, omịnị tebara ka kị mọkpọ a mọ mọ́ ẹrẹ a paa emi a?

• Omịnị kịmịotu akị Jehovah mọ bá wo ogbo mọ gbaịn mọ mịnị egberibo pei daba, tebara ka kị Jehovah gbele a paa emi bara kị ị́ mọ tọn ma o?

4. Itu bolou bọọ kịmị kụrọ sei kị mịẹ kpọ, Jehovah mọ kpẹkpẹrẹẹtimi

Omịnị itu bolou bọọ kịmị kụrọ sei mịẹ bara naa daba, teeki mịẹ agbẹị emi a? Jehovah tụa Israel ibe pịrị oloko dii. Leviticus 5:1 goo.

Mị Bible goo yọ gbaa bara dii daba, itu bolou bọọ kịmị kụrọ sei mịẹ bara omịnị mọ naa daba, omịnị bịsẹ ye gbaa akị itu-kosuotubo pịrị. Anịa bịsẹ bara kị mịẹ agbẹị emi kpọ, bọlọụ, gbaa angọ nana ụbọ pịrị dá ụbọ mị bẹtịbị egberigbaa itu-kosuotubo pịrị. Ụbọ mị gbaaghaba, wó Jehovah mọ kpẹkpẹrẹẹ emi yọmị baratụa wó pịrị wẹrị egberi gbaa akị itu-kosuotu pịrị mịnị. Bịsẹ bara mịẹ emi yọmị tebara ka kị ị́mịnị . . .

• Jehovah mọ kpẹkpẹrẹẹ emi bara mịẹdịa mịnị a o?

• kụrọ sei mịẹ ụbọ tarị wẹrị emi bara mịẹdịa mịnị a o?

• itu bọọ zịnị otu tarị wẹrị emi bara mịẹdịa mịnị a o?

5. Opu Babylon duo serii

 KỊLỌỌBARA

Omịnị Jehovah mọ kpẹkpẹrẹẹtimi dọụ emi ifiesẹ, ụ mọ mọ́ kpẹkpẹrẹẹgha otubo mọ wẹnị gbelei kụmọ. Ikpé karịbụọ mọ gbelei kẹnịye kpọ mịẹgha fa.

Waị diitụa

• Tetuu kị duonị omịnị ikpé karịbụọ mịẹpaamọ dẹ yebo goo anịghakpọ dii agbẹịgha o?

• Omịnị tebara ka kị gesii duo korodẹ kịmịbo mọ inyenrin agbẹị emi a o?

• Omịnị tebara ka kị ikpé karịbụọ duo serii berifaan yebị kẹrị akị wẹrị emi bara mịẹdịa a paa emi a o?