Saan nga ipalubos dagiti pudno a Kristiano nga adda aniaman wenno asinoman a mangdadael iti relasionda ken Jehova. Sigurado a kasta ti marikriknam. Ipatpateg ni Jehova ti kinamatalekmo. (Basaen ti 1 Cronicas 28:9.) Ania dagiti situasion a mabalin a mangsubok iti kinamatalekmo kenkuana, ken ania ti makatulong kenka?

1. Kasano a mabalin a suboken ti dadduma ti kinamatalektayo ken Jehova?

Adda dagiti mangpadpadas a mangpasardeng kadatayo nga agserbi ken Jehova. Siasino dagiti mangar-aramid iti dayta? Dadduma a nangpanaw iti kinapudno ti mangibagbaga kadagiti kinaulbod maipapan iti organisasion ti Dios tapno madadael ti pammatitayo. Maaw-awaganda iti apostata. Dadduma met a lider ti relihion ti agiwarwaras kadagiti ulbod nga impormasion maipapan kadatayo tapno panawan dagiti adipen ni Jehova ti kinapudno a dida madmadlaw. Delikado ti makidebate kadagiti bumusbusor, agbasa kadagiti libro wenno blog-da, aglukat kadagiti website-da, wenno agbuya kadagiti video-da. Imbaga ni Jesus maipapan kadagidiay mangpadpadas a mangpasardeng kadagiti matalek nga agserserbi ken Jehova: “Bay-anyo ida. Bulsekda a mangidaldalan. No idalan ti bulsek ti padana a bulsek, matnagdanto iti abut.”​—Mateo 15:14.

Kasano no nagdesision ti maysa nga am-ammotayo a saannan a kayat ti agbalin a Saksi ni Jehova? Masaktantayo no aramiden dayta ti maysa a nadekket kadatayo. Baka pilitennatayo pay ketdi nga agpili: isuna wenno ni Jehova? Masapul a determinadotayo nga agtalinaed a matalek iti Dios. (Mateo 10:37) Isu a surotentayo ti bilin ni Jehova a ditay makikadua kadagiti kasta a tattao.​—Basaen ti 1 Corinto 5:11.

2. Ania dagiti personal a desision a mabalin a mangsubok iti kinamatalektayo ken Jehova?

Gapu ta ay-ayatentayo ni Jehova, saantayo a kayat nga adda aniaman a koneksiontayo iti ulbod a relihion. Saan koma a konektado iti ulbod a relihion ti trabahotayo, ti organisasion a nakimiembroantayo, wenno ti aniaman nga aktibidad nga ar-aramidentayo. Pakpakdaarannatayo ni Jehova: “Rummuarkayo [iti Babilonia a Dakkel], tattaok.”​—Apocalipsis 18:2, 4.

 AMMUEM TI AD-ADU PAY

3. Agannadka kadagiti ulbod a mannursuro

Ania ti aramidentayo no adda mangngegtayo a negatibo maipapan iti organisasion ni Jehova? Basaen ti Proverbio 14:15, sa pagsaritaan daytoy a saludsod:

• Apay a ditay koma patien ti amin a mangngegtayo?

Basaen ti 2 Juan 10, sa pagsaritaan dagitoy a saludsod:

• Kasano koma ti panangtratotayo kadagiti apostata?

• Uray no saantayo a direkta a makisarsarita kadagiti apostata, kasano a posible a maimpluensiaantayo latta kadagiti pannursuroda?

• Panagkunam, ania ngata ti marikna ni Jehova no patientayo dagiti negatibo nga ibagbagada maipapan kenkuana wenno iti organisasionna?

4. Agtalinaedka a matalek iti Dios uray makabasol ti maysa a kabsat

No maammuantayo a nakaaramid iti serioso a basol ti maysa a kabsat iti kongregasion, ania ti obligasiontayo? Kitaem ti maysa a prinsipio iti Linteg ti Dios para iti nagkauna nga Israel. Basaen ti Levitico 5:1.

Kas naibaga iti dayta a bersikulo, no naammuantayo a nakaaramid iti serioso a basol ti maysa, masapul nga ibagatayo ti ammotayo kadagiti panglakayen. Ngem sakbay nga aramidentayo dayta, nasayaat no kombinsirentayo ti nakabasol nga isu a mismo ti mangipudno iti basolna kadagiti panglakayen. No saanna nga aramiden dayta, matalektayo ken Jehova no ibagatayo kadagiti panglakayen ti ammotayo. No aramidentayo dayta, kasano nga ipakpakitatayo ti napudno nga ayattayo . . .

• ken Jehova a Dios?

• iti nakabasol?

• kadagiti kakabsat iti kongregasion?

 5. Rummuarkayo iti Babilonia a Dakkel

 SUMARIO

Tapno agtalinaedtayo a matalek ken Jehova, saantay a makikadua kadagiti saan a matalek kenkuana. Masapul met a naan-anay a panawantayo ti ulbod a relihion.

Rebiu

• Apay a ditay koma agbuya, agbasa, wenno dumngeg iti ideya dagiti apostata?

• Kasano koma ti panangtratotayo kadagidiay saanen a mayat nga agbalin a Saksi ni Jehova?

• Kasanotayo a masurot ti pakdaar nga umadayotayo iti ulbod a relihion?