Kristiẹn ọsaje wo muegbe nin ele rẹ sun rẹkhan iJehova. Ele bha guanọ nin emhin soso la ọria soso riia ikolu nin ele bi Jehova ko mhọnlẹn an. Mhan lẹnmhin ghe, ọkhọle nọn sẹriọ uwẹ yẹ mhọnlẹn. Ọ manman ti Jehova bhọ sade uwẹ sun rẹkhan ọlẹn. (Tie 1 Chronicles 28:9.) Be hi emhin eso ne ha sabọ re ọle nọghọ uwẹ rẹ sun rẹkhan iJehova? Be uwẹ ha rẹ sabọ khọn miotọ yẹ bhi ene emhin nan?

1. Be emhin nin eria ebhebhe lu ha rẹ sabọ dọnmhẹn asun-rẹkhan nọnsẹ yẹ?

Ẹbho eso dẹ ha guanọ nin ele si mhan sibhi oga nọnsi Jehova re. Eria nela ha sabọ lu emhin nọn sẹriọ? Ẹbho ne de sibhi oga re. Ele sabọ ha bha ohoghe rẹ riia elin ọsi agbotu nọnsi Jehova a, beji ele ha da wẹghẹ urẹọbhọ nọnsẹmhan an. Ene mun ọkalo bhi otuẹ ohoghe sabọ yẹ ha bha ohoghe rẹ riia elin ọsi agbotu a. Ahamiẹn mhan bha mhọn ẹwanlẹn, ene ohoghe nan sabọ rẹ mhan sibhi oga nọnsi Jehova re. Ọ iyi emhin ẹwanlẹn nin mhan rẹ ne eria ne sẹnian ha gbugan. Ọ bha yẹ khẹke nin mhan ha tie ebe nesele, fẹ wẹbsaiti nọnsele ghe, la ghe ividio nin ele lu. Ẹghe nin Jesu rẹ tẹmhọn ene eria nan ne guanọ nin ele si ẹbho sibhi oga nọnsi Jehova re, ọle da yọle: “Fi ele ehọ a. Eman-odẹ ne idaghe ele khin. Ahamiẹn ọruẹlo man ọruẹlo odẹ, ele veva ki de ọbhi uhio.”​—Matthew 15:14.

Ahakimiẹn ọria nọn manman sikẹ mhan yọle ghe, ọle iyẹ da ga iJehova kii? Emhin nọn sẹnian dẹ wo manman ba mhan bhi egbe. Ọne ọria sabọ yẹ yọle ghe, ahamiẹn mhan bha zẹ iJehova obọ, ọsẹmhan bi ọsọle fo. (Matthew 10:37) Jehova ọkhẹke nin mhan hoẹmhọn ọlẹn gbera ọria nọn hi ki rẹ khin. Ọle mhan ha hẹnmhọn nan. Bhiriọ, beji ọle tale, mhan ida yẹ ha deba eria ne sẹriọ muobọ.​—Tie 1 Corinthians 5:11.

2. Emhin nela mhan ha rẹban nin mhan rẹ rẹman ghe ibo nọnsi Jehova mhan ye?

Ranmhude oyẹẹ nin mhan mhọn da iJehova, mhan ida re obọ bhi emhin soso nọn diẹn mun oga ohoghe. Bhiriọ, mhan ida wẹnna nin otu ohoghe la deba otu nọn hi ki rẹ khin nin ele da mhọn obọ. Jehova sekha nin mhan yọle: ‘Ẹbho nesẹmhẹn, bha sibhi ẹwẹ iBabylon Nọn Khua re.’​—Revelation 18:2, 4.

 MANMAN LẸN OTỌLE NỌNSẸN

3. Rẹban ẹbho ne man ohoghe

Be ọkhẹke nin mhan rẹ lu emhin yẹ sade mhan họn ghe, ẹbho ta ọta nọn imhẹn rẹji agbotu nọnsi Jehova? Tie Proverbs 14:15, bha ha zilo nyan ọne inọnta nan:

• Bezẹle nọn ida yi emhin ẹwanlẹn nin mhan rẹ wo ha rẹọbhi emhin rebhe nin mhan họn?

Tie 2 John 10, bha ha zilo nyan ene inọnta nan:

• Be ọkhẹke nin mhan rẹ ha ne eria ne de sibhi oga re lu emhin yẹ?

• Uwedẹ nela mhan ha rẹ sabọ ha re ehọ bhi iman-emhin ọsi eria ne de sibhi oga re, aharẹmiẹn mhan bha miẹn ele ẹlo?

• Be uwẹ riale ọ dẹ dia iJehova bhi egbe yẹ, sade mhan re ehọ bhi emhin nọn imhẹn nin ẹbho ta rẹji ọle la agbotu nọnsọle?

4. Ahamiẹn ọria bhi ẹkẹ agbotu lu emhin ebe, rẹman ghe, Jehova uwẹ sun rẹkhan

Be ọkhẹke nin uwẹ lu yẹ sade uwẹ hẹnmhọn emhin ebe nin ọria bhi ẹkẹ agbotu lu, la, ẹlo uwẹ sẹbhi ọne emhin ebe nin ọle lu? Ji mhan fẹ adia ọkpa nin Osẹnobulua re nin ibhokhan Izrẹl ghe. Tie Leviticus 5:1.

Beji Jehova tale bhi ọne ulọnlẹn nan, ahamiẹn mhan lẹn ghe, obhio mhan bhi agbotu lu emhin ebe nọn kaka, ọkhẹke nin mhan taman ene ewanlẹn. Ọkuẹsẹ mhan taman ene ewanlẹn, ọ dẹ ha mhẹn sade mhan ka taman ọne ọria nin ọle tobọle bu ene ewanlẹn dọ taman ele. Ahamiẹn ọle bha lu iriọ, ọkhẹke nin mhan tobọmhan bu ene ewanlẹn dọ taman ele. Ọnan dẹ rẹman ghe, Jehova mhan sun rẹkhan. Ahamiẹn mhan re obọ rẹkhan ọne adia nan, be ọ ha rẹ rẹman yẹ ghe mhan hoẹmhọn . . .

• Jehova?

• ọne ọria nọn lu ọne emhin ebe?

• ibhio mhan nekẹle ne ribhi agbotu?

 5. Ne obọ sibhi emhin ne rẹtẹ oga ohoghe re sẹsẹsẹ

 EBI MHAN LUẸLE

Nin mhan rẹ sun rẹkhan iJehova, ọkhẹke nin mhan rẹban eria ne sibhi ibo nọnsi Jehova re. Ọ yẹ khẹke nin mhan re egbe sibhi oga ohoghe re sẹsẹsẹ.

Uwẹ Be Yẹ Yere?

• Bezẹle nọn bha da khẹke nin mhan ha kaehọ eria ne de sibhi oga re, tie ebe nọnsele, la ghe ividio nin ele lu?

• Ahamiẹn ọria yọle ghe, ọle iyẹ ho nin ọle ha yi ọkpa bhi Esali Jehova, be ọkhẹke nin mhan rẹ ha nanlẹn lu emhin yẹ?

• Be imhan ha rẹ rẹman yẹ ghe, mhan sibhi oga ohoghe re, beji Jehova yọle nin mhan lu?