UWUHRẸ AVỌ 58
Talamu Jihova Ẹsikpobi
Ileleikristi uzẹme a gba riẹ mu nọ a rẹ kẹ oware ovo hayo ohwo ọvo uvẹ re o ru ai siọ Jihova ba ẹgọ họ. U mu omai ẹro nọ ere o rrọ kẹ owhẹ re. O were Jihova gaga inọ whọ gba riẹ mu nọ whọ rẹ talamu ei. (Se 1 Iruẹru-Ivie 28:9.) Eme ọ sai ru ei bẹbẹ kẹ owhẹ re whọ talamu Jihova? Kọ eme ọ rẹ sai fiobọhọ kẹ owhẹ?
1. Ẹvẹ ahwo jọ a sai ro ru ei bẹbẹ kẹ omai re ma talamu Jihova?
Ahwo jọ a rẹ gwọlọ ru omai re ma siọ Jihova ba ẹgọ. Amono a rẹ gwọlọ ru oware uyoma utioye na? Ahwo jọ nọ a kie no ukoko Ọghẹnẹ no a rẹ ta erue kpahe ukoko na re a ruẹse raha ẹrọwọ mai. A re se ahwo nana enọ e siọ orọwọ na no. U te no ere no, isu egagọ jọ a rẹ ta erue sa-sa kpahe omai, re a viẹ enọ i rri otọ mu hu họ no uzẹme na no. U woma vievie he re ma lele ahwo nọ a be wọso uzẹme na vro avro, se ebe rai hayo eware nọ a kere fihọ itanẹte, hayo re ma rri ividio nọ a ru. Jesu ọ ta kpahe ahwo nọ a rẹ gwọlọ ru amọfa re a siọ Jihova ba ẹgọ inọ: “Wha kpairoro vrẹ rai. Isu ituaro a rrọ. Otẹrọnọ ohwo otuaro o te bi su ohwo otuaro, aimava a re kie ruọ ọgọdọ.”—Matiu 15:14.
Kọ otẹrọnọ ohwo jọ nọ ma riẹ ọ ta nọ ọ gbẹ gwọlọ jọ omọvo Isẹri Jihova ha? Nọ ohwo nọ ọ kẹle omai o te ru oware utioye, o rẹ kẹ uye gaga. Ohwo na ọ sae gwọlọ gba omai họ re ma salọ abọ ohwo nọ ma rrọ, sọ ọyomariẹ hayo Jihova. Ma rẹ gbaemu nọ abọ Ọghẹnẹ ma rẹ jọ orọnikọ abọ ohwo-akpọ jọ họ. (Matiu 10:37) Fikiere ma rẹ gbẹ nya usu kugbe ahwo otiọye na ha wọhọ epanọ Jihova o jie uzi kẹ omai.—Se 1 Ahwo Kọrint 5:11.
2. Eware jọ vẹ ma rẹ jọ jiroro kẹ omobọ mai nọ i re dhesẹ sọ ma talamu Jihova?
Ma te you Jihova, ma re ru oware ovuovo nọ u wobọ kugbe egagọ erue he. Ma re ru iruo hayo jọ oghẹrẹ egwae jọ nọ i wobọ kugbe egagọ erue he, hayo oware ofa jọ kpobi nọ ma bi ru. Jihova ọ vẹvẹ omai unu nọ: “Wha no eva [Babilọn Ologbo na] no, ahwo mẹ.”—Eviavia 18:2, 4.
GBE WUHRẸ EWARE EFA
Wuhrẹ epanọ whọ gbẹ rọ kẹ ohwo ọvo uvẹ hẹ re o ru nọ whọ gbẹ rọ talamu Jihova ha. Gbe epanọ who re ro no Babilọn Ologbo na, whọ vẹ rọ ere dhesẹ nọ abọ Jihova whọ rrọ.
3. Yọroma kpahe ahwo nọ a re wuhrẹ iwuhrẹ erue
Eme ma re ru nọ ahwo a tẹ be ta ikpehre eme kpahe ukoko Jihova? Se Itẹ 14:15, kẹsena wha vẹ ta ẹme kpahe onọ nana:
-
Fikieme ma gbẹ rọ rọwo ẹme kpobi nọ ma yo ho?
Se 2 Jọn 10, kẹsena wha vẹ ta ẹme kpahe enọ nana:
-
Ẹvẹ u fo nọ ma re ru ahwo nọ a siọ orọwọ na no?
-
O tẹ make rọnọ ma bi lele ahwo nọ a siọ orọwọ na no ta ẹme ovao dhe ovao ho, oghẹrẹ vẹ ma sae rọ ruẹ iwuhrẹ rai ghele?
-
Ẹvẹ who roro nọ Jihova o ti rri rie nọ ma tẹ be gaviezọ kẹ ikpehre eme nọ a be ta kpahe ọyomariẹ gbe ukoko riẹ?
4. Talamu Ọghẹnẹ nọ oniọvo jọ ọ tẹ raha uzi
Nọ ma tẹ riẹ nọ ohwo jọ evaọ ukoko na ọ thọ uzi ulogbo jọ, eme ọ gba omai họ nọ ma re ru? Rri oware jọ nọ ma rẹ sai wuhrẹ evaọ uzi nọ Ọghẹnẹ ọ kẹ ahwo Izrẹl oke anwae. Se Iruo-Izerẹ 5:1.
Wọhọ epanọ oria Ebaibol yena o ta na, nọ ma tẹ riẹ nọ ohwo jọ ọ thọ uzi ulogbo jọ, ma rẹ vuẹ ekpako na oware nọ ma riẹ. Rekọ taure ma tẹ te vuẹ ekpako na, o mai woma re ma kake ta kẹ ohwo nọ ọ thọ uzi na inọ ọye ọvo ọ nyae feva uzioraha riẹ kẹ ekpako na. O gbe ru ere he, ma vẹ nyae vuẹ ekpako na oware nọ ma riẹ, enẹ ma re ro dhesẹ nọ ma talamu Jihova. Ẹvẹ onana u re ro dhesẹ nọ ma wo uvi uyoyou kẹ . . .
-
Jihova Ọghẹnẹ?
-
ohwo nọ ọ raha uzi na?
-
amọfa evaọ ukoko na?
Otẹrọnọ oniọvo jọ o te ru oware nọ o thọ, fiobọhọ kẹe!
5. Kẹnoma kẹ Babilọn Ologbo na
Se Luk 4:8 gbe Eviavia 18:4, 5, kẹsena whọ vẹ kẹ uyo enọ nana:
-
Kọ odẹ mẹ o gbẹ rrọ evaọ egagọ erue jọ?
-
Kọ mẹ rrọ utu hayo ẹgwae jọ nọ o wobọ kugbe egagọ ọfa?
-
Kọ iruo mẹ i bi fiobọhọ kẹ egagọ erue evaọ edhere jọ?
-
Kọ u wo eware efa jọ evaọ uzuazọ mẹ nọ o jọ gwọlọ nọ mẹ kẹnoma kẹ egagọ erue?
-
Otẹrọnọ Ee me yo evaọ onọ jọ, eme o gwọlọ nọ me re nwene evaọ uzuazọ mẹ?
Oghẹrẹ kpobi nọ o rrọ kẹhẹ, jiroro nọ e te lẹliẹ owhẹ wo obruoziẹ-iroro ọfuafo je dhesẹ nọ whọ talamu Jihova.
Eme who ti ru nọ a tẹ vuẹ owhẹ nọ whọ zọhọ ugho kẹ egagọ jọ nọ e gwọlọ fiobọhọ kẹ ahwo?
AHWO JỌ A RẸ TA NỌ: “U fo nọ mẹ rẹ riẹ oware nọ ahwo nọ a siọ orọwọ na no a be ta kpahe Isẹri Jihova re mẹ sae thọ uzẹme na.”
-
Kọ u woma re a ru ere? Fikieme whọ rọ ta ere, hayo kọ fikieme who gbe ro roro ere he?
EME WHO WUHRẸ NO?
Re ma sae talamu Jihova, ma rẹ whaha usu nọ ma rẹ nya kugbe ahwo nọ a siọ Jihova no. Ma re je siomano egagọ erue riẹriẹriẹ.
Ọkiẹkpemu
-
Fikieme ma gbe ro rri, se, hayo gaviezọ kẹ eme ahwo nọ a siọ orọwọ na no ho?
-
Ẹvẹ u fo nọ ma re ru ahwo nọ a gbẹ gwọlọ jọ Isẹri Jihova ha?
-
Ẹvẹ ma sai ro ru lele unuovẹvẹ nọ o ta nọ ma dhẹ no egagọ erue no na?
KIẸ KPAHE EFA
Se kpahe oware nọ who re ru nọ amọfa a tẹ be ta eme erue kpahe Isẹri Jihova.
“Kọ Whọ Riẹ Uzẹme Oware nọ O Via na Gbagba?” (Uwou-Eroro Na, Aria 2018)
Ẹvẹ whọ sae rọ riẹ sọ egwae, itu, hayo iruẹru jọ e be tha Babilọn Ologbo na uke?
“Wo Ọwhọ kẹ Iruo na Evaọ Abọ Urere ‘Edẹ Urere Na’” (Uwou-Eroro Na, Akpe 2019, edhe-ẹme avọ 16-18)
Eme ahwo jọ nọ a be wọso uzẹme na a ru no re a sai whrehe ẹrọwọ mai?
Jọ iku nọ uzoẹme riẹ o rrọ “No Anwọ Emaha Ze Mẹ be rọ Gwọlọ Ọghẹnẹ,” se kpahe ozerẹ egagọ Shinto jọ nọ o no egagọ erue.
“Ebaibol na O re Nwene Uzuazọ Ohwo” (Uwou-Eroro Na, Akpe 1, 2011)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
