Di wan dem we a chuu Kristiyan naa go eva mek notn ar nobadi tap dem fram worship Jeuova. An wi nuo se a so yu fiil tu. Wen Jeuova si ou yu a wok aad fi stik tu im, dat a sitn we riili mek im api. (Riid 1 Kranikl 28:9.) Bot wa a som a di sitn dem we kyan mek it aad fi yu stik tu Jeuova, an wa kyan elp yu fi nuo wa fi du wen dem sitn de apm?

1. Wa a som tingz we ada piipl mait-a du we kyan tes fi si ef wi riili a-go stik tu Jeuova?

Yu av som piipl we a-go wok aad fi du aal kain-a tingz fi mek wi tap sorv Jeuova. A uu a dem piipl de? Dem a di wan dem we tap sorv Jeuova an a tel wan bag a lai bout Gad an di piipl dem we a sorv im, kaaz dem waahn wi fi tap chos iina im. Plos yu av som choch liida we tel wan bag a lai we chrik op chrik op som piipl an mek dem tap sorv Jeuova tu. Wi no fi av notn fi du wid di piipl dem we a se bad tingz bout Jeuova an di piipl dem we a sorv im. Wi no fi riid dem buk, ar go pan di intanet go riid notn we dem rait, ar wach no vidiyo we dem mek niida. Wen Jiizas did a taak bout di wan dem we eva a du tingz fi mek piipl no stik tu Jeuova, im did se: “Lou dem, mek dem gwaan. Dem a blain piipl we a liid blain piipl. Ef blain a liid blain, di tuu a dem no boun fi jrap iina uol?”​—Matyu 15:14.

Supuoz sumadi we wi nuo mek op dem main fi tap sorv Jeuova? Wi nuo se wen sumadi we wi lov du sitn laka dis it riili pien wi aat, an da sumadi de mait-a waahn wi fi pik dem uova Jeuova. Bot wi afi mek op wi main se wi a-go stik tu Jeuova no mata wa. (Matyu 10:37) So dat miin se wi a-go du we Jeuova se wi fi du an wi naa go av notn fi du wid da sumadi de.​—Riid 1 Korintiyan 5:11.

2. Ou di sitn dem we wi mek op wi main fi du kyan mek wi si ef wi riili a stik tu Jeuova?

Wen wi lov Jeuova, dat miin se wi naa go av notn fi du wid di rilijan dem we naa worship Gad di rait wie. So di wok we wi du, eni gruup we wi jain, ar eniting at aal we wi a du, no fi av notn fi du wid di rilijan dem we naa worship Gad di rait wie. Jeuova did don waan wi se: “Kum outa [Powaful Babilan] mi piipl.”​—Revilieshan 18:2, 4.

 LORN SOM MUO

3. Wach out fi di faalz tiicha dem

Ef wi ier piipl a taak bad tingz bout Jeuova piipl dem an di wie ou tingz a ron mongks dem, wa wi fi du? Riid Pravorbz 14:15, an den wi a-go taak bout da kwestiyan ya:

• Wa mek wi no fi kwik fi biliiv evriting we wi ier piipl a se?

Riid 2 Jan 10, an den wi a-go taak bout dem kwestiyan ya:

• Ou wi fi diil wid di wan dem we yuus tu sorv Jeuova bot nou dem a tel bie lai bout im an im piipl?

• Iivn ef wi naa chat tu dem piipl de, ou wi kyan a stil tek iin di sitn dem we dem a tiich?

• Ou yu tingk Jeuova wuda fiil ef im si wi a lisn tu di bad sitn dem we piipl a se bout im ar im piipl dem?

4. Wen wan a wi breda ar sista dem du sitn riili bad, wi fi shuo se a Jeuova wi a stik tu

Ef wi get fi fain out se sumadi iina di kanggrigieshan du sitn riili bad, wa wi fi du? Mek wi luk pan sitn we wi kyan lorn fram di Laa we Gad did gi di Izrelait dem bak iina Baibl taim. Riid Livitikos 5:1.

Bies pan da vors de, ef wi fain out se sumadi du sitn riili bad wi fi tel di elda dem bout it. Bot bifuo wi du dat, it wuda gud ef wi tel di sumadi fi go tel di elda dem bout di sitn we dem du. Bot ef dem no dwi’it, wi fi shuo se a Jeuova wi a stik tu an go tel di elda dem. Wen wi du dis, ou wi shuo se wi lov an a stik tu . . .

• Jeuova Gad?

• di sumadi we du di bad sitn?

• di ada breda an sista dem iina di kanggrigieshan?

 5. No av notn fi du wid Powaful Babilan

 DIS A WA YU FI MEMBA

Ef wi waahn fi stik tu Jeuova no mata wa, wi afi kip we fram di wan dem we naa stik tu im. An wi no fi av notn fi du wid di rilijan dem we naa worship Gad di rait wie.

Wa yu did lorn iina da lesn ya?

• Di wan dem we tap sorv Jeuova an nou dem a tel bie lai pan im an im piipl dem, wa mek wi no fi wach, riid ar lisn tu notn we dem av bout di plies?

• Ou wi fi diil wid di wan dem we tap sorv Jeuova?

• Ou wi kyan shuo se wi no av notn fi du wid di rilijan dem we naa worship Gad di rait wie?