Jet ai Hkristan ni gaw, Yehowa hpe nawku ai lam kaw na shai mat shangun chye ai hpa lam hpe mung, kadai hpe mung ahkang n jaw ai. Nang mung dai zawn rai na re. Na a sadi dung ai lam hpe Yehowa manu shadan ai. (1 Hkawhkam Labau 28:9 hpe hti u.) Shi hpe sadi dung ai lam hpe gara masa gaw yak shangun chye ai kun? Dai hpe gara hku hparan lu na kun?

1. Yehowa hpe sadi n dung mat hkra kaga ni gara hku galaw chye ai kun?

Yehowa hpe anhte n nawku mat hkra, masha nkau shakut chye ai. Dai zawn n kaja ai lam ni hpe kadai galaw nga ai kun? Tengman lam kaw na pru mat ai masha nkau gaw, anhte a makam masham hpe jahten na matu, Karai a uhpung hte seng ai lam hpe masu tsun ma ai. Shanhte gaw hpung htak ai ni re. Sadi maja ai lam n nga ai ni tengman lam kaw na pru mat hkra, nawku htung ningbaw nkau gaw anhte hte seng nna masu ga ni tsun ma ai. Ninghkap ai ni hte dangrang hkat ai, shanhte a laika ni hti ai, website ni, video ni hpe yu ai gaw shoihpa nga ai. Yehowa hpe sadi n dung mat hkra galaw ai ni hte seng nna Yesu ndai hku tsun ai: “Shanhte gaw nga nga mu ga: myi kyaw ninglen lam madun ai ni rai nga ma ai: myi kyaw ai wa gaw, myi kyaw wa hpe lam madun a taw gaw, shan lahkawng gaw nhkun kata de hkrat na ma ra ai.”​—Mahte 15:14.

Anhte chye ai marai langai ngai gaw, Yehowa Sakse n kam galaw sai ngu dawdan yang gara hku kun? Anhte hku hkau ai ni dai zawn dawdan yang, grai myit n pyaw na re. Dai wa gaw, shi hpe lata na kun? Yehowa hpe lata na kun? ngu nna shadut chye ai. Yawng mayawng hta na Karai Kasang hpe sadi dung na matu dawdan da ra ai. (Mahte 10:37) Anhte gaw Yehowa a ga madat mayu ai majaw, shanhte hte kanawn mazum sana n re.​—1 Korinhtu 5:11 hpe hti u.

2. Gara dawdan lam ni gaw Yehowa hpe sadi n dung ai lam madun ai kun?

Yehowa hpe tsawra ai myit gaw, shut shai ai nawku htung hta n lawm na matu shadut ya ai. Anhte a bungli, anhte lawm nga ai uhpung, galaw ai lam yawng gaw, shut shai ai nawku htung hte n mai matut mahkai ai. Yehowa ndai hku sadi jaw da ai: “Nye a amyu masha ni e, . . . [Galu kaba ai Babelon] kaw na pru wa mu.”​—Shingran 18:​2, 4.

 Kahtap Hkaja

3. Shut ai hku sharin ya ai ni hpe sadi u

Yehowa a uhpung hte seng nna n kaja ai shiga ni na ai shaloi, gara hku bai htang ging ai kun? Ga Shagawp 14:15 hpe hti nna, ndai ga san hpe bawngban u:

• Na mana yawng hpe hpa majaw n kam ging ai kun?

2 Yawhan 10 hpe hti nna, ndai ga san ni hpe bawngban u:

• Hpung htak ai ni hpe gara hku kanawn mazum ging ai kun?

• Hpung htak ai ni hte dingtawk n matut mahkai tim, shanhte a sharin achyin ai lam de gara hku du mat chye ai kun?

• Yehowa (sh) shi a uhpung hte seng nna n kaja ai hku tsun ai hpe, anhte madat ai nga yang shi gara hku hkamsha na kun?

4. Hpunau langai mara galaw ai shaloi Karai Kasang hpe matut sadi dung u

Nawku hpung kaw na marai langai mara kaba galaw da ai hpe chye yang, anhte hta hpa galaw ra na lit nga ai kun? Moi Israela ni hpe jaw ai Karai A Hkang Da Ai Tara kaw na npawt tara langai hpe hkaja yu ga. Jaw Jau 5:1 hpe hti u.

Ndai Chyum daw hta tsun da ai hte maren, marai langai mara kaba galaw da ai hpe chye yang, myitsu salang ni hpe tsun dan ging ai. Raitim shawng nnan, shut ai lam galaw ai wa hpe myitsu salang ni hpang de sa nna, mara hpe yin la na matu n-gun jaw ging ai. Shi n galaw ai nga yang, anhte chye da ai lam hpe myitsu salang ni hpe tsun dan ai hku nna, Yehowa hpe sadi dung ai lam madun mai ai. Dai hku galaw ai gaw . . .

• Yehowa Karai Kasang hpe sadi dung ai lam gara hku madun ai kun?

• mara galaw ai wa hpe tsawra ai lam gara hku madun ai kun?

• nawku hpung kaw na ni hpe sadi dung ai lam gara hku madun ai kun?

 5. Galu Kaba ai Babelon kaw na pru u

 Kadun Dawk

Yehowa hpe sadi dung lu hkra, shi hpe sadi n dung ai ni hte kanawn mazum ai lam hpe koi ra ai. Shut shai ai nawku htung hte mung tsep kawp san san nga ra ai.

Bai Maram

• Hpung htak ai ni a myit mang lam hpe, hpa majaw n yu, n hti, n madat ging ai kun?

• Yehowa Sakse n kam galaw sai ni hpe anhte gara hku kanawn mazum ging ai kun?

• Shut shai ai nawku htung kaw na pru u ngu ai sadi jaw ga hpe gara hku madat mai ai kun?