ĨSOMO YA 58
Lũmanyʼa na Yeova
Aklĩsto ma wʼo methĩawa matwʼĩte kũlea kwĩtĩkĩlya kĩndũ kana mũndũ o na wĩva anange ngwatanĩo yoo nzeo vamwe na Yeova. Na vate nzika o naku ũu nĩwʼo ũtwʼĩte. Manya kana Yeova nũtanĩthawʼa mũno nĩ ũĩkĩĩku waku. (Soma 1 Mavinda 28:9.) Nĩ maũndũ ta meva matonya kũtata ũĩkĩĩku waku kũla kwĩ Yeova, na ũtonya kũmathĩnĩkĩa ata?
1. Andũ angĩ matonya kũtata ũĩkĩĩku witũkũla kwĩ Yeova ata?
Andũ amwe no matate kũtũsiĩĩa tũeke kũmũthũkũma Yeova. Nũũ ũtonya kwenda kwĩka ũndũ ũsu ũthũkĩte ũu? Andũ amwe ala matiie ũwʼo nĩmaneenaa maũndũ ma ũvũngũ ĩũlũ wa ũseũvyo wa Ngai nĩ kana mamine mũĩkĩĩo witũ. Andũ asu metawa akaĩi ma mũĩkĩĩo. O na ĩngĩ, atongoi amwe ma ndĩni nĩmanyaĩĩkasya ũvoo ũte wa wʼo ĩũlũ witũ nĩ kana ala me na nzika matie ũwʼo. Tweetĩkĩla kũea ngewa na andũ ta asu, twasoma mavuku moo kana ĩũlũ woo Indanetinĩ, kana tweeloela vitio syoo, nĩtũtonya kwĩlikya mũisyonĩ mũnene mũno. Yesũ aineena ĩũlũ wa ala matataa kũtũla angĩ ngoo nĩ kana maeke kũmũthũkũma Yeova, aisye atĩĩ: “Ekanai namo. Nĩ atongoi ilalinda. Na ĩndĩ ethĩwa kĩlalinda kĩkatongoesya kĩngĩ, elĩ makalika ĩimanĩ.”—Mathayo 15:14.
2. Nĩ motwi ta meva tũtonya kwĩka makatata ũĩkĩĩku witũ kũla kwĩ Yeova?
Wendo witũ kũla kwĩ Yeova ũkatũsukumaa tũikethĩwe twĩ ngwatanĩo kwa nzĩa o na yĩva na ndĩni ya ũvũngũ. Kwoou, wĩa ũla tũthũkũmaa, ikundi ila tũũnyuva kwĩthĩwa ngwatanĩo nasyo, kana ũndũ o na wĩva ũla tũkwĩka, ndwaĩlĩte kwĩthĩwa ũkonanĩtye na ndĩni ya ũvũngũ. Yeova atũkanĩtye atĩĩ: “Umai nthĩnĩ [wa Mbaviloni Ĩla Nene], andũ makwa.”—Ũvuanyʼo 18:2, 4.
ĨMANYĨSYE MŨNANGO
Ĩmanyĩsye wone ũndũ ũtonya kũsiĩĩa mũndũ o na wĩva ndakonzye ũĩkĩĩku waku kũla kwĩ Yeova. O na ĩngĩ sisya wone ũndũ ũtonya kwonanyʼa kana nũlũmanĩtye na Yeova kwa kuma nthĩnĩ wa Mbaviloni Ĩla Nene.
3. Ĩvathane na alimũ ma ũvũngũ
Twaĩlĩte kwĩka ata yĩla tweewʼa ngewa ite sya wʼo ĩũlũ wa ũseũvyo wa Yeova? Somai Nthimo 14:15, na ĩndĩ mũineenea ĩkũlyo yĩĩ:
-
Nĩkĩ twaĩlĩte kwĩthĩwa twĩ metho tũikaĩkĩĩe maũndũ onthe ala tweewʼa?
Somai 2 Yoana 9-11, na ĩndĩ mũineenea makũlyo aa:
-
Twaĩlĩte kũmonaa ata akaĩi ma mũĩkĩĩo?
-
O na ethĩwa tũineenaa namo ĩmwe kwa ĩmwe, nĩ kwa nzĩa syĩva tũtonya kũvulana namo?
-
Wĩona Yeova ta ũtonya kwĩwʼa ata tweethukĩĩsya ndeto ite sya wʼo ĩũlũ wake kana ũseũvyo wake?
4. Lũmanyʼa na Ngai yĩla mwana-a-asa weeka naĩ
Twamanya kana kĩkundinĩ ve mũndũ wĩkĩte naĩ ngito, twaĩlĩte kwĩka ata? Kwasũanĩa mwolooto wĩ nthĩnĩ wa ĩla mĩao Ngai wanengete mbaĩ ya tene ya Isilaeli. Somai Alivai 5:1.
O tondũ mũsoa ũsu woonanyʼa, twamanya kana ve mũndũ wĩkĩte naĩ ngito, twaĩlĩte kũtavya atũmĩa o kĩla twĩsĩ. Ĩndĩ o na vailye ũu, tũtanamba kwĩka ũu, wĩthĩwa wĩ ũndũ wa wendo mũno kwamba kũneena na ũla wĩkĩte naĩ ĩsu athi akone atumĩa newe mwene na ayumbũla naĩ yake. Ĩndĩ alea kwĩka ũu, ũĩkĩĩku witũ kũla kwĩ Yeova nĩwaĩle kũtũsukuma tũthi kũla kwĩ atumĩa na kũmaelesya o kĩla twĩsĩ. Kwĩka ũu kwĩonanyʼa ata wendo na ũĩkĩĩku witũ kwa . . .
-
Yeova Ngai?
-
ũla wĩkĩte naĩ?
-
ala angĩ kĩkundinĩ?
Ethĩwa mwana-a-asa kana mwĩĩtu-a-asa nĩwakwatwa nĩ thĩna, mũtetheesye!
5. Ĩvathane vyũ na Mbaviloni Ĩla Nene
Somai Luka 4:8 na Ũvuanyʼo 18:4, 5, na ĩndĩ mũisũngĩa makũlyo aa:
-
Ndĩninĩ ĩla nĩnaendaa nĩmesĩ vyũ kana yu ndi ũmwe woo?
-
Nĩvatonyeka ngethĩwa nĩ nthĩnĩ wa kĩkundi kana ũseũvyo ũkonanĩtye na ndĩni ĩngĩ?
-
Nĩvatonyeka wĩa ũla nthũkũmaa ũkethĩwa ũkwataa mbau ndĩni ya ũvũngũ kwa nzĩa o na yĩva?
-
Ve maũndũ angĩ thayũnĩ wakwa naĩle kwĩka nĩ kana nĩvathane vyũ na ndĩni ya ũvũngũ?
-
Ethĩwa ũsũngĩo nĩ ĩĩ, o na ethĩwa no ĩkũlyo yĩmwe katĩ wa asu, nĩ moalyũku meva naĩle kwĩka?
Maũndũnĩ onthe ala ũkwĩka, ĩkaa ũtwi ũũkũtia na wasya mũtheu wa ngoo, na ũkwonanyʼa kana nũlũmanĩtye na Yeova.
We ũtonya kwĩka ata ũkewa umye mbesa itetheesye ũndũnĩ mũna wa ndĩni?
ANDŨ AMWE MAASYA: “Nyie no nende kũmanya kĩla akaĩi ma mũĩkĩĩo maasya ĩũlũ wa Ngũsĩ sya Yeova nĩ kana nĩmanye ũndũ ndonya kũtetea ũwʼo.”
-
Ũsu nĩ woni wa ũĩ? Nĩkĩ wasũngĩa ũu?
KĨLA TWEEMANYĨSYA
Nĩ kana tũendeee kũlũmanyʼa na Yeova, no nginya twĩvathane na andũ ala matonya kũtwelelũkya.
Makũlyo ma Kũsyokeleela
-
Nĩkĩ tũtaĩlĩte kwĩthukĩĩsya ũvoo umanĩte na akaĩi ma mũĩkĩĩo?
-
Twaĩlĩte kwĩka ata twamanya kana mwana-a-asa nĩwĩkĩte naĩ ngito?
-
Tũtonya kwonanyʼa ata kana nĩtwĩwʼaa ũtao wa kuma vyũ ndĩninĩ ya ũvũngũ?
MAŨNDŨ ANGĨ MA KWĨMANYĨSYA
Soma wone ũndũ waĩlĩte kwĩka yĩla andũ angĩ manyaĩĩkya ũvoo wa ũvũngũ ĩũlũ wa Ngũsĩ sya Yeova.
“Ambaa Kũmanya Ũwʼo wa Maũndũ” (Mũsyaĩĩsya, Mwei wa 8, 2018)
Ũtonya kũmanya ata ethĩwa ikundi kana maũndũ angĩ nĩmakwete mbau Mbaviloni Ĩla Nene?
Akaĩi amwe ma mũĩkĩĩo mekĩte ata nĩ kana matate kwonzya mũĩkĩĩo witũ?
Ngewanĩ yĩ na kyongo, “Na- mbĩĩie Kwenda Kũmanya Ngai Kuma Nĩ Mũnini,” soma ĩũlũ wa mũthembi ũmwe wa ndĩni ya Shinto, ũla watiie ndĩni ya ũvũngũ.
“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 7, 2011)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
