THUTO 58
Dwilila u Thembeka mu na Jehova
Bakirisiti be malebeswa ba ka zwimisila kuti ba si amuchile kene ku lecha nngwe ku ba dzibila ku namata Jehova. To duma kuti ndiko se kwa u no zwiwa. Jehova u no tolela pezhugwi ku thembeka kuko. (Bala 1 Shingikalo 28:9.) I mamo api a nga thama kuti u si thembeke mu nli, ngono u nga mililana nawo chini?
1. Bangwe ba nga thama chini kuti ti si thembeke mu na Jehova?
Bangwe ba no ti dzibila ku shingila Jehova. Ndi yani u nga thama cha ka jalo? Bangwe ba ka lecha malebeswa, ba no leba manyepkhwa ne kwe gubungano le Ndzimu kuti ba chinye dumilo yedu. Ba no dangwa bafupatili. Kakale, batungamili be budumili ba no andamisa zibiso ye manyepkhwa ne kwedu ku thama kuti bangwe ba si nga lingisise zwithu kwazo ba leche malebeswa. Usi tongo nyanyaidzana ne ba si nga dumilane naswi, ku bala buka dzabo, ku ngina mu dzi-website dzabo, kene ku lingilila dzividiyo dzabo. Ha ku zha mu na ba no thama kuti bangwe ba nyalemoyo mu ku shingila Jehova, Jesu wa kati: “Mubaletje, mapofu e batungamili. Ha bhofu likweba bhofu limwe, wose anowila mu gomba.”—Matewu 15:14.
Ini cha ti nga thama ha nngwe wa ti no ziba a shalula kuti ha a cha shaka ku be nngwe we Bafakazi ba Jehova? I ngabe chingwe chi no hwisa zogwadza ha nngwe wa ti no hwanana naye e thama e jalo. Ichecho chi ngana chi ka ti patika ku shalula pakati kukwe na Jehova. Ta ka fanila ku zwimisila ku dwilila ti thembeka mu na Jehova koga. (Matewu 10:37) Ngono to tobela ndayilo ya Jehova ye kuti ti si tongo shingidzana ne bathu ba ka jalo.—Bala 1 Bakorinta 5:11.
2. I zwithu zwipi zwa ti no shalula zwi nga ti misa ku thembeka mu na Jehova?
Ku da Jehova kowo thama kuti ti si nginilile mu budumili gwe manyepkhwa. Hatizo fanila ku amuchila nshingo, kene ku nginilila mu makubungano kene zwingwe koga, zwi no amana ne budumili gwe manyepkhwa. Jehova u no ti kumbuludza kuti: “Bhudani munli [Bhabhiloni Nkulu], bathu bangu.”—Zumbunulo 18:2, 4.
ZWIDIYE KWA KA NGINILILA
Zwidiye se kwa u nga lamba ku amuchila bose ba nga thama kuti u si thembeke mu na Jehova. Kakale bona se kwa u nga thembeka ha u buda mu Bhabhiloni Nkulu.
3. Zwithokomele mu badiyi be manyepkhwa
Ta ka fanila ku zwibata chini ha ti hwa zwithu zwi sa ka lulwama ne kwe gubungano la Jehova? Bala Zwiani 14:15, mu be mu lebesana ne kwe buzo i no tobela:
-
Ini ti sa ka fanila dumila chingwe ne chingwe cha ti no hwa?
Bala 2 Johani 10, mu be mu lebesana ne kwe buzo dzi no tobela:
-
Ta ka fanila ku bata ba ka fupatila Ndzimu chini?
-
Nenguba ti si nga shingidzane ne ba ka fupatila Ndzimu, ti nga pelela ti amana ne zwidiyo zwabo chini?
-
U no kumbula kuti Jehova u nowo zwiwa chini ha ti amuchila ku hwilila zwi sa ka lulwama ne kwe kukwe kene gubungano lile?
4. Dwilila u thembeka mu Ndzimu nenguba nzwalani a thama chibi
Ha ti nga ziba kuti nngwe mu gubungano wa thama chibi chikulu, ini cha ta ka fanila ku thama? Bona nlayontewo u mu nlayo we Ndzimu wa a ka pa Baiziraela. Bala Lifitiko 5:1.
Se kwa ka laigwa mu ndimana iyeyi, ha ti ziba kuti nngwe wa thama chibi chikulu, ta ka fanila ku budza bakugwana cha ti no ziba. Ti sathu ti ka thama ku jalo, kowo be ku lakidza ludo ha ti budza wa thama chibi kuti a no budza bakugwana cha a thama. Ha e kongwa ne ku thama e jalo, ku thembeka kwedu mu na Jehova kwa ka fanila ku thama kuti ti budze bakugwana cha ti no ziba. Ku thama ku jalo ko lakidza chini ludo ne ku thembeka mu . . .
-
na Jehova Ndzimu?
-
nthu wa thama chibi?
-
bangwe mu gubungano?
Ha Nkirisiti nngwe ali mu mathatha, mbatshe!
5. Buda mu Bhabhiloni Nkulu
Bala Luka 4:8 ne Zumbunulo 18:4, 5, mu be mu dabila buzo dzi no tobela:
-
A zina langu li cha ka kwalisiwa mu kereke ya nda ka be ndi ngina?
-
A ndi mu gubungano li no amana ne kereke ingwe?
-
A nshingo wangu u no batsha budumili gwe manyepkhwa ne zila ingwe?
-
A kuna pangwe mu buchilo gwangu kwa ndi no sheta ku thubukana ne budumili gwe manyepkhwa?
-
Ha nda dabila ndi ti ee mu ingwe ye buzo dzi pezhugwi, ini cha nda ka fanila ku shandula?
Mu mamo wose, shalula chi nowo thama kuti u be ne chikumbuludzi chibuyanana ne ku lakidza kuti u no thembeka mu na Jehova.
U nga thamani ha ku ngayi u duse chipo mu nshingo ungwe we kereke?
BATHU BANGWE BA KATI: “Nda ka fanila ku ziba kuti ba ka fupatila Ndzimu ba no tini ne kwe Bafakazi ba Jehova, kuti ndi khone ku vikila malebeswa.”
-
A kowo be kuli buchenjedu ku thama ku jalo? Ne kutini?
CHA WA ZWIDIYA
Kuti ti dwilile ti thembeka mu na Jehova, ta ka fanila ku lamba ku shingidzana ne bathu bose ba si nga thembeke mu nli. Kakale ta ka fanila ku thubukana chose ne budumili gwe manyepkhwa.
U Nga Tini?
-
Ini ti sa ka fanila ku lingilila, bala kene ku teedza mikumbulo ye ba ka fupatila Ndzimu?
-
Ta ka fanila ku bata chini u si nga cha shake ku be Nfakazi wa Jehova?
-
Ti nga lakidza chini kuti to teedza kumbuludzo ye kuti ti bude mu budumili gwe manyepkhwa?
SHAKISISA
Zwidiye se kwa u nga zwibata ha bangwe be andamisa mbiko dze manyepkhwa ne kwe Bafakazi ba Jehova.
U nga bona chini makubungano a no batsha Bhabhiloni Nkulu?
“Shinga Kwazo mu Bupelo gwe ‘Mazhuba e Bupelo’” (Thungamakole, October 2019, dzipharagrafo 16-18)
Bangwe ba nga lika chini ku thama kuti dumilo yedu isi sime?
Mu mbiko i noti “Nda ka Gala Ndi Shaka Ndzimu mu Buchechana Gwangu,” bala ne kwe ndiyi we Shinto wa ka thubukana ne budumili gwe manyepkhwa.
“Baibili i no Shandula Machilo” (Thungamakole, July 1, 2011)
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
