LISHOMO 58
Wena mushu ukulupilika kumwe Yeova
Vaklistu vaiu vandyamuwa kenga havaleka shinu shoeshoe au munu avapukanianga namu Yeova. Kwaumwiu, amu ni mwauligwidya wako. Yeova ankutumbyanga namene kukulupilika kwako. (Shomya 1 Maimyo 28:9.) Vinu shani vilota kulinga kukulupilika kwako, na wako ulota kuulula dashi kupililila vinu avyo?
1. Vanu vanji valota kulinga dashi kukulupilika kwako kumwe Yeova?
Vanu vanji vanauka ndalingangila kututadya wetu tuleke kuntumikila Yeova. Kanji nyani alota kutenda shinu ashi? Vanu vanji valakile kuntumikila Yeova, vandavalanga vinu vyakushang’apa kwaupande wa upangaji wake Nnungu, pakulota vabamole likulupililo lyetu. Vanavo vashamegwa vakupinga. Kuleka apo, vananangalaledi vanji vadidini vandandavadya ushwang’a kwaupande wetu, pakulota kuvatadya vanu vanji valeke umwiu. Ni shinu shakujowa kutangola na vanu vatupinga, kushomya mabuku lavo, kwinjila mu saiti yavo au kulola video vyavo. Yesu atangwele doni kwaupande wa avalá valingangila kuvatadya vanu vanji kuleka kuntumikila Yeova: “Valeke, vanavo ni vananangalaledi vakuputala mevo vavalangalaléla vakuputalamwave. Munu wakuputala akannangalalela wakuputalamwagwe, vanu avo uti vandagwilangila mulipondo.”—Mateu 15:14.
Napanelo ikava kenga munu watummanyite andileka kuntumikila Yeova? Tunkuulula kuvanavo shipalodi ikava kenga munu watunnagwaledya, anditenda shinu asho. Munu ajo panji ankuulula kulingangila kutukanyalidya wetu pakulota tutandole pakati pake nae namu Yeova. Ituvaikidile twamuwe kuka mushu tukulupilika kumwe Yeova kupunda shinu shoeshoe. (Mateu 10:37) Ndyomana tunkwigwilila lilamulo limwe Yeova livalanga pakulota hatunatangole na munu wa inamuna ai.—Shomya 1 Vakolintu 5:11.
2. Wamushi wetu unkulodya dashi kenga tunkukulupilika kumwe Yeova?
Linagwaledyo lyatuvenavo kumwe Yeova, linauka natupa dimongo pakulota kulodya kenga hatunatenda shinu imbande ya idini yakushang’apa. Asho mana ake hatunatenda shinu imbande ya upangaji woewoe wigwania na idini yakushang’apa, asho shinkuvika nkati madengo letu na shinu shoeshoe shatutenda. Yeova ankutwaulila doni: “Mmenentete vangu, lyumadyange kwake [Babiloni nkumene].”—Maono 18:2, 4.
LAMBELA KUMANYA VYOE
Manya mwashi mwaulota kuululila mene kunneka munu adabadabyanga kukulupilika kwako kumwe Yeova. Namomo mwashi mwaulota kulodedya kukulupilika kwako kwa kuma ku Babiloni nkumene.
3. Lilaledye kwa mapundisho lakushang’apa
Tulota kwamuwidya mwashi tukaigwa vinu vyakunyata vyavavalanga kwaupande wa upangaji umwe Yeova? Shomya Mikong’o 14:15, na badae mwambangile mwaa shakudya sha mwina:
-
Mwaa shani ituvaikidile tulilaledye pakulota hatunamini vinu uti vyatwigwa?
Shomya 2 Nshuwau 10, na badae mwambangile mwaa vyakudya vya mwina:
-
Tulota kuvatanana dashi vakupinga?
-
Tunkumanya kenga hashinava shinu shalimanyilo kutangola na vakupinga, kanji tulota kuka dashi ndambukishigwa na mapundisho lavo?
-
Wako wona kenga Yeova alota kuligwa dashi wetu tukaigwilila vinu vyakunyata vyavavalanga kwaupande wake nae au upangaji wake?
4. Wena mushu ukulupilika kwake Nnungu ata ikava kenga nung’ unumunu anditenda lidambi
Tukamanya kenga munu pashipinga anditenda lidambi likumene, ituvaikidile tutende nyamani? Lola lilamulo líkabadilika livele mu lilamulo lyavapele Nnungu venentete va ku Ishilaeli vakala. Shomya Valawi 5:1.
Kulingana na nshitali au, tukamanya kenga munu anditenda lidambi likumene, wetu ituvaikidile tuvaulile vanang’olo vashipinga. Kanji shitandi shindava shambone kumupa dimongo munu ajo, pakulota akatangole na vanang’olo vashipinga na alivalangange lidambi lyake. Kanji nae hakanatenda davo, kukulupilika kwetu kumwe Yeova kuvaikidile kutupe dimongo pakulota tukavaulile vanang’olo vashipinga ashilá shatumanya. Mwaa shani kutenda davo kunkulodya linagwaledyo lyakukulupilika . . .
-
kumwe Yeova Nnungu?
-
kwa munu atandile lidambi?
-
kwa vanu vanji pashipinga?
Ikava kenga Nklistumwavo avele mushijoidyo, mpwashele!
5. Lyumadyange ku Babiloni nkumene
Shomya Lukashi 4:8 na Maono 18:4, 5, na badae jang’ula vyakudya vya mwina:
-
Da lina lyangu linkupagwa mu mabuku la idini yakushang’apa?
-
Da ninkutenda imbande ya upangaji wigwania na idini inji?
-
Da lidengo lyangu linkupwashela idini yakushang’apa mu inamuna yoeyoe?
-
Da ipali imbande ya shinamilo shangu inguvaikidile nguleke kwamwaa inkwigwania na idini yakushang’apa?
-
Ikava kenga ndijang’ula elo pakati pa vyakudya avi, mabadiliko shani lavaikidile ngutende?
Kwa shinu shoeshoe, umya wamushi ulodya kukulupilika kwako kumwe Yeova na ulota kukuleka na makumbukililo lambone amuntima.
Ulota kutenda nyamani vakakujugwa umye nshango pakulota kupwashela upangaji wa idini yakushang’apa?
VANU VANJI VANKUSHIDONI: “Nangu ninkulota ngumanye nyamani shavavalanga vakupinga kwaupande wa Mashaidi va Yeova, pakulota ngulule kushililidya umwiu.”
-
Wako wona kenga shindava shinu shambone kutenda davo? Mwaa wa nyamani?
KWAUNGWIPI
Tunkulota tuke mushu tukulupilika kumwe Yeova, ndyomana ituvaikidile tunyeme kutangolanavo avalá vákakulupilika kwake nae. Kuleka apo, ituvaikidile tulyumadyange mu idini yakushang’apa.
Tukumbukilange
-
Mwaa shani haituvaikidile tulole, tushomye au twigwilile mapundisho lavakupinga?
-
Ituvaikidile tuvatanane dashi avalá vákalota kuva Mashaidi vamwe Yeova?
-
Tulota kwigwilila dashi lilamulo livalanga kenga ituvaikidile tulyumadyange mu idini yakushang’pa?
LIPUNDISHE
Manya mwashi mwakwamuwidya ikava kenga vanu vanji, vankutangasha vinu vyakushang’apa kwaupande wa Mashaidi va Yeova.
Tulota kumanya dashi kenga upa ngaji au lidengo lyoelyoe linkupwashela Babiloni nkumene?
Vanu vakupinga valingangidile kutenda nyamani pakulota kudabadabyanga likulupililo lyetu?
Pakulota umanye mwashi nkúlangalela-shadaka wa idini ya Shinto mwaukidile ndaleka idini yakushang’apa, shomya shakupitila “Nangu ngushinannambela Nnungu tangu shidyoko shangu.”
