TZOLOM 58
Miqatzʼeqtaana li Jehobʼa
Joʼ tzʼaqal aj paabʼanel inkʼaʼ naqakanabʼ naq maaʼani ut maakʼaʼ tixram chiqu xloqʼoninkil ru li Jehobʼa. Chʼolchʼo chiqu naq joʼkan ajwiʼ nakatkʼoxlak ut oxloqʼ chiru li Jehobʼa naq inkʼaʼ nakaatzʼeqtaana (yaabʼasi 1 Crónicas 28:9). Kʼaru ebʼ li chʼaʼajkilal naru naxbʼaanu naq taatzʼeqtaana li Jehobʼa? Ut kʼaru ttenqʼanq aawe?
1. Chanru naru nekeʼxyal aawix ebʼ li junchʼol re naq taatzʼeqtaana li Jehobʼa?
Wankebʼ teʼxyal xrambʼal chaawu kʼanjelak chiru li Jehobʼa. Ani tbʼaanunq re aʼin? Maare li xeʼxkanabʼ li yaal ut anaqwan nekeʼxye li tikʼtiʼ chirix li xmolam li Jehobʼa re naq tchʼinaaq li qapaabʼal. Wankebʼ ajwiʼ laj kʼamolbʼe saʼebʼ li bʼalaqʼil paabʼal li nekeʼxye tikʼtiʼ chiqix re naq ebʼ li moko kawebʼ ta saʼ xpaabʼal teʼxkanabʼ li yaal. Xiwxiw aatinak rikʼinebʼ li xeʼxtzʼeqtaana li Jehobʼa, xyaabʼasinkil li xhuhebʼ, rilbʼal li nekeʼxkʼe saʼ Internet ut ebʼ li bʼideo. Naq kiʼaatinak chirix li nekeʼraj qaqʼunbʼesinkil re xkanabʼankil li Jehobʼa, li Jesús kixye: «Kanabʼomaqebʼ xbʼaan naq mutzʼebʼ ut aj bʼeresihom mutzʼebʼ. Ut wi junaq mutzʼ naxbʼeresi junaq rech mutzʼil, chi xkabʼichalebʼ teʼtʼaneʼq saʼ jul» (Mateo 15:14).
Kʼaru nakʼulmank naq junaq li qakomon malaj qamiiw naxye naq inkʼaʼ chik naraj wank joʼ aj testiiw re li Jehobʼa? Kʼajoʼ naq narahoʼk saʼ qachʼool. Li kristiʼaan aʼin naru naxbʼaanu naq tqasikʼ ani tqara, aʼan malaj li Jehobʼa. Abʼan li chʼolchʼo chiqu aʼan xkʼebʼal li Jehobʼa chiʼubʼej saʼ li qayuʼam (Mateo 10:37). Joʼkan naq naqapaabʼ naq li Jehobʼa naxye qe naq inkʼaʼ tqochbʼenihebʼ li kristiʼaan aʼan (yaabʼasi 1 Corintios 5:11).
2. Chanru naxkʼutbʼesi li naqaj xbʼaanunkil saʼ li qayuʼam naq maajunwa tqatzʼeqtaana li Jehobʼa?
Xbʼaan naq naqara li Jehobʼa inkʼaʼ naqaj tzʼaqonk saʼ xnaʼlebʼ li bʼalaqʼil paabʼal. Chi moko naqakanabʼ naq li qakʼanjel, junaq li molam malaj junaq chik li naʼlebʼ li naqabʼaanu tixchap ribʼ rikʼin li bʼalaqʼil paabʼal. Li Jehobʼa kixye re li xtenamit: «Elenqex chaq Babilonia» malaj li Nimla Tenamit Babilonia (Apocalipsis 18:2, 4).
QASIKʼAQ XCHAMAL LI NAʼLEBʼ
Tzʼil rix kʼaru tatruuq xbʼaanunkil re naq maaʼani tixchʼina laapaabʼal re naq taatzʼeqtaana li Jehobʼa. Tzol ajwiʼ chanru nakaakʼutbʼesi naq tiik laachʼool chiru li Jehobʼa naq inkʼaʼ nakat-okenk saʼ li Nimla Tenamit Babilonia.
3. Weent taabʼaanu rikʼinebʼ li bʼalaqʼ aj kʼutunel
Kʼaru raj tqabʼaanu wi naqabʼi naq yookebʼ xwechʼbʼal rix li xmolam li Jehobʼa? Cheeyaabʼasi Proverbios 14:15 ut chexʼaatinaq chirix li patzʼom aʼin:
-
Kʼaʼut tento naq wanq qanaʼlebʼ ut inkʼaʼ tqapaabʼ chixjunil li tqabʼi?
Cheeyaabʼasi 2 Juan 10 ut chexʼaatinaq chirix ebʼ li patzʼom aʼin:
-
Ma naru naqakʼe qibʼ saʼ aatin rikʼinebʼ li xeʼxtzʼeqtaana li Jehobʼa? Kʼaʼut?
-
Maare moko naqochbʼenihebʼ ta li xeʼxtzʼeqtaana li Jehobʼa, abʼan chanru naru nokooxkʼe saʼ chʼaʼajkilal ebʼ li xkʼutum?
-
Wi naqalejebʼ qaxik chi rabʼinkil li nekeʼxwechʼ rix li Jehobʼa ut li xmolam, chan tawiʼ ru narekʼa ribʼ li Jehobʼa?
4. Maatzʼeqtaana li Jehobʼa naq jun laawechpaabʼanel namaakobʼk
Kʼaru tenebʼanbʼil saʼ qabʼeen wi naqanaw naq jun li qechpaabʼanel xbʼaanu jun li nimla maak? Tzʼil rix li naʼlebʼ li wank saʼ li Chaqʼrabʼ li kixkʼe li Jehobʼa re li tenamit Israel. Cheeyaabʼasi Levítico 5:1.
Joʼ xqil, wi naqanaw naq jun li qechpaabʼanel kimaakobʼk tento naq tqaye rehebʼ li cheekel winq. Abʼan us raj naq xbʼeenwa tooʼaatinaq rikʼin li kimaakobʼk re naq tixye chaq rehebʼ li cheekel winq kʼaru kixbʼaanu. Abʼan wi inkʼaʼ naxbʼaanu, wi tzʼaqal yaal naq tiik qachʼool chiru li Jehobʼa laaʼo tqaye rehebʼ li cheekel winq li kikʼulmank. Kʼaʼut naq aʼin naxkʼutbʼesi naq naqara...
-
... li Jehobʼa?
-
... li kimaakobʼk?
-
... li chʼuut?
Wi junaq li hermaan xtʼaneʼk saʼ junaq li maak, chaatenqʼa!
5. Mat-okenk saʼ li Nimla Tenamit Babilonia
Cheeyaabʼasi Lucas 4:8 ut Apocalipsis 18:4, 5 ut chexʼaatinaq chirix ebʼ li patzʼom aʼin:
-
Ma toj tzʼiibʼanbʼil linkʼabʼaʼ saʼ junaq li bʼalaqʼil paabʼal?
-
Ma ninʼokenk saʼ junaq li molam li naxchap ribʼ rikʼin li bʼalaqʼil paabʼal?
-
Ma naxchap ribʼ linkʼanjel rikʼin li bʼalaqʼil paabʼal?
-
Ma toj wank junaq li naʼlebʼ re li bʼalaqʼil paabʼal li tento tintzʼeqtaana?
-
Wi naq nakaasume junaq rehebʼ li patzʼom aʼin, nakaakʼe reetal naq toj nakaayuʼami junaq li naʼlebʼ re li bʼalaqʼil paabʼal, kʼaru raj taabʼaanu?
Saʼ chixjunil li taabʼaanu kʼe reetal naq inkʼaʼ tatxchʼiʼchʼiʼi laachʼool ut naq inkʼaʼ taatzʼeqtaana li Jehobʼa.
Kʼaru taabʼaanu wi teʼxpatzʼ aatumin choʼq re jun li molam li natenqʼank, abʼan naxchap ribʼ rikʼin li bʼalaqʼil paabʼal?
WIIBʼ OXIBʼ NEKEʼXYE: «Wi inkʼaʼ ninnaw kʼaru nekeʼxye chirixebʼ laj Testiiw li xeʼxtzʼeqtaana li yaal, chanru tinkol rix li yaal?».
-
Ma us naʼlebʼak chi joʼkan? Kʼaʼut?
LI AK XQATZOL
Wi naqaj naq junelik tiikaq qachʼool chiru li Jehobʼa inkʼaʼ tqochbʼenihebʼ li xeʼtzʼeqtaanank re. Joʼkan ajwiʼ tento tooʼelq chi junajwa saʼ li bʼalaqʼil paabʼal.
Qajultikaq
-
Kʼaʼut inkʼaʼ tqil, tqayaabʼasi malaj tqabʼi li nekeʼxye li xeʼxtzʼeqtaana li Jehobʼa?
-
Chanru tqilebʼ li inkʼaʼ chik nekeʼraj wank joʼ aj testiiw re li Jehobʼa?
-
Chanru tooʼabʼinq chiru li Jehobʼa naq naxye qe naq tooʼelq saʼ li bʼalaqʼil paabʼal?
SIKʼ XKOMON LI NAʼLEBʼ
Tzol kʼaru taabʼaanu naq nekeʼxjekʼi li tikʼtiʼ chirixebʼ laj testiiw re li Jehobʼa.
«Ma ak xqatzʼil rix ma yaal?» (Laj Kʼaakʼalehom, agosto 2018)
Chanru taanaw ma junaq li naʼlebʼ malaj junaq li molam naʼokenk saʼ li Nimla Tenamit Babilonia?
Kʼaru nekeʼxbʼaanu ebʼ li xikʼ nekeʼril li yaal re naq tchʼinaaq li qapaabʼal?
Kʼe reetal chanru jun aj kʼamolbʼe saʼ li bʼalaqʼil paabʼal inkʼaʼ chik kiʼokenk saʼ xyanqebʼ, saʼ li resil xyuʼam «Chalen chaq saʼ linkachʼinal xinsikʼ li Yos».
«Li Santil Hu kixjalebʼ xyuʼam» (Laj Kʼaakʼalehom, 1 re julio 2011)
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
