Biin Krist ba biin-biin, kabiish biitabil ciit eecy muut bwa anyang bulund bwaababw ni Yehow. Kakuy kulandul, ki ciwukaakaam byeeb kulong. Lulamat lwiibuh, ludy ni buseeb buvul, ku mees kwa Yehow. (Balaay 1 Cifuk 28:9.) I myand kaay yidy mwa kuteek lulamat lwiibuh mu diiteet? Ni i mushind kaay uwudy mwa kwiiyitaatameen?

1. I mushind kaay udy baat bakwaabw bakaam kwiitufweej kuleeh ni Yehow?

Baat bakwaabw, bady mwa kwiitusak bwa tulek kukadil Yehow mudimw. Bady mwa kwiikal bangany? I baat bady balek myand ya biin-biin ya mu Bibl ni baleeb myand ya makos habitaatal bulongolody bwa Mawej bwa kunyangobw diitabij diitut. Baat aab, i batontolody. Cikwaabw, bafumw ba bitendeleel bakwaabw baleeleeb myand ya makos habitutaatal bwa kusak biin Krist bahuuyil bwa balek myand ya biin-biin. Kabiish bilengel bwa kwiisamb ni balwiish aab, kubal mikand yaababw, kutweel mu sit yaababw ya Enternet eecy kutal video yaababw. Yeez waakady muleeb bwa baat bakaakaam kunyang lulamat lwiitut neey: “Yiibalekaay: i bafw mees baloolombol bafw mees naab! Biikal mufw mees ulombol mufw mees nend, bayaay bakahon boos babidy mu cind.”—Matewus 15:14.

I biny biwudy mwa kulong hawumaamanyik neey, mulund neeb eecy mwiin mu cisak ciinun i mulek Yehow? Bwaal bwa nook, bwiitwiitiit bikasakan ku micim. Muut wa nook, udy mwa kwiitusak bwiitut kumulond eecy kulond Yehow. Bikaam twiiswiik bwa kushaal balamat teng Mawej kuuhal kwa byoos. (Matewus 10:37) Nook, tudy mwa kukooyel diiy dya Yehow dya neey, lekaay kutweelakan ni muut wa nook.​—Balaay 1 Biin Korent 5:11.

2. I mushind kaay udy kulamat kwiitut kwa Yehow kumweekel ku myand yitusuusungul?

Bu mutudy bakat Yehow, katwiishoh bend bakat kutweelakan ni citendeleel cya makos. Katwiin mwa kwiitab bwa mudimw utukaakal, cikong kaahand cya baat eecy bulongolody kaahand bitusak bwa kutweelakan mu myand ya citendeleel cya makos. Yehow wiitudiidimwiij neey: “Nun baat ba mim, mwangalaay mu [Babiloon Mutam].”​—Myand yisokolweel Jah 18:2, 4.

 TWEEL MU BONDOK

3. Dimukilaay balongweesh ba makos

I biny bitudy mwa kulong tut bumvw baat batobolol bulongolody bwa Yehow? Balaay Tusumw 14:15, ni isambilaay ha diijooj eedy:

• Bwabiny kabiish bikaam kwiitab myand yoos yitumvumvw?

Balaay 2 Jah 10, ni isambilaay ha majooj aam:

• I biny bitudy mwa kulong tut biikal kuuhal kwa mutontolody?

• Ning mutudy katuy mwa kutweelakan ni batontolody, i ku byaab kaay kutudy mwa kuhetelangan naab?

• Bwiibuh, Yehow umvumvw bicy hatukuukun baat bamutootobolol mat ni baleeb bibiih bwa bulongolody bwindiy?

4. Iikal teng mulamat Yehow hady mwiin-kweet ulong mpekaat

Tut bamanyik neey, mwiin-kweet wa mu cisumbw i mulong mpekaat mutam, bikaam tulong biny? Tukontononaay diiy ditam dya mu mikenj dyaakady Mawej mwaakish biin Izaleel ba kal. Balaay Biin Leevy 5:1.

Bilondeshel diiy ditam eedy, tut bamanyik neey, mwiin-kweet wa mu cisumbw i mulong mpekaat mutam, bikaam twambil bakul. Ki kuuhal kwiitut kuy kudy bakul, bikaam twambil mulong a mpekaat bwa iiyiil kaayend kudy bakul bwa kwiibatondeley mpekaat indiy. Hikaley mulek, lulamat lwiitut bwa Yehow lwiitusaasak bwiitut kuy kudy bakul bwa kwiibambil bwaal oobw. I mushind kaay udy bwaal oobw buleej neey, tudy bakat . . .

• Yehow?

• muut udy mulong mpekaat?

• biin mu cisumbw bakwaabw?

 5. Hatukaay mu Babiloon Mutam

 CYA KUKWAAT

Bwiitut kulamat Yehow, bikaam tulek cikong cya baat bakiish bamulamat. Cikwaabw, bikaam tulek myand yoos yiheehetangan ni citendeleel cya makos.

Bwa kuvuluk

• Bwabiny bikaam tulek kutal, kubal eecy kumvw myand ya batontolody?

• I biny bitudy mwa kulong tut biikal kuuhal kwa baat baakady kuuhal Batemw ba Yehow?

• I mushind kaay udy mwiin Krist mwa kuleej neey, i Muhatuk mu citendeleel cya makos?