Mwet Christian pwacye ac tiac lwelah kuhtwena mwet kuh kuhtwena ma in kuhnahoslah fototo lalos nuh sin Jeova. Pwacye lah kom puhla pac ohinge. (Riti 1 Chronicle 28:9.) Ohiyac fuhkah kuh in srihke oaru lom nuh sel, ac meac kuh in kahsre kom in tu na kuh kac uh?

1. Mwet sahyac uh kuh in srihke oaru lom nuh sin Jeova fuhkah?

Kuhtuh mwet elos srihke in tulokihnkuhti ke kuhlwacnsap lasr nuh sin Jeova. Suc oruh ma inge? Kuhtuh sin mwet suc forlah liki ma pwacye elos fahk ma kikiacp ke u luhn God in kuhnahoslah luhlahlfongi lasr. Pahngohnyuck elos oacna apostates. Oacyacpac, kuhtuh mwet kol luhn alu elos fahk ma kikiacp kacsr. Elos luhngse mwet kuhlwacnsap luhn Jeova in forlah liki ma pwacye kais kuhtuh srihsrihk. Arlac sensen in sramsram nuh selos, rit puk kuh blog lalos, kuh som nuhke website kuh liye video lalos. Ke mwet suc luhngse in ahkmuhnahsye oaru lasr nuh sin Jeova, Jesus el fahk: “Nimet elyah selos! Elos mwet kol kun; ac mwet kun se fin pwen sie pac mwet kun, eltahl kewa ac puhtatyang nuh in luhf uh.”​—Matthew 15:14.

Na fuhkah fin sie mwet suc kuht etuh el sruhngaclah in sie sin Mwet Loh luhn Jeova? Ma inge ac oruh kuht in arlac ahsor yohkna el fin fototo na pwacye nuh sesr. Sahp, elos ac kwacfe kuht in oruh sulaclah lah el kuh Jeova. Kuht enenuh in tu na kuh in sruokyac oaru lasr nuh sin God. (Matthew 10:37) Pasis kuht ahkos masap luhn God in tiac asruoki yurin kain in mwet inge.​—Riti 1 Corinth 5:11.

2. Sulaclah fuhkah kuh in srihke oaru lasr nuh sin Jeova?

Luhngse lasr nuh sin Jeova ac ahkkweye kuht in fahsr liki kuhtwena oakwuck luhn alu kikiacp. Pwacnacng orekma lasr, u ma kuht wi, ac kuhtuh pac ma sahyac ma kuht oruh, enenuh in tiac kuhpahsr nuhke alu kikiacp. Jeova el sensenkackihn kuht: “Mwet luhk, kowos in kahinglac liki siti sac [Babylon Luhlahp].”​—Fwackyuk 18:2, 4.

 AHKYOHKYE LUTLUT LOM

3. Taran ke mwe luti kikiacp

Ohiyac fuhkah kuht ac ahkkahlwemye kuht fin lohng ma tiac wo ke u luhn Jeova? Riti Soakas 14:15, ac tohkohyang sramsramkihn kihsen siyuck se inge:

• Efuh kuht in tiac luhlahlfongi ke ma nuhkewa kuht lohng?

Riti 2 John 10, ac tohkohyang sramsramkihn kihsen siyuck inge:

• Ohiyac fuhkah kuht ac ahkkahlwemye nuh sin mwet suc forlah liki ac lain na pwacye Jeova?

• Finne kuht tiac sramsram suwohs nuh sin mwet apostates, mwe luti laltahl kuh in kihfaskuhtlac fuhkah?

• Meac Jeova el puhla  kuht fin lohacng nuhke ma tiac wo elos fahk kacl ac ke u lal uh?

4. Sruokyac oaru lasr nuh sin God ke pacl se sie mwet lili oraclah ma koluk

Kuht fin lotwelah lah sie sin mwet lili ke congregation el oraclah ma koluk upac, meac kuht enenuh in oruh? Nuhnkuh ke oakwuck wo inge ke Masap luhn God nuh sin mwet Israel in pacl meet ah. Riti Leviticus 5:1.

In oacna ke fuhs se inge fahk, kuht fin etwacack lah sie mwet el oraclah ma koluk upac, kuht enenuh in fahkwack ma kuht etuh kac nuh sin mwet elder. Tuhsruhktuh meet liki kuht oruh ma inge, wo kuht in kwacfel elan som nuh yurin mwet elder ac sifacna fahkwack ma koluk lal. El fin tiac oruh, kuht ac fah fahk nuh sin mwet elder ma koluk el oraclah mweyen kuht oaru nuh sin Jeova. Kuht ac ahkkahlwemye fuhkah luhngse pwacye lasr nuh sin . . .

• Jeova God?

• mwet se suc oraclah ma koluk?

• mwet lili sahyac ke congregation?

 5. Tiac wi ke Babylon Luhlahp pacl nuhkewa

 MA KUHT LOTWELAH

In kahsre kuht in oaru nuh sin Jeova pacl nuhkewa, kuht enenuh in fahsr liki asruoki yurin mwet suc soaru nuh sel. Kuht enenuh pac in srikuhtlac liki alu kikiacp ke ohiyac nuhkewa.

Kalweni

• Efuh kuht tiac enenuh in liye, rit, kuh lohng mwe luti luhn mwet suc forlah liki Jeova?

• Ohiyac fuhkah kuht enenuh in ahkkahlwemye nuh sin mwet suc sruhngaclah in sie sin Mwet Loh luhn Jeova?

• Kuht ac ahkos fuhkah kahs in sensen in kahinglac liki alu kikiacp?