LUFUNJISHO 58
Twajijilai Kwikala Bakishinka kwi Yehoba
Bena Kilishitu ba kine bebikako bingi kubula kuswisha kintu nangwa muntu kwibakanya kwingijila Yehoba. Twayuka ne anweba byobyo mubena kulanguluka. Yehoba wanemeka bingi bukishinka bwenu. (Tangai 1 Byambo bya Moba 28:9.) Ñanyi bintu byakonsha kwimulengela kubula kwikala bakishinka? Kabiji ñanyi bintu byafwainwa kwimukwasha kuyuka mwa kubila pa kuba’mba mutwajijile kwikala bakishinka?
1. Bantu bakonsha kweseka byepi bukishinka bwetu kwi Yehoba?
Bantu bamo baketukanya kwingijila Yehoba. Ñanyi wakonsha kuswa kuleka kwingijila Yehoba? Bantu bamo baleka kwingijila Yehoba, babena kwamba bintu bya bubela pa jibumba ja Lesa mambo bakeba konauna lwitabilo lwetu. Abano bantu twibatongola’mba bansatuki. Kabiji bantangi bamo ba bupopweshi bamba bintu bya bubela pe atweba kuba’mba bongole bantu baleke kwingijila Yehoba. Kechi kyawama atweba kwipachikanga na bansatuki, kutanga mabuku abo, bintu byo banemba nangwa kuya pa makeyala abo nangwatu kutamba mavidyo abo ne. Kwamba pa bantu bongola bakwabo kuba’mba baleke kwingijila Yehoba mu bukishinka, Yesu waambile’mba: “Balekai bekalenga. Mambo bo bantangi bampofu. Umvwe mpofu watangijila mpofu mukwabo bonse baponena mu kimbo.”—Mateo 15:14.
Pano twafwainwa kuba byepi inge muntu ye twayuka wasalapo mwine kubula kwikala Kamonyi wa kwa Yehoba? Kwambatu kishinka, kino kitukola bingi ku muchima. Muntu wafuukulapo bino wakonsha kwitukanjikizha kusalapo kana kumulondela aye nangwa kulondela Yehoba. Bino atweba twafwainwa kutwajijila kwikala bakishinka kwi Lesa kukila bintu byonse. (Mateo 10:37) Onkao mambo, tukookelenga mukambizho wa Yehoba wa kubula kupwanañana na bansatuki.—Tangai 1 Kolinda 5:11.
2. Bintu byo tufuukula mu bwikalo bwetu bimwesha byepi inge twi bakishinka kwi Yehoba nangwa ne?
Kutemwa Yehoba kwitukwasha kuchinuzhuka bintu byonse bya bupopweshi bwa bubela. Onkao mambo, twafwainwa kuchinuzhuka bintu byonse byuba bupopweshi bwa bubela nabiji nkito ne bintutu bikwabo byo tuba bitundaika bupopweshi bwa bubela. Mambo Yehoba witukambizha kuba’mba: “Anweba bantu bami, lupukaimo mu [Babilona Mukatampe].”—Lumwekesho 18:2, 4.
FUNJILAIPO BIKWABO
Yukai byo mwakonsha kuba pa kuba’mba mubule kuswisha muntu nangwa kintu kwimulengela kubula kwikala wakishinka kwi Yehoba. Kabiji monai byo mwafwainwa kumwesha’mba mwi bakishinka kwi aye ne kulupukamo mu Babilona Mukatampe.
3. Jimukai na bafunjishi ba bubela
Twafwainwa kuba byepi inge twaumvwa bantu na kwamba bintu byatama pa jibumba ja Yehoba? Tangai Byambo bya Maana 14:15, ne kwisamba buno bwipuzho:
-
Mambo ka o tubujila kuswa bintu byonsetu byo tumvwa?
Tangai 2 Yoano 10, ne kwisamba ano mepuzho:
-
Twafwainwa kuba byepi na bansatuki?
-
Nangwa kya kuba kechi twisamba mu kushinkamika na bansatuki ne, pano twakonsha kutendeka kwisamba nabo byepi?
-
Nanchi Yehoba umvwa byepi ku muchima inge ketuteleke ku bintu bya bubela byamba bansatuki pe aye nangwa pa jibumba janji?
4. Twajijilai kwikala bakishinka kwi Lesa inge mulongo mu kipwilo walenga mambo
Ñanyi kintu kyo twafwainwa kuba inge twayuka’mba muntu umo mu kipwilo walenga mambo akatampe? Monai jino jifunde jiji mu Mizhilo ya Lesa yo apeele bena Isalela. Tangai Bena Levi 5:1.
Byonkatu byaamba kino kyepelo, inge twayuka’mba muntu umo walenga mambo akatampe, twafwainwa kubuula bakulumpe mu kipwilo bishinka byonsetu byo twayukapo pa oo mambo. Pano bino, saka tukyangye kubuula bakulumpe mu kipwilo, twafwainwa patanshi kukitundaika muntu mwine walenga mambo kuya ku bakulumpe mu kipwilo kuba’mba akebabuule mambo o alenga. Inge wabula kuya ku bakulumpe mu kipwilo, atweba po po twafwainwa kubuula bakulumpe mu kipwilo bishinka byonsetu byo twayukapo pa oo mambo. Tukooba bino mambo tukeba kwikala bakishinka kwi Yehoba. Nanchi kuba bino kumwesha byo twatemwa . . .
-
Yehoba Lesa nyi?
-
muntu walenga mambo nyi?
-
balongo ne banyenga mu kipwilo nyi?
Inge mulongo nangwa nyenga uji mu makatazho, mukwashai!
5. Lupukaimo mu Babilona Mukatampe
Tangai Luka 4:8 ne Lumwekesho 18:4, 5, ne kwisamba ano mepuzho:
-
Nanchi jizhina jami jakishala mu bupopweshi bwa bubela nyi?
-
Nanchi nji mu jibumba jakwatankana na bupopweshi bukwabo nyi?
-
Nanchi ñingila nkito itundaika bupopweshi bwa bubela nyi?
-
Abya kujipo mumo mu bwikalo bwami mo nafwainwa kupimpulako pa kuba’mba mbule kwivwanga mu bupopweshi bwa bubela nyi?
-
Inge nakumbula’mba ee ku ano mepuzho, mwepi mo nafwainwa kupimpulako?
Onkao mambo, fuukulainga bintu bikemukwasha kwikala na jiwi ja mu muchima jatooka ne kumwesha’mba mwi bakishinka kwi Yehoba.
Mwafwainwa kuba byepi inge bemwambila kupana bukwasho ku kipamo kya bupopweshi bwa bubela?
BANTU BAMO BAMBA’MBA: “Amiwa nkeba kuyuka bintu bibena kwamba bansatuki pa Bakamonyi ba kwa Yehoba pa kuba’mba ndwileko bukine.”
-
Nanchi kulanguluka bino kwawama nyi? Mambo ka o mwakumbwila byobyo?
ÑANYI BISHINKA BYO MWAFUNDA?
Pa kuba’mba tutwajijile kwikala bakishinka kwi Yehoba, twafwainwa kwikileka kupwanañananga na bantu babula bukishinka kwi aye. Kabiji twafwainwa kwifumyako ku bintu byonse byuba bupopweshi bwa bubela.
Mepuzho a kupitulukamo
-
Mambo ka o twafwainwa kubujila kutamba, kutanga nangwa kutelekatu ku bintu byamba bansatuki?
-
Twafwainwa kuba byepi na bantu bakana bene amba kyapwa kechi Bakamonyi ba kwa Yehoba ne?
-
Twakonsha kukookela byepi mukambizho wa kuba’mba lupukaimo mu bupopweshi bwa bubela?
KEBAI BISHINKA BIKWABO
Yukai bya kuba inge bantu ke bambe bintu bya bubela pa Bakamonyi ba kwa Yehoba.
“Nanchi Muji na Bishinka Nyi?” (Kyamba kya Usopa, August 2018)
Nanchi mwakonsha kuyuka byepi bipamo nangwa bintu bitundaika Babilona Mukatampe?
Ñanyi bintu byuba balwanyi betu pa kuba’mba bakookeshe lwitabilo lwetu?
Tangai pe pulisiti wa ba Shinto wafumine mu bupopweshi bwa bubela mu jishimikila ja kuba’mba “Natendekele Kukeba Lesa Kufumatu ku Bwanyike.”
“Baibolo Upimpula Bwikalo bwa Bantu” (Kyamba kya Usopa, October 1, 2011)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
