Tru Kristian dɛn dɔn mekɔp dɛn maynd nɔ fɔ ɛva alaw ɛnitin ɔ ɛnibɔdi fɔ ambɔg dɛn wɔship to Jiova. Wi shɔ se yu de fil di sem we. Jiova valyu di we aw yu de biɛn am. (Rid Fɔs Kronikul 28:​9.) Uskayn tin dɛn kin apin we kin mek i nɔ izi fɔ yu fɔ de biɛn Jiova? Wetin go ɛp yu?

1. Aw ɔda pipul dɛn kin tɛst di we aw wi de biɛn Jiova?

Sɔm pipul dɛn go tray fɔ stɔp wi fɔ sav Jiova. Udat dɛn go du da kayn tin de? Sɔm pipul dɛn we dɔn stɔp fɔ sav Jiova kin tɔk lay lay tin dɛn bɔt Gɔd in ɔgnayzeshɔn so dat dɛn go ambɔg wi fet. Dɛn kɔl dɛn apɔstet dɛn. Dɔn bak, sɔm bigman dɛn pan rilijɔn kin tɔk sɔm lay lay tin dɛn bɔt wi bikɔs dɛn want inosɛnt wan dɛn fɔ stɔp fɔ sav Jiova. I bad fɔ mek wi agyu wit pipul dɛn we nɔ lɛk wi, fɔ rid dɛn buk dɛn, ɔ dɛn blɔg dɛn, fɔ go na dɛn wɛbsayt dɛn, ɔ fɔ wach dɛn vidio dɛn. We Jizɔs bin de tɔk bɔt di wan dɛn we de mek ɔda pipul dɛn nɔ fetful to Jiova, i bin se: “Una lɛf dɛn. Dɛn blayn, bɔt dɛn want fɔ sho ɔda pipul dɛn di rod. If blaynman de lid in kɔmpin blaynman, dɛn ɔl tu go fɔdɔm insay ol.”​—Matyu 15:​14.

Wetin wi go du if pɔsin we wi sabi dɔn disayd se i nɔ want fɔ bi Jiova Witnɛs igen? Wi at kin rili pwɛl we pɔsin we wi lɛk du dis kayn tin. Da pɔsin de de fos wi fɔ pik bitwin in ɛn Jiova. Wi fɔ mekɔp wi maynd fɔ kɔntinyu fɔ de biɛn Gɔd pas ɛni ɔda pɔsin. (Matyu 10:​37) So wi de obe wetin Jiova tɛl wi we i se wi nɔ fɔ kip kɔmpin wit dɛn kayn pipul dɛn de.​—Rid 1 Kɔrintians 5:​11.

2. Aw di tin dɛn we wi de disayd fɔ du de sho if wi fetful to Jiova?

Di lɛk we wi lɛk Jiova go mek wi want fɔ avɔyd ɛnitin we gɛt fɔ du wit lay lay rilijɔn. Wi wok, di ɔganayzeshɔn dɛn we wi de, ɔ ɛni ɔda tin we wi de du nɔ fɔ gɛt ɛnitin fɔ du wit lay lay rilijɔn. Jiova wɔn wi se: “Mi pipul dɛn, una kɔmɔt [insay Babilɔn di Gret].”​—Rɛvɛleshɔn 18:​2, 4.

 LAN MƆ

3. Tek tɛm wit lay lay ticha dɛn

Wetin wi fɔ du if wi yɛri bad tin dɛn bɔt Jiova in ɔganayzeshɔn? Rid Prɔvabs 14:​15, dɔn una tɔk bɔt dis kwɛstyɔn:

• Wetin mek wi fɔ tek tɛm nɔ fɔ biliv ɔltin we wi de yɛri?

Rid 2 Jɔn 10, dɔn una tɔk bɔt dɛn kwɛstyɔn dɛn ya:

• Aw wi fɔ trit apɔstet dɛn?

• Ilɛksɛf wi nɔ de tɔk to apɔstet dɛn, aw di tin dɛn we dɛn de tich go afɛkt wi?

• Aw yu tink se Jiova de fil if wi de lisin to bad tɔk dɛn bɔt in ɔ in ɔganayzeshɔn?

4. Kɔntinyu fɔ fetful to Gɔd we pɔsin na di kɔngrigeshɔn sin

If wi kam fɔ no se sɔmbɔdi na di kɔngrigeshɔn dɔn kɔmit siriɔs sin, wetin wi nid fɔ du? Tink bɔt wan prinsipul we Gɔd bin gi na in Lɔ to di Izrɛlayt dɛn. Rid Lɛvitikɔs 5:​1.

Akɔdin to da vas de, if wi kam fɔ no se pɔsin dɔn kɔmit siriɔs sin, wi fɔ tɛl di ɛlda dɛn wetin wi no. Bɔt bifo wi du dat, i go fayn fɔ lɛ wi ɛnkɔrej di pɔsin we du bad fɔ lɛ insɛf go to di ɛlda dɛn ɛn kɔnfɛs in sin. If i nɔ du dat, di fetful we wi fetful to Jiova go mek wi tɛl di ɛlda dɛn wetin wi no. We wi du dis, aw dat de sho se wi rili lɛk . . .

• Jiova Gɔd?

• di pɔsin we dɔn sin?

• ɔda pipul dɛn na di kɔngrigeshɔn?

 5. Nɔ gɛt ɛnitin fɔ du wit Babilɔn di Gret

 WETIN YU DƆN LAN?

Fɔ kɔntinyu fɔ de biɛn Jiova, wi nid fɔ avɔyd fɔ de kip kɔmpin wit di wan dɛn we dɔn kɔmɔt biɛn am. Wi nid fɔ pul an pan ɛnitin we gɛt fɔ du wit lay lay rilijɔn.

Rivyu

• Wetin mek wi nɔ fɔ wach, rid, ɔ lisin to wetin apɔstet dɛn de tɔk?

• Aw wi fɔ trit di wan dɛn we se dɛn nɔ want fɔ bi Jiova Witnɛs dɛn igen?

• Aw wi go fala di wɔnin fɔ kɔmɔt insay lay lay rilijɔn?