Kilisiɔŋaa tonyaa kɛɛsiaŋ o kɔl maa fɛŋ bɛɛ a chɛl mi nyɛ o nyɛ, ɔɔ wana o wana kuuna nda Chɛhowa piɛiyo le. Naapum lende num bɛɛ yiyaŋ ni. Chɛhowa yeema num ma chɔm lo lechoo wo o ndu lo. (Nuawɔ Koloniko Tasoo 28:9.) Kɛ sɔɔŋ kuɛɛ tosa yɛ ma mal Chɛhowa piɛiyo nduyɛ, yɛɛ ŋ nɔ yɛ ma tosa le ma chɔulaba muŋ?

1. Vɛɛ wanaa cheleŋnda nɔla yɛ ma tosa miŋ kɛɛ lo lechoo wo chɔmndo o Chɛhowa lo?

Mi waŋnda apum kindiŋ le naa kuunaa Chɛhowa piɛiyo. Nɛɛ yaa cho yɛ waŋnda haa? Mi wanaa mal tonyaa wa apum dimi choolaŋ a kɔɔna Chɛhowaa okɔɔ, le naa faŋaa o laalaŋndo choo. Waŋnda haa simul tonyaa ni. O faŋaŋndɔ o nda kɔɔli, mi simlachiaa lepiɛiya apum bɛɛ kei choolaŋ dimioo a naa okɔɔ. Le mi wanaa kindu lapi o tonyaa niŋ te wa mal Chɛhowa piɛiyo nda tosa hei ni. I cho bɔɔ suɛi kpundɛ le suukaŋndo a waŋnda haa, yaula ndalaŋ nuaa, yooŋgula ndalaŋ, tɛɛŋgii ndɛi, a vidueila ndalaŋ. Mɛɛ Chiisu wa suɛi a wanaa kindiŋ le waŋnda kuunaa Chɛhowa piɛiyo wa okɔɔ, mbo dimi aa: “La saalaŋ nda le. Kanifuule, a cho ko maa wanaa sumɛiyaa cho chaaŋaa ndaa wanaa sumɛiya tindaa seelullo wa. Te wana sumɛiyo seelul pɛ wana sumɛiyo tindaa, nda ŋiɔɔŋ kpou a cho lakɔ delɔɔ o sooŋndo niŋ.”​—Maatiu 15:14.

Kɛ te o wa yɛ mi wana naŋ sina wo kɛɛsiaa maa o yeema lɛ mbo wa Sei Chɛhowa le? Miŋ tambu kɔl tau te o yɔŋ pɛ mi wanayɛi nɛi ɔɔ chaaŋ naa tosa kɛɛsiaa waa ndoo. O hei niŋ, miŋ luɛi niko o yɔm tɛndaa tɛɛŋ, te wana koŋ ɔɔ Chɛhowa naŋ cho lo kɔɔli ni. Kɛ ŋ nɔ miŋ kɛɛsiaŋ o kɔl le lo lechoo wo chɔmndo o Mɛlɛka lo mbo hiou wana o wana cheleŋ. (Maatiu 10:37) Lelaŋ, ŋ nɔ miŋ diikuŋ sila Chɛhowaa le wanaa waa ndoo kiolɔŋndo kɔɔli.​—Nuawɔ 1 Kɔliŋtiaŋ 5:11.

2. Kɛɛsiaa suu kuɛɛ tosa yɛ ndi ikala le lo lechoo wo chɔmndo o Chɛhowa lo?

Kaala naŋ nɔ le Chɛhowa wo nyindu naa ni miŋ fafaŋ nyɛ o nyɛ cho a piɛile lachoowaleŋ okɔɔ. Le hei, wali o wali chiɛɛliaŋ pɛ a piɛile lachoowaleŋ, ŋ nɔ miŋ tosa ndu le. Nduyɛ, kɔɔna kɛ kɛ ɔɔ nyɛ o nyɛ chiɛɛliaŋ vɛlɛ pɛ a piɛile lachoowaleŋ, ŋ nɔ miŋ wa leniŋ te. Chɛhowa sila naa aa: “Wanaa niaa, la fula o [Babilɔŋ Bɛndoo] niŋ.”​—Sɔɔŋ Chɔɔmaŋndoŋ 18:​2, 4.

 CHƆƆLU YAASIAA

3. Mandaŋ a wanaa pɛɛku pɛɛkula lachoowalaŋ nda

Yɛɛ naŋ nɔ yɛ miŋ tosa, te ŋ tuei pɛ waŋnda sɔɔŋ wɔɔŋndoŋ dimioo a kɔɔna Chɛhowaa okɔɔ? Nuawɔ Pulɔwaa 14:​15, okoŋ mi la suukaŋ o nyunaa hoo choo:

• Le yɛɛ naŋ nɔ yɛ miŋ laalaŋ sɔɔŋ waŋnda dimi woŋ kpou le?

Nuawɔ 2 Chɔŋ 10, okoŋ mi la suukaŋ o nyunalaŋ ndaŋ choo:

• Vɛɛ naŋ nɔ yɛ miŋ bii wanaa simul tonyaa wa?

• O yɔŋ bɛɛ miŋ ve suukaŋ sakpo a wanaa simul tonyaa wa le, o nɛi cheleŋ kuɛɛ choo naŋ sɔla yɛ pɛɛkula ndalaŋ?

• O yiyaŋ numndo niŋ, vɛɛ kɔllo wa yɛ Chɛhowa te waŋnda wa pɛ sɔɔŋ wɔɔŋndoŋ dimioo a ndu okɔɔ vɛlɛ a kɔɔna ndɔɔ miŋ yaŋ nilaŋ?

4. Chɔm lo lechoo wo o Mɛlɛka lo te waŋndo o kundaa niŋ tosa pɛ hakioo

Te ŋ sina pɛ maa wana cho o kundaa niŋndo tosa haki wɔɔŋ wɔɔŋndo, yɛɛ naŋ nɔ yɛ miŋ tosa? Tofawɔ sawa mandaa Mɛlɛka yɔŋgu Isɔluɛiya o sindɔɔ niŋndo. Nuawɔ Lɛvitikɔɔ 5:1.

A mɛɛ naŋ che o bolle Baabuileŋ ndeŋ niŋ yɛ, te ŋ sina pɛ maa waŋndo tosa haki wɔɔŋ wɔɔŋndo, ŋ nɔ miŋ dimul bɛnduaa nyɛ o nyɛ naŋ sina a ndi okɔɔ. Kɛ tuupa miŋ dimul nda, ŋ nɔ fɛŋ miŋ dimul wana koŋ le mi ndupila kɔ chɔɔmuu yɔŋ ndɔ wɔɔŋndo o nda lo. Te o kɛɛ pɛ, ŋ nɔ miŋ chɔm lo lechoo wo o Chɛhowa lo miŋ kɔ dimul bɛnduaa nyɛ naŋ sina wo. Vɛɛ hei chɔm yɛ maa ŋ kaala . . .

• Chɛhowa Mɛlɛka?

• wana tosa koŋ hakioo wo?

• wanaa cho o kundaa niŋnda?

 5. Fafaŋ Babilɔŋ Bɛndoo o nɛi o nɛi niŋ

 SƆƆŊ KULLOŊ

Le miŋ hiou lachi a lo lechoo wo chɔmndo o Chɛhowa lo, ŋ nɔ miŋ holnuŋ wanaa kɛɛ lo lechoo wo chɔmndo o ndu lo wa le. Ŋ nɔ vɛlɛ miŋ soli balaŋ po o piɛile lachoowaleŋ niŋ.

Nyunala miiŋgaa choo laŋ

• Le yɛɛ naŋ nɔ yɛ miŋ fafaŋ nilaŋ yaŋɔɔ o sɔɔŋ wanaa simul tonyaa wa, vidueila ndalaŋ, a yaula ndalaŋ?

• Vɛɛ naŋ nɔ yɛ miŋ bii wanaa wa paandu Seiyaa Chɛhowaa kɛ ma kɛɛ tonyaa wa?

• Vɛɛ naŋ chɔm yɛ maa ŋ soli balaŋ o piɛile lachoowaleŋ niŋ?