ခရံာ်ဖိအမ့ၢ်အတီတဖၣ်န့ၣ် ပာ်လီၤသး ဂၢၢ်ဂၢၢ်ကျၢၤကျၢၤလၢ အဝဲသ့ၣ် တပျဲ တၢ်တမံၤဂ့ၤတမံၤဂ့ၤ မ့တမ့ၢ် ပှၤတဂၤဂ့ၤတဂၤဂ့ၤ ကမၤပတုာ်အဝဲသ့ၣ် လၢကဘူၣ်ထီၣ်ဘါထီၣ် ယဟိဝၤယွၤဘၣ်. ပနာ်သပှၢ်တၢၢ်လၢ နၤစ့ၢ်ကီး နကပာ်လီၤနသးဒ်န့ၣ်လီၤ. နတၢ်သးတီန့ၣ် ယဟိဝၤယွၤ ပာ်လုၢ်ပာ်ပှ့ၤဝဲ. (ဖး ၁ ကွဲးနီၣ်တၢ် ၂၈:၉.) ဘၣ်ဆၣ် တၢ်အိၣ်သးလၢ ကမၤကွၢ် နတၢ်သးတီဒီး ယဟိဝၤယွၤန့ၣ် ကမ့ၢ်မနုၤတဖၣ်လဲၣ်. ဒီးနလဲၤခီဖျိအီၤကန့ၢ်အဂီၢ် တၢ်မနုၤကမၤစၢၤနၤလဲၣ်.

၁. ပှၤတနီၤ ဂုာ်ကျဲးစၢး မၤဟးဂီၤ ပတၢ်သးတီဒီး ယဟိဝၤယွၤဒ်လဲၣ်.

ပှၤတနီၤန့ၣ် ကဂုာ်ကျဲးစၢး မၤပတုာ်ပှၤဒ်သိး ပသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤ. ပှၤလၢ ကမၤတၢ်အၢတၢ်သီ ဒ်အံၤတဖၣ်န့ၣ် ကမ့ၢ်မတဂၤသ့ၣ်တဖၣ်လဲၣ်. ပှၤတနီၤန့ၣ် ပာ်တ့ၢ်ကွံာ် တၢ်မ့ၢ်တၢ်တီ ဒီးဒ်သိး ကမၤဟးဂီၤပတၢ်နာ်အဂီၢ် အဝဲသ့ၣ် တဲတၢ်လံၣ်တၢ်လီဝဲ ဘၣ်ဃးဒီး ကစၢ်ယွၤအတၢ်ကရၢကရိ. ပှၤသ့ၣ်တဖၣ်အံၤန့ၣ် ပကိးအဝဲသ့ၣ်လၢ ပှၤလၢအထီဒါက့ၤတၢ်မ့ၢ်တၢ်တီ. တကးဒံးဘၣ် တၢ်ဘူၣ်တၢ်ဘါ ခိၣ်နၢ်တနီၤန့ၣ် အဝဲသ့ၣ်အဲၣ်ဒိးလၢ ပှၤလၢ အတပလီၢ်အသးဘၣ်တဖၣ် ကပတုာ် ဘူၣ်ထီၣ်ဘါထီၣ် ယဟိဝၤယွၤ အဃိ အဝဲသ့ၣ် တဲလံၣ်တဲလီဝဲပဂ့ၢ်. ပမ့ၢ်တဲအါတၢ်ဒီး ပှၤလၢအထီဒါတၢ်တဖၣ်, ဖးအဝဲသ့ၣ် အလံာ်အလဲၢ်, လဲၤနုာ်လီၤလၢ အဝဲသ့ၣ် ပှာ်ယဲၤသန့ (ဝဲဘ်ဆးထ်) မ့တမ့ၢ် ကွၢ်အဝဲသ့ၣ် အတၢ်ဂီၤမူန့ၣ် အလီၤဘၣ်ယိၣ်ဒိၣ်မး. ဘၣ်ဃးဒီး ပှၤလၢအဂုာ်ကျဲးစၢး မၤဟးဂီၤပတၢ်သးတီဒီး ယဟိဝၤယွၤန့ၣ် ယ့ၣ်ၡူးတဲဝဲလၢ “ကနၣ်ဃုာ် အဝဲသ့ၣ်တဂ့ၤ. အဝဲသ့ၣ်န့ၣ် မ့ၢ်ပှၤမဲာ်တထံၣ်တၢ်လၢ အဟံးစုနဲၣ်ကျဲတၢ်လီၤ. ပှၤလၢ အမဲာ်တထံၣ်တၢ်တဂၤ မ့ၢ်ဆှၢပှၤလၢ အမဲာ်တထံၣ်တၢ်တဂၤန့ၣ် အဝဲသ့ၣ်ခံဂၤလၢာ် ကလီၤတဲာ်လၢ တၢ်ပူၤလီၤ.”​—မးသဲ ၁၅:၁၄.

ပှၤလၢပအဲၣ်အီၤတဂၤ မ့ၢ်ဆၢတဲာ်လီၤအသးလၢ အတအဲၣ်ဒိးကဲ ယဟိဝၤပှၤအုၣ်အသး တဂၤလၢၤဘၣ်မီၤ. ပှၤလၢပအဲၣ်အီၤတဂၤ မ့ၢ်ဆၢတဲာ်လီၤအသး ဒ်အံၤန့ၣ် ပသးကဘၣ်ဒိ. ဘၣ်သ့ၣ်သ့ၣ် ပှၤတဂၤန့ၣ် ကဂုာ်ကျဲးစၢး မၢဆူၣ်ပှၤလၢ ပကဃုထၢအီၤ မ့တမ့ၢ် ဃုထၢယဟိဝၤယွၤ. အဃိ ပကဘၣ်ပာ်လီၤပသး ဂၢၢ်ဂၢၢ်ကျၢၤကျၢၤလၢ ပကတီဒီးကစၢ်ယွၤ အါန့ၢ်ဒံး တၢ်အဂၤခဲလၢာ်. (မးသဲ ၁၀:၃၇) ပမၤထွဲ ယဟိဝၤယွၤ အတၢ်မၤလိာ် အဃိ ပတရ့ဒီး ပှၤတဂၤန့ၣ်လၢၤဘၣ်.​—ဖး ၁ ကရံၣ်သူး ၅:၁၁.

၂. ပသးတီဒီး ယဟိဝၤယွၤန့ၣ် ပပာ်ဖျါထီၣ်လၢ ပတၢ်ဆၢတဲာ်တဖၣ် ကသ့ဒ်လဲၣ်.

ယဟိဝၤယွၤ ဟ့ၣ်ပလီၢ်ပှၤလၢ “ယပှၤဂီၢ်မုၢ်သ့ၣ်ဧၢ . . . ဟးထီၣ်ကွံာ်လၢ [ဘၤဘူၤလိၣ်ဖးဒိၣ်] အပူၤတက့ၢ်.” (လီၣ်ဖျါ ၁၈:​၂, ၄.) ခီဖျိလၢ ပအဲၣ်ယဟိဝၤယွၤအဃိ ပတမၤဘၣ်ဃးပသးဒီး တၢ်ဘူၣ်တၢ်ဘါကမၣ် နီတစဲးဘၣ်. အဃိ ပတၢ်ဖံးတၢ်မၤမ့ၢ်ဂ့ၤ, တၢ်ကရၢကရိ လၢပအိၣ်လၢအပူၤ တဖုဂ့ၤတဖုဂ့ၤ ဒီးတၢ်တမံၤဂ့ၤတမံၤဂ့ၤ လၢပမၤအီၤန့ၣ် တဘၣ် ဘၣ်ဃးလိာ်သးဒီး တၢ်ဘူၣ်တၢ်ဘါ လၢအကမၣ်ဘၣ်.

 ဃုသ့ၣ်ညါအါထီၣ်

၃. ပလီၢ်သးလၢ သရၣ်လၢ အသိၣ်လိကမၣ်တၢ်

ပမ့ၢ်နၢ်ဟူ ပှၤတဲဆါ ယဟိဝၤယွၤ အတၢ်ကရၢကရိန့ၣ် ပကြၢးမၤဒ်လဲၣ်. ဖး ကတိၤဒိ ၁၄:၁၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• တၢ်လၢပနၢ်ဟူဘၣ်တဖၣ်န့ၣ် ဘၣ်မနုၤအဃိ ပတဘၣ်နာ်အီၤ ခဲလၢာ်ဘၣ်လဲၣ်.

ဖး ၂ ယိၤဟၣ် ၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ပှၤလၢအထီဒါက့ၤတၢ်မ့ၢ်တၢ်တီန့ၣ် ပကြၢးရ့ဒီးအဝဲသ့ၣ်ဧါ.

• ပှၤလၢအထီဒါက့ၤတၢ်မ့ၢ်တၢ်တီန့ၣ် ပမ့ၢ်တရ့ဒီးအဝဲသ့ၣ် လၢပနီၢ်ကစၢ်ဘၣ် သနာ်က့ ဒ်သိး ပသုတရ့ဘၣ်ဖုး အဝဲသ့ၣ်တဂ့ၤအဂီၢ် ပကဘၣ်ပလီၢ် ပသးဒ်လဲၣ်.

• ဖဲပှၤတဲဆါ ယဟိဝၤယွၤ မ့တမ့ၢ် အတၢ်ကရၢကရိအခါ ပမ့ၢ်ကနၣ်အီၤန့ၣ် နဆိကမိၣ် ယဟိဝၤယွၤ ကသးခုဧါ.

၄. ဒီပုၢ်ဝဲၢ်တဂၤ မ့ၢ်မၤကမၣ်ဘၣ်တၢ် သနာ်က့ တီဒီးကစၢ်ယွၤ ထီဘိတက့ၢ်

ပမ့ၢ်သ့ၣ်ညါလၢ ပှၤတဂၤဂၤလၢ တၢ်အိၣ်ဖှိၣ်အပူၤ မၤတၢ်ကမၣ်ဖးဒိၣ်န့ၣ် ပအိၣ်ဒီးမူဒါလၢ ပကဘၣ်မၤမနုၤလဲၣ်. ပကကွၢ်သကိး ကစၢ်ယွၤ အတၢ်သိၣ်တၢ်သီ လၢအဟ့ၣ်လီၤဝဲ ပှၤအံၣ်စရ့လးဖိလၢပျၢၤတဖၣ်. ဖး ၃ မိၤၡ့ ၅:၁.

ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ပမ့ၢ်သ့ၣ်ညါလၢ ပှၤတဂၤဂၤ မၤတၢ်ကမၣ်ဖးဒိၣ်န့ၣ် ပကဘၣ်တဲဘၣ် တၢ်အိၣ်ဖှိၣ်သးပှၢ် တၢ်လၢပသ့ၣ်ညါတဖၣ်. ဘၣ်ဆၣ် တချုးလၢ ပတဲဘၣ် တၢ်အိၣ်ဖှိၣ်သးပှၢ်ဒံးဘၣ်န့ၣ် ပမ့ၢ်မၢဆိ ပှၤလၢအမၤကမၣ်တၢ်တဂၤ လဲၤတဲဖျါထီၣ်အတၢ်ကမၣ် လၢအနီၢ်ကစၢ်န့ၣ် မ့ၢ်ဝဲ ပပာ်ဖျါထီၣ် တၢ်အဲၣ်လၢအဖီခိၣ်. သနာ်က့ အမ့ၢ်တလဲၤတဲတၢ်ဒီး တၢ်အိၣ်ဖှိၣ်သးပှၢ်ဘၣ်န့ၣ် ပကဘၣ်ပာ်ဖျါထီၣ် ပတၢ်သးတီဒီး ယဟိဝၤယွၤ ခီဖျိ ပလဲၤတဲဘၣ် တၢ်အိၣ်ဖှိၣ်သးပှၢ် လၢတၢ်လၢပသ့ၣ်ညါတဖၣ်. ပမၤဒ်န့ၣ်အဃိ မ့ၢ်ဝဲ ပပာ်ဖျါထီၣ် တၢ်အဲၣ်ဒီးတၢ်သးတီ.

• ပပာ်ဖျါထီၣ် တၢ်သးတီ လၢယဟိဝၤယွၤ အဖီခိၣ်ဒ်လဲၣ်.

• ပပာ်ဖျါထီၣ် တၢ်အဲၣ် လၢပှၤလၢ အမၤတၢ်ကမၣ်တဂၤန့ၣ် အဖီခိၣ်ဒ်လဲၣ်.

• ပပာ်ဖျါထီၣ် တၢ်သးတီ လၢပှၤလၢ တၢ်အိၣ်ဖှိၣ်အပူၤတဖၣ် အဖီခိၣ်ဒ်လဲၣ်.

 ၅. ဟးထီၣ်ကွံာ်လၢ ဘၤဘူၤလိၣ်ဖးဒိၣ်အပူၤ

 တၢ်ဂ့ၢ်လၢအရ့ဒိၣ်

ပမ့ၢ်အဲၣ်ဒိး တီဒီးယဟိဝၤယွၤ ထီဘိန့ၣ် ပတဘၣ် မၤဘၣ်ဃးလိာ်ပသးဒီး ပှၤလၢ အတတီဒီးအီၤဘၣ်. တကးဒံးဘၣ် ပတဘၣ် မၤဘၣ်ဃးလိာ်သးဒီး တၢ်ဘူၣ်တၢ်ဘါလၢအကမၣ် နီတစဲးလၢၤဘၣ်.

တၢ်ကွၢ်ကဒါက့ၤ

• ဘၣ်မနုၤအဃိ ပတဘၣ် ဖး, ကွၢ် မ့တမ့ၢ်ဒိကနၣ် တၢ်ဂ့ၢ်တၢ်ကျိၤလၢ ပှၤလၢအထီဒါက့ၤ တၢ်မ့ၢ်တၢ်တီတဖၣ် ထုးထီၣ်ဝဲဘၣ်လဲၣ်.

• ပှၤလၢ အတအဲၣ်ဒိးကဲ ယဟိဝၤပှၤအုၣ်အသး လၢၤဘၣ်န့ၣ် ပကြၢးရ့ဒီးအီၤဒံးဧါ.

• တၢ်ဟ့ၣ်ပလီၢ်လၢအမ့ၢ် ဟးထီၣ်ကွံာ်လၢ တၢ်ဘူၣ်တၢ်ဘါလၢ အကမၣ်အပူၤန့ၣ် ပမၤထွဲအီၤ ကသ့ဒ်လဲၣ်.