Baklisto ya kedika kesalaka ngolo samu na kubika nzila na kima mosi ve to na muntu mosi ve yandi pekisa bau kusambila Yehova. Kondua ntembe nge kekukimonaka mpe mutindu yina. Yehova kebakaka kukuikama na beto na mfunu. (Tanga 1 Bansangu 28:9.) Yinki mambu lenda tula kukuikama na beto na yandi na kumekama, mpe yinki mutindu beto lenda nunga yau?

1. Yinki mutindu bantu yankaka lenda tula kukuikama na beto na Yehova na kumekama?

Bantu yankaka kemeka kupekisa beto beto sadila Yehova. Banani lenda sala diambu ya mutindu yina? Bantu yankaka yina mebikaka kedika ketubaka mambu ya luvunu samu na nkubukulu ya Nzambi samu na kubebisa kiminu na beto. Bakebokidilaka bau bapengui. Diaka, bamfumu ya mabundu yankaka kepanzaka mambu ya luvunu yina metadila beto samu na kutinda bayina kesala keba ve babika kedika. Yakele kivonza samu na beto kusolola na bapengui yango, kutanga babuku na bau, to kukota na basite ya Internet na bau, to kutala bavideo na bau. Na kutadila bantu yina kelembisaka kukuikama ya bantu yankaka samu na kusadila Yehova, Yesu tubaka: ‘Beno bika bau. Bakele bantuadisi yina kele meso ya kufua. Na yau kana muntu ya kufua meso kena tuadisa muntu ya kufua meso, bau zole kekubua na dibulu.’—Matayo 15:14.

Yinki beto fueti sala kana muntu mosi beto mezaba mebaka nzengolo ya kuvuanda diaka Mbangi ya Yehova ve? Yalenda sala beto ntima mpasi kana muntu yina mesala yau kele muntu yina beto zolaka mingi. Muntu yango lenda tinda beto na kingolo beto pona kati na yandi na Yehova. Beto fueti sala ngolo samu na kubikana ya kukuikama na Nzambi kuluta bima nionso yankaka. (Matayo 10:37) Na yau beto kezitisa nsiku ya Yehova yina melomba beto bika sangana na bantu ya mutindu yina.—Tanga 1 Bakorinto 5:11.

2. Yinki mutindu banzengolo na beto mosi lenda tula kukuikama na beto na Yehova na kumekama?

Nzola na beto na Yehova ketinda beto beto manga kusangana na mabundu ya luvunu. Na yau yavuanda kisalu to bankubukulu na beto to bisalu na beto yankaka fueti tula beto ve na nguizani na mabundu ya luvunu. Yehova mekebisa beto ti: ‘Bantu na munu, beno bima na kati na [Babiloni ya Nene].’—Kusonga 18:2, 4.

 KOTA NA MPINDA

3. Keba na banlongisi ya luvunu

Yinki beto fueti sala kana beto mekuwa mambu ya yimbi samu na nkubukulu ya Yehova? Tanga Bingana 14:15, mpe na manima tadila kiuvu yayi:

• Samu na yinki beto kesalaka keba na kundimina ve diambu nionso yina beto mekuwa?

Tanga 2 Yoane 10, mpe na manima tadila biuvu yayi:

• Yinki mutindu beto fueti tadila bapengui?

• Atako beto kekutanaka mbala mosi ve na bapengui, yinki mutindu beto lenda wila malongi na bau?

• samu na nge, yinki mutindu Yehova kekukimona kana beto kena kutula dikebi na bampova ya yimbi yina kena kutubuka samu na yandi to samu na nkubukulu na yandi?

4. Bikana ya kukuikama na Nzambi ntangu mpangi mosi mesala disumu

Kana beto mekuwa ti muntu mosi na kati ya kimvuka mesala disumu mosi ya nene, yinki diambu beto fueti sala? Tadila nsikudukusu yayi mekatuka na minsiku yina Nzambi pesaka Yisaele ya ntama. Tanga Levi 5:1.

Mutindu verse yango memonisa yau, kana beto mekuwa ti muntu mosi mesala disumu mosi ya nene, beto fueti tubila bankulutu diambu yina beto mezaba. Tekila kusala yau, yakevuanda mbote kukindisa muntu yina mesala disumu yandi mosi kuenda na bankulutu samu na kufunguna disumu na yandi. Kana yandi sala yau ve, kukuikama na beto na Yehova ketinda beto beto tubila bankulutu diambu yina beto mezaba. Yinki mutindu diambu yango kemonisaka kukuikama na beto samu na . . .

• Yehova Nzambi?

• muntu yina mesala disumu?

• bampangi yankaka na kimvuka?

 5. Vuanda ntama ya Babiloni ya Nene

 BUNKUFI

Samu na kubikana ya kukuikama na Yehova, beto fueti manga kuvuanda bankundi ya bantu yina kezitisaka yandi ve. Beto fueti kabuana diaka mbotembote na mabundu ya luvunu.

Mvutukulu

• Samu na yinki beto fueti tala ve, tanga ve, to kuwa ve mabanza ya bapengui?

• Yinki mutindu beto fueti tadila bayina zola diaka ve kuvuanda Bambangi ya Yehova?

• Yinki mutindu beto lenda tula dikebi na dilongi ya kubima na mabundu ya luvunu?