MURU 58
Dowananive Kala Ororomeleya wa Yehova
Akiristu aimbarimbari katinalola ira muthu kapena yongo iliyetene iwalepeli-e lambela Yehova. Kan’nakaikela ira nanyene munaona eeno. Yehova unosangalala vinjinji aonanga ira munana dowanave kala ororomeleya wa liye. (Welengani 1 Limbili 28:9.) Kodi pivyongo vyiivi vyevyo vinaulepeli-eni kala ororomeleya wa Yehova? Nanga chin’ni inaukami-eni ira kamu-iye kala ororomeleya wa Yehova?
1. Kodi athu amo-iwa kanairi-e avi ira ni-iye kala ororomeleya wa Yehova?
Athu amo-iwa kanofuna nanga-iile tumikela Yehova. Kodi athu anala kanakale aavi? Athu amo-iwa anayo ka-iile tumikela Yehova kanowonga vyonama vyokuza gulu la Mulungu na yolinga yoi na-iyene ni-iye tumikela Yehova. Athu anala kanairiwa ampatuko. Koma teto asogoleli aipembezo amo-iwa kanofalisa vyonama na yolinga yofuna sokoneza athu anayo kanakeda landeyalandeya na vilivyetene ira ka-iye tumikela Yehova. Ninafuneela pewa runi-ana na athu ampatuko, welenga mabukwiwa kapena vyevyo kanalembaathu vaitaneti, ula mawebusaitiwa kapena onela mavidiywiwa. Vowonga vya athu anayo kanairi-a amo-iwa ira ka-iye tumikela Yehova mororomeleya, Yesu eere: “A-iyeni anayo. Aliwa mbaasogoleli o-oona. Eeno akala muthu o-oona unasogolela o-oona fwaye, etene ambin’li kanoza kagwele muzenje.” — Mateyu 15:14.
Nanga munaire avi akala muthu m’mo-iwa unoyo munamuiziwa nyo kanafuna teto kala wa Mboni da Yehova? Vinokala vyovoreya vinjinji akala muthu unoyo ninamuwomeluwana iyo usakulile vyevi. Thawi dimo-i liye unokoza nikanyi-eda ira nisakule vaari va liye na Yehova. Vyaira eeno ninafuneela simikiza murima ira nikaleve ororomeleya wa Yehova kwaranya muthu uliwetene. (Mateyu 10:37) Eeno ninafuneela vwela lamulo la Yehova loi kanigwilizanenga na athu anala. — Welengani 1 Akorinto 5:11.
2. Kodi vyevyo vinasakula iyo vamoywi-u vinairi-e avi ira nikale ororomeleya wa Yehova?
Akala ninawomeluwana Yehova ninoza nipewe panga iliyetene yokuzana na ipembezo yonama. Ninoza nipewe kala kapena inda chito mugulu limo-iliwalene la ipembezo, kapena ira yongo iliyetene yokuzana na ipembezo yonama. Yehova unoniwenjeli-a ira: “Kumamoni [mu Babulo Mulukulu], athwanga.” — Chivumbuluso 18:2, 4.
FUNJEDANI VYOWENJEDELEYA
Onani vyevyo munaire nyo ira uliwetene kaulepeli-eni kala ororomeleya wa Yehova. Munoona teto mwemo munatonyi-edele nyo ira muli ororomeleya wa Yehova vokumamo mu Babulo Mulukulu.
3. Samalani na anamafunji-a onama
Kodi ninafuneela panga n’ni navwa amo-iwa kawonganga vyongo vyotakala vyokuza gulu la Yehova? Welengani Miyambo 14:15, era eeno tapanyani yofuka yo-arelela:
-
Chifukwa n’ni ninafuneela samala ira kanikedenga roromela vilivyetene vyevyo nivwile iyo?
Welengani 2 Yohani 10, era eeno tapanyani vyofuka vyo-arelavi:
-
Malinga na lembali, kodi niirenga n’ni na athu ampatuko?
-
Ngakale ira kaninawaleda mwachindunji na athu ampatuko, kodi ninasokonezeye avi na vyevyo kanafunji-aathu?
-
Kodi munaganiza ira Yehova unavwe avi navuruwananga vyongo vyonama vyokuza liye kapena gulu laye?
4. Mukalengave ororomeleya wa Mulungu muthu m’mo-iwa apanga chimo
Kodi ninafuneela panga n’ni naiziwa ira muthu m’mo-iwa mupingo upanga chimo lilukulu? Onani likundo lelo linafwanyeya mulamulo lelo Mulungu apelekile liye wa Aizarayeli. Welengani Levitiko 5:1.
Mogwilizana na vesili, naiziwa ira muthu m’mo-iwa upanga chimo lilukulu ninafuneela wandela andimuwa vyevyo ninaiziwa iyo vakhaniyo. Komave, naanaire vyevi, ninafuneela muwandela muthu wochimoyo ira adowe aulule eka wa andimuwa vya chimo layelo. Ndiye alepeleya panga vyevi, iyo ninafuneela tonyi-eda ira nili ororomeleya wa Yehova vodowa wonga wa andimuwa. Kodi naira vyevi ninatonyi-eda avi ira nikaana chikondi yororomeleya wa . . .
-
Yehova Mulungu?
-
muthu wochimoyo?
-
athu etene mupingo?
Akala Mkiristu fwinyu uirile vyotakala munafuneela mukami-a
5. Kumamoni mu Babulo Mulukulu
Welengani Luka 4:8 na Chivumbuluso 18:4, 5, era eeno somedani vyofuka vyo-arelavi:
-
Kodi kanditimi-ile zina langa uipembezo yonama?
-
Kodi ndili mu bungwe lelo linaira vyongo mogwilizana na ipembezo imo-iwene?
-
Kodi chito ineyo ndina-inda miyo inokami-eda vyoira vya ipembezo yonama?
-
Kodi viikala vyongo vimo-i vyevyo vinaire miyo ira ndi-iyeleetu panga vyongo vyogwilizana na ipembezo yonama?
-
Akala yofuka imo-iwa ndisomendile ira ee, kodi ndinafuneela chenja vyongo vyiivi?
Vavyongo vyetene vyevyo nitapanyile iyovi, muonechechenga ira vyongo munasakule nyoovyo viukami-engani kaana iguguda murima yowela, koma teto vitonyi-edenga ira muli ororomeleya wa Yehova.
Kodi munaire avi mwangavepiwile ira mupeleke ndalama dokami-eda va chito da chifundo da ipembezo imo-iwene?
ATHU AMO-IWA KANAONGA IRA: “Ninafuneela iziwa vyevyo ampatuko kanaongaathu vyokuza Mboni da Yehova ira nititi-ede imbarimbari.”
-
Kodi munaona ira chizelu panga vyevi? Chifukwa n’ni munaonga eeno?
VYEVYO NIFUNJEDILE IYO
Ira nidowenave kala ororomeleya wa Yehova ninafuneela pewa gwilizana na athu anayo kaali ororomeleya wa liye. Ninafuneela teto pewa panga iliyetene yogwilizana na ipembezo yonama.
Vyofuka Vyoweli-eda
-
Chifukwa n’ni kaninafuneela onela, welenga kapena vuruwana vyevyo ampatuko kanafunji-aathu?
-
Kodi ninafuneela niirenga avi vyongo na athu anayo kasakulile ira katikale a Mboni da Yehova?
-
Kodi ninatonyi-ede avi ira ninovwela chenjezo loi nikumemo muipembezo yonama?
ONANI VIMO-I
Onani vyevyo munafuneela nyo panga athu amo-iwa kaonganga vyonama vyokuza Mboni da Yehova.
“Kodi Mukudziwa Nkhani Yonse?” (Nsanja ya Olonda, August 2018)
Kodi munaiziwe avi ira mabungwe kapena vyongo vimo-i vinogwilizana na Babulo Mulukulu?
Kodi pivyongo vyiivi vyevyo athu amo-iwa oruni-a kairileathu vofuna fooki-a iroromelo yi-u?
Mukhani yoi “Kuyambira Ndili Mwana Ndinkafunitsitsa Kudziwa Mulungu,” welengani khani ya wasembe wa ipembezo ya Chishinto unoyo akumile mu ipembezo yonama.
