ISOMO 58
Sigala Mukatizia ku Yehowa
Bakristo ba bulili tabekusiga aba busi bumozi kintu aba muntu abigye bwida bwabo gamozi na Yehowa. Lebelebe, u b’ukwijungwa nugwe bubo. Yehowa ekukutya bukatizia bwobe. (Soma 1 Nkiko 28:9.) Bikizi binakita bube bubibu kusigala bakatizia ku Yehowa, nu kikizi kinatukasya?
1. Bango benakita kikizi kwa kutulekanukya na Yehowa?
Bantu bamozi bageleke kutukita tusige kukambela Yehowa. Banazi benakita bubo? Bantu basigile kukambela Yehowa bekusambalaga misagu za buza ku kabamba k’iketelo lyage kwa kubigya bukatizio bweitu. Babo bantu bekumanwa baguni. Nu lingo, bakulu bamozi ba madini bekusambalaga buza ku kabamba keitu kwa kukita Bakristo beteli meiso basige kukambela Yehowa. Buli itega kweitu kwenda myango na baguni, kusoma bitabu byabo, kwingila aba kulonda misagu ku site zabo za enternete nu kulola video zabo. Yesu atendile buno ku kabamba ka babo bekutambya bango mutima buno tababe bakatizia kwa kukambela Yehowa: “Basigazi: beli basondelezia . . . byuku. Ndi kyuku kikusondelezia kingo, nti bakoloke bobabili mu muzinga.”—Matayo 15:14.
Wakite kikizi ndi muntu uwamenya isombolela kutaba lingo Mulongeki wa Yehowa? Buneinia nunse mutima kumona muntu utwatunda akita bubo. Muntu wongo enatukandika kusombola ndi twasigale bakatizia kweli aba ku Yehowa. Gantata na binsania twatunganana kusombola kusigala bakatizia ku Yehowa. (Matayo 10:37) Ukinsa tukwanza ikakizio lya Yehowa lya kutagomyana aba kukita bulemba na bantu anga babo.—Soma 1 Bakorinto 5:11.
2. Bulamuzi bukizi bunalosya buno tuli bakatizia ku Yehowa?
Lutundo lweitu ku Yehowa lwatusinge kwibembukya na binsania bili na m’ungwano n’idini lya buza. Tatwatunganana kukita mulimo, kukambela iketelo ly’idini aba kukita bingo bili na m’ungwano n’idini lya buza. Yehowa atubula bunee: “Bantu bane tukazi kwage [Babiloni Munene].”—Kulolesibwa 18:2, 4.
TUMENYININE
Menya buni b’uneibembukya na muntu unsania unakukita ntube mukatizia ku Yehowa. Lola lingo buni b’unalosya buno uli mukatizia ku Yehowa kwa kwidekanukya na Babiloni Munene.
3. Ube meiso na beigisya ba buza
Twatunganana kukita kikizi ndi tungwa ku musagu wa buza ku kabamba k’iketelo lya Yehowa? Soma Misumo 14:15, nu kusila ibuzye luno lubuzya:
-
Kabamba kakizi tatwatunganana kusasya kukatizia binsania bitungwa kubyo?
Soma 2 Yoana 10, nu kusila ibuzye zeno mbuzya:
-
Buni butwatunganana kumona baguni?
-
Aba buno tatunezezya na baguni kwa kwikala nabo gamozi, tunabembuka kungwilila meigisya mabo mu ingo nzila nkizi?
-
Ku makengelo mobe, Yehowa enajungwa buni ndi twategekela kutuzi ku misagu za buza zikwekelwa ku kabamba kage nu ku iketelo lyage?
4. Ube mukatizia ku Kalaga ndi Mukristo munyobe akita bwagi
Ndi wamenya buno Mukristo kishembe akita bwagi bunene mu ikundamano, watunganana kukita kikizi? Lola kanuni katukila mu mulembe wakasile Kalaga ku Baisraeli, wakalazi. Soma Balawi 5:1.
Anga bwalosya lino isanzo, ndi twamenya muntu kishembe wakita bwagi bunene, twatunganana kusolela bakungu b’ikundamano bibyo bitwamenya. Lwabusio lwa kukita bubo, bwabe busoga kumusolela buno ende winyene kumona bakungu b’ikundamano nu kwigonga bwagi bwage. Ndi ntekukosya kukita bubo, nti twalosye buno tuli bakatizia ku Yehowa kwa kwenda kusolela bakungu bibyo bitwamenya. Kabamba kakizi kukita bubo kwalosye buno tuli na lutundo ku . . .
-
Yehowa Kalaga?
-
muntu wakitile bwagi?
-
bango mu ikundamano?
Ndi munyobe Mukristo akita bwagi, umukasye!
5. Idekanukye na Babiloni Munene
Soma Luka 4:8 nu Kulolesibwa 18:4, 5, nu kusila akula ku zeno mbuzya:
-
Ndi izina lyane liki lyabezaga gesamba bakatizia b’idini lya buza?
-
Ndi nikukamba mu iketelo lili na m’ungwano n’idini lya buza?
-
Ndi mulimo unikukitaga ukukasya idini lya buza mu nzila kishembe?
-
Ndi kuli bingo binikukitaga mu kalamo kane binatunganana kwidekanukya kubyo n’idini lya buza?
-
Ndi nitabizya buno niki nakitaga kitondo kimozi ku bitondo byatendela zeno mbuzya, natunganana kukita migaluko mikizi?
Mu zezo nkita insania, kata bulamuzi bwakukasye kusigala na kalenganio kasoga nu kulosya buno uli mukatizia ku Yehowa.
Wakite buni ndi wasegwa kulisya nkaso ku mponga zikukitwa n’idini lya buza?
NDI MUNTU AKUSOLELA BUNEE:“Natunganana kumenya bibyo bikutendaga baguni ku kabamba ka Balongeki ba Yehowa buno nimenye buni buninatendela bulili.”
-
Ndi mamo makengelo meli masoga? Kabamba kakizi watenda bubo?
MAKENGELO MANENE
Kwa kusigala bakatizia ku Yehowa, twatunganana kwibembukya na m’ungwano na baguni. Twatunganana lingo kwidekanukya n’idini lya buza mu nzila insania.
Mbuzya za kwikengelesya
-
Kabamba kakizi tatwatunganana kulola video, kusoma bitabu aba kungwilila misagu za baguni?
-
Buni butwatunganana kumona babo betekutunda lingo kuba Balongeki ba Yehowa?
-
Buni butunanza ikakizio lya kutuka mu idini lya buza?
LONDA LINGO
Lola buni b’unakita ndi wungwa ku misagu za buza zikwekelwa Balongeki ba Yehowa.
“Ndi Lebelebe Uli na Misagu Insania?” (Munara wa Mulinzi, Mwezi wa 8, 2018)
Buni b’unamenya iketelo aba mulimo ukukasya Babiloni Munene?
Buni bukukitaga baguni kwa kutambya bukatizio bweitu?
Mu musagu “Nalondaga Kalaga Kutukila Bwana Bwane,” lola buni bwakitile patele umozi w’idini lya Shinto kwa kwidekanukya n’idini lya buza.
“Biblia Bikugalukyaga Kalamo ka Bantu” (Munara wa Mulinzi, 1 Mwezi wa 7, 2011)
