Bbʉbbʉ Wakristo nzɨ adi ribba ddikpa ritsi ma, inga ie ma cho ndima ronga tso ro ddi Yova dho ndima njínji nari ró ri. Ko churi nari kʉ ni ma adi ni mbu fø i. Yova adi ni tøni chi ndi dho nari nja mana na bbo. (Azø 1 Mambo ya Nyakati 28:9.) Addui ká ka ndi liri rie kpakpa ni tøni chi Yova dho, ndirigoti ni tsotso ká addu ka ndi kó?

1. Nja ndrŭ ká ka ndima cho ko ronga tso ngbaribbai ndiro nzɨ ko tøni chi Yova dho ró?

Nja ndrŭ ka ndima cho ko ronga tso cho Yova dho ko njínji nari ró. Føri ka ndi njí nari ká kʉ ie ma? Nja kʉ ná ndrŭ bba Yova dho ndima njínji nari tso bba ndirigoti kpa adi kali dhi loti Yova dzá tengenezo djo ndiro kodhó udha djødjø d’e. Fø kpa le adi nzi waasi. Godhé dini nǎ bbobbonga ma adi kali dhi loti ddi ko djo dhonalo kpa riji nga kʉ krr ná ndrŭ bbá Yova dho ndima njínji nari tso bbá. Ri kʉ bblo nzɨ ko di loti fø kpa na, nzɨ ko zø kpadhó buku ma, nzɨ ko ra kpadhó site djo ma inga nzɨ ko nja kpadhó video maddi. Nzá jiri le njínji chi le tøni Yova dho ro ná ndrŭ djo Yesu pongʉeri ɨ: “Anibba kpa bba. Føri kʉ nga nyǒ kʉ ná kpa chutso ddá ri. Njati nga nyǒ kʉ ná ke ddá chutso nga nyǒ kʉ ná ke dho ró, kpa krʉ ka ndima bʉni bbù na.”​—Matayo 15:14.

Nde ri ká ka ndi e ngbǎ njati rie chu ko chu ná le vʉri ndi nzɨ di Yova dzá Dimu ri ró? Njati chøchø ma na ko kana nga kʉ ná ke njí fø di ná lo ró, ko thí ka ndi ba njedha bbo. Fø saa na, ko ka ko vʉ ko ká ka ko njí kau ke na inga Yova na ma nari. Ringani ko tøni chi Mungu dho. (Matayo 10:37) Føri dho ko adi ngarr Yova dhó yadha dho nzɨ ko ko tso gba fø di ná ndrŭ na nari chulu.​—Azø 1 Wakorinto 5:11.

2. Ko vʉ nanga ná lo ká ka ndi dhǒ ko kʉ chi Yova dho nari ngbaribbai?

Yova ko ji nari ka ndi cho ko ronga ndiro nzɨ ko gba ko tso kali dhi dini nǎ lo na ró. Føri dho, kali dhi dini na ka ndi gba le tso ná njí ma, tengenezo ma, nja kʉ ná lo ma na ró ro ringani ko pʉ ko pʉ. Yova rija ko dho: “Anivʉ [Bbo Babiloni] nǎ ro, madzá ndrŭ.”​—Ufunuo 18:2, 4.

 ANE LONANGA BBO

3. Adi krr kali dhi walimu ró

Ni ká ka ni njiri ngbǎ njati ni rr ri ddikpa le che kʉ ná loti Yova dzá tengenezo djo ró? Azø Mezali 14:15, ndirigoti anitilo i ngadhudha djo:

• Ká addudho ringani ko di krr ndiro nzɨ ko u rr ko rr ná lo krʉ ró?

Azø 2 Yohana 10, ndirigoti anitilo i ngadhudha djo:

• Ri ká ngani ko njini ngbaribbai waasi na?

• Nzá mai ko ka ko tilo waasi na ro, ko ká ka ko gba ko tso kpadhó mafundisho na ngbaribbai?

• Ni ká ddiri Yova ka ndi mbu ndi ngbǎ njati ko di ko bɨ li ko rr nga kʉ bblo ná lo ke djo inga kedzá tengenezo djo ró?

4. Atøni chi Yova dho ni dhi djona inga nidhi vena njí chenga ma ró

Njati ko rr ri kutaniko nǎ ddikpa le nji bbo chenga ró, ká ringani ko njiri ngbǎ? Anja Mungu bbʉngʉe Waizraeli dho ná Yadha nǎ ddikpa kanuni. Azø Mambo ya Walawi 5:1.

I andiko ridho nari bbai, njati ko rr ri ddikpa le nji bbo chenga ró, ringani ko rá ko chu ná lo d’ra wazee dho. Fø ko rinji nari njí, ringani ko chó ke ndi rá rid’ra wazee dho ndirigoti ndi leni le. Ro fø ke rinji nari gʉ ke tso ri gʉ ró, ko ka ko dho ko tøni chi nì Yova dho nari ko ra rid’ra wazee dho nari chulu. Ká ngbaribbai fø ko rinji nari ridho ko chi kʉ ná jidha dho . . .

• Yova Mungu dho?

• chenga nji ná le dho?

• kutaniko nǎ nja ndrŭ dho?

 5. Avʉvʉ Bbo Babiloni nǎ ro

 LO DZÁ DɄNGA

Ndiro ko tøni chi Yova dho d’e, ringani nzɨ ko gba ko tso nga kʉ chi Yova dho ná ndrŭ na. Godhé ringani ko pʉ ko kali dhi dini na ka ndi gba ko tso ná lo krʉ ró ro.

Lo djolu le ngʉ nari

• Ká addudho ringani nzɨ ko zø inga nzɨ ko rr waasi dhó lo?

• Nzá jiri ndima ki di Yova dzá Dimu ná ndrŭ na ká ko ka ko njini ngbaribbai?

• Ko ká ka ko njiri ngbǎ ndiri na ko dhori nari kʉ ko ngarr ni kali dhi dini nǎ ro le ripo ko tuni nari dho d’e?