CIIYO 58
Amutolelele Kushomeka Kuli Yehova
Beneklistu bancine balishinishite kutasuminisha muntu na cintu cimwi cili coonse kubalengesha kwaamba ayi baalilwe kusebensela Yehova. Ncakutatoonsha kwaamba ayi ici mbocibete akuli ndimwe. Yehova alabona ayi kushomeka kwanu kulayandika. (Amubelenge 1 Makani 28:9.) Ino nshiinshi sheenga shapa kwaamba ayi cibe ciyumu kutolelela kushomeka kuli nguwe, alimwi ino nshiinshi sheenga shamucafwa?
1. Ino bantu bamwi inga beelesha buyani kushomeka kwesu kuli Yehova?
Bantu bamwi inga batukasha kusebensela Yehova. Ino mbaani beenga bacita cintu ca mushobo uyo? Bantu bamwi bakaswa mucancine balaamba shakubeca pa libunga lyakwe Lesa kwaamba ayi banyonyoole lushomo lwesu. Bakapondoka kuswa mucancine. Kwiilikaawo, bamatanjilili babupailishi bamwi balaya caambilisha makani akubeca pali ndiswe kwaamba ayi abo beenga babula kucenjela baswe mucancine. Tatweelete kunopikishanya abantu bakaswa mucancine, kubelenga mabuku abo, makani ngobabika pama webusaiti abo na kweebela mavidyo abo. Yesu wakaamba pabaabo beelesha kulengesha bamwi kucileka kusebensela Yehova cakushomeka ayi: “Mutalisukami ambabo, mbamatanjilili boofu. Aboobo na moofu watanjilila moofunyina, boonse bobilo balawita mucilindi.”—Mateyo 15:14.
2. Ino kusala kwesu inga kwatondesha buyani na tulashomeka kuli Yehova?
Kusuna Yehova kulaakutucafwa kuleya kwaabanamo lubasu mukupaila kwakubeca. Aboobo tatweelete kunjila ncito, kujoina kakoto na kucita cili coonse cikumite bupailishi bwakubeca. Yehova alatucenjesha ayi: “Amusweemo [mu Babiloni Munene], nobantu bangu.”—Ciyubululo 18:2, 4.
AMWIIYILEWO ASHIMWI
Amwiiye mbweenga mwaba bashinishite kutasuminisha muntu uli woonse kupilinganya kushomeka kwanu kuli Yehova. Alimwi amwiiye mbweenga mwatondesha kushomeka kwanu kwiinda mukuswa mu Babiloni Munene.
3. Amucenjele abantu baiisha shakubeca
Ino nciinshi ncotweelete kucita na twanyumfwa makani akubeca pa libunga lyakwe Yehova? Amubelenge Tushimpi 14:15, akubandika mwiipusho uyu:
-
Ino nceebonshi tatweelete kushomabo makani ali woonse ngotwanyumfwa?
Amubelenge 2 Joni 9-11, akubandika miipusho itokonkelaawo:
-
Ino bantu bakapondoka kuswa mucancine tulyeelete kunoobabona buyani?
-
Nabi kwaamba ayi tatubandiki abantu bakapondoka kuswa mucancine, ino nciinshi ceenga cacitika na katubelenga mabuku abo, kweebela mavidyo abo na kubona makani pama webusaiti abo?
-
Ino Yehova inga walinyumfwa buyani na katukutika kumakani akubeca aambwa pali nguwe alibunga lyakwe?
4. Amutolelele kushomeka kuli Lesa na mukwesu wacita cilubo cinene
Ino ngumukuli nshi ngotucite na kuli umwi mulibungano ngotwashiba ayi wacita cilubo cinene? Amuleke tubandike njiisho njeenga tweeya kuswa ku Mulawo Lesa ngwakapa bene Isilaeli bamuciindi cakale kale. Amubelenge Bene Lefi 5:1.
Kweelana avesi iyi, na kuli muntu ngotwashiba ayi wacita cilubo cinene, tulyeelete kulwiita bamanene makani ngotushi. Nacibi boobo, inga caba kabotu kutaanguna kumuyuminisha kwaamba ayi aye mukulyaambilila mwiine kubamanene cilubo ncaakacita. Na waalilwa kucita boobo, kushomeka kwesu kuli Yehova kulyeelete kutupa kuya mukulwiita bamanene makani ngotushi. Ino kucita boobo kulatondesha buyani ayi tulisuni . . .
-
Yehova Lesa?
-
muntu uyo wacita cilubo?
-
bamwi mulibungano?
Na mushominyinaanu ali mumapensho, amumucaafwe!
5. Amusoonoke Babiloni Munene
Amubelenge Luka 4:8 a Ciyubululo 18:4, 5, akubandika miipusho iyi:
-
Sa ncishibikitwe mbuli muntu upaila kubupailishi bwakubeca?
-
Sa ndi mukakoto kacatene abupailishi bumwi?
-
Sa incito njonsebensa ilikumite kubupailishi bwakubeca munshila imwi ili yoonse?
-
Sa kuli mbasu shimwi mubuumi bwangu nshonjeelete kwaalula kwaamba ayi ntalamuke kubupailishi bwakubeca?
-
Na pali mwiipusho ngondakumbula ayi ee, ino nshiinshi nshonjeelete kucita?
Muli moonse mweenga cabeta, amusalewo ceenga capa kwaamba ayi mutolelele kuba anjeelacaamba isalalite akutondesha ayi mulashomeka kuli Yehova.
Ino inga mwacita buyani na bamusenga kupa maali akucafwilisha muncito yabupailishi?
BANTU BAMWI BALAAMBA AYI: “Ndyeelete kushiba bakapondoka kuswa mucancine nshobaamba pa Bakamboni Bakwe Yehova kwaamba ayi njimikanineeko cancine.”
-
Sa inga caba camaano kucita boobo? Ino nceebonshi?
CITEENTE CINENE
Kwaamba ayi tutolelele kushomeka kuli Yehova, tulyeelete kuleya kunyumfwana abantu beenga batucenjeeka na kutuyunga kucita shintu shitabete kabotu.
Kwiindulukaamo
-
Ino nceebonshi tatweelete kukutika kumakani aamba bakapondoka kuswa mucancine?
-
Ino nshiinshi nshotweelete kucita na twashiiba ayi mukwesu nabi nankashi wacita cilubo cinene?
-
Ino kucenjesha kwa kwaamba ayi amuswe mu Babiloni Munene inga twakukonkela buyani?
AMULANGWETEEWO ASHIMWI
Amwiiye nsheenga mwaciita na bamwi kabaamba makani akubeca pa Bakamboni Bakwe Yehova.
“Sa Mulishi Makani Oonse?” (Njashi Yamulindilishi, August 2018)
Ino inga mwashiba buyani ayi libunga nabi ncito imwi ilacafwilisha bupailishi bwakubeca?
Ino beshikutupikisha bamwi balacita buyani kwaamba ayi banyonyoole lushomo lwesu?
Amubelenge sha musankwa umwi wakalinga mupailishi kubupailishi bwaci Shinto mbwakaswa mubupailishi bwakubeca. Makani ali pamutwi utokwaamba ayi “Ndakalinga Kulangoola Lesa Kuswabo Kubwanike.”
“Baibo Ilaalula Buumi bwa Muntu” (Njashi Yamulindilishi, July 1, 2011)
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
