Awˬ lawn 58
Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ sheˍ
Awˬ tehˬ ve Hkriꞈ yaˇ lehˬ Yaˬhoˉvaˬ htaꞈ oˉ kʼoˍ pui tuˬ, awˬ nu ve awˬ ceuˬ, maˇ heˆ leh awˬ nu ve chaw htaꞈ maˇ tawˍ laˇ tcuh. Nawˬ kaꞈ chi hkʼe dawˇ ve tehꞈ, ngaˬ hui yonˍ ve yoˬ. Nawˬ ka tiꞈ yeˬ ve htaꞈ Yaˬhoˉvaˬ awˬ hpfuhˇ shiˍ jaˇ ve yoˬ. (1 Raˍsaˍvanˍ 28:9 gʼaw sheˍ.) Nawˬ Yaˬhoˉvaˬ htaꞈ ka tiꞈ yeˬ ve lawˇ nyi laˇ ve aˬ htoꞈ ma cawˬ ve le, leh nawˬ htaꞈ aˬ htoꞈ ma ga laˇ gʼa ve le?
1. Ngaˬ hui Yaˬhoˉvaˬ htaꞈ ka tiꞈ maˇ yeˬ tuˬ awˬ nu ve chaw aˬ htoꞈ ma te laˇ gʼa ve le?
Chaw teˇ hpaˍ ngaˬ hui Yaˬhoˉvaˬ ve kanˉ maˇ te tuˬ tawˍ laˇ ve yoˬ. Chaw chi teˇ hpaˍ lehˬ, awˬ tehˬ ve htaꞈ baˬ taˉ ve chaw hpehꞈ leh, ngaˬ hui ve yonˍ hkʼaˇ htaꞈ te luˬ laˇ tuˬ, Gʼuiˬ sha ve kanˉ hkʼaˇ htaꞈ maˇ heˆ heˆ she pfuhˍ ve yoˬ. Yawˇ hui lehˬ Gʼuiˬ sha htaꞈ hpfuhˆ ve chaw tehꞈ kuˬ ve yoˬ. Chi hkʼoˆ kaꞈ, ngaˬ hui awˬ tehˬ ve htaꞈ htawˇ dawˇ nawˬ dawˇ cawˬ leh baˬ taˉ tuˬ, bon awˬ hoˉ teˇ hpaˍ ngaˬ hui htaꞈ caˉ daꞈ ve maˇ heˆ heˆ ve awˬ lawn kʼoˆ ve yoˬ. Chi htaꞈ pa taw, Gʼuiˬ sha htaꞈ hpfuhˆ ve chaw geh tawˇ gʼawˬ daꞈ ve, yawˇ hui ve liꞈ kʼoˆ gʼaw ve, maˇ heˆ leh in˗teu˗neꞈ hkʼaw bvuhꞈ taˍ ve aw lawn gʼaw ve, leh VDO teˇ hpaˍ nyi ve lehˬ kawˆ tuˬ cawˬ jaˇ ve yoˬ. Ngaˬ hui Yaˬhoˉvaˬ htaꞈ ka tiꞈ maˇ yeˬ tuˬ te laˇ ve chaw ve awˬ lawn Yeˍsuˆ kʼoˆ ve, “chaw oˇ ve teˇ hpaˍ chehˇ taˍ piˇ sheˍ. Yawˇ hui mehˆ cuˉ ve kaꞈ, yaꞈ kʼaw maˍ piˇ paˍ te ve yoˬ. Mehˆ cuˉ ve chaw lehˬ, mehˆ cuˉ ve chaw htaꞈ yaꞈ kʼaw maˍ piˇ ve kʼo, yawˇ huiˉ maˬ nyiˇ gʼaˇ gʼaˇ miˬ kʼoˍ hkʼaw ce loꞈ˗e tuˬ yoˬ.”—Maꞈhtehˍ 15:14.
Ngaˬ hui shiˍ daꞈ ve chaw Yaˬhoˉvaˬ ve Shaˉhkiˆhkanˍ ve chaw maˇ hpehꞈ gaˇ˗o tehꞈ dawˇ cheˆ htaˇ, hkʼaˬ hkʼe te tuˬ le? Ngaˬ hui meuˆ daꞈ ve chaw chi hkʼe te htaˇ, nyi ma luˬ jaˇ ve yoˬ. Oˇ ve teˇ gʼaˇ ngaˬ hui yawˇ htaꞈ maˇ heˆ leh, Yaˬhoˉvaˬ htaꞈ leuˆ tuˬ nyiˉ laˇ ve yoˬ hehˉ. Chi hkʼe gʼa hpuˇ htaˇ, ngaˬ hui teˇ ceuˬ le le aꞈ kehˉ Yaˬhoˉvaˬ htaꞈ ka tiꞈ gʼa yeˬ ve yoˬ. (Maꞈhtehˍ 10:37) Chi htaꞈ pa taw, ngaˬ hui Yaˬhoˉvaˬ ve hkawˇ na yuˬ leh oˇ hkʼe ve chaw htaꞈ maˇ gʼa caˉ daꞈ ve yoˬ.—1 Kawˇrenˍhtuˆ 5:11 gʼaw sheˍ.
2. Ngaˬ hui dawˇ cheˆ ve awˬ ceuˬ Yaˬhoˉvaˬ htaꞈ ka tiꞈ yeˬ ve tehꞈ hkʼaˬ hkʼe te hpeuꞈ maw piˇ gʼa ve le?
Ngaˬ hui Yaˬhoˉvaˬ htaꞈ haꞈ ve pa taw, maˇ heˆ heˆ ve bon liˇ htaꞈ maˇ caˉ daꞈ ve yoˬ. Ngaˬ hui ve kanˉ, ngaˬ hui caˉ daꞈ ve kanˉ hkʼaˇ teˇ hpaˍ, leh ngaˬ hui te ve awˬ nu ve awˬ ceuˬ teˇ hpaˍ lehˬ maˇ heˆ heˆ ve bon liˇ htaꞈ maˇ gʼa caˉ daꞈ ve yoˬ. Yaˬhoˉvaˬ ngaˬ hui htaꞈ shaˍ tiꞈ peꞈ laˇ ve, ‘ngaˬ ve chaw teˇ hpaˍ˗oˬ, Uiˍ ve Baˍbuˍlonˍ venˇ hkʼaw tawˆ la˗oˆ.’—Hpeuꞈ maˍ ve 18:2, 4.
Henˇ shiˍ maˇ la tuˬ
Nawˬ Yaˬhoˉvaˬ htaꞈ ka tiꞈ yeˬ ve awˬ nu ve chaw maˇ tawˍ laˇ tcuh tuˬ hkʼaˬ hkʼe te gʼa ve le, leh nawˬ Uiˍ ve Baˍbuˍlonˍ venˇ hkʼaw tawˆ la ve tehꞈ hkʼaˬ hkʼe te hpeuꞈ maw piˇ gʼa ve le, teˇ geh henˇ sheˍ.
3. Maˇ heˆ heˆ maˍ ve chaw teˇ hpaˍ htaꞈ shaˍ tiꞈ te sheˍ
Yaˬhoˉvaˬ ve kanˉ hkʼaˇ htaꞈ caˉ daꞈ ve maˇ daꞈ ve awˬ lawn gʼa kaˇ htaˇ, ngaˬ hui hkʼaˬ hkʼe te tuˬ le? Tawˇ naˉ ve liꞈ 14:15 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui gʼa kaˇ ve awˬ ceuˬ hkʼa peu˗eˬ htaꞈ laꞈ haˉ maˇ yonˍ cawˇ ve le?
2 Yoˇhanˬ liꞈ 10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Gʼuiˬ sha htaꞈ hpfuhˆ ve chaw htaꞈ ngaˬ hui caˉ daꞈ cawˇ sheˍ ve laˇ?
-
Gʼuiˬ sha htaꞈ hpfuhˆ ve chaw geh ngaˬ hui hteˇ lehˍ tawˇ maˇ gʼa yaw daꞈ ve htawˇ, yawˇ hui maˍ ve hkawˇ htaꞈ ngaˬ hui na tuˬ te laˇ ve aˬ htoꞈ ma cawˬ ve le?
-
Yaˬhoˉvaˬ leh yawˇ ve kanˉ hkʼaˇ htaꞈ caˉ daꞈ ve maˇ daꞈ ve kʼoˆ ve htaꞈ ngaˬ hui na ve kʼo, yawˇ hkʼaˬ hkʼe dawˇ tuˬ le?
4. Awˬ viˉ awˬ nyi te yaꞈ htaˇ Yaˬhoˉvaˬ htaꞈ ka tiꞈ yeˬ sheˍ
Hkriꞈ yaˇ awˬ moˍ hkʼaw ve chaw teˇ gʼaˇ venˇ baˆ uiˍ jaˇ ve htaꞈ te ve tehꞈ, ngaˬ hui shiˍ htaˇ hkʼaˬ hkʼe te tuˬ le? Iˉsaˍreˍlaˆ chaw ve awˬ co˗e htaˇ, Gʼuiˬ sha ve awˬ liˇ tawˇ hkawˇ hkʼaw ve awˬ liˇ awˬ hkʼaˇ htaꞈ teˇ geh nyi sheˍ. Oˉ kʼoˍ pui ve liꞈ 5:1 gʼaw sheˍ.
Liꞈ hpu chi teˇ tawn hkʼaw gʼa mawˬ ve, awˬ viˉ awˬ nyi teˇ gʼaˇ venˇ baˆ uiˍ jaˇ ve htaꞈ te ve tehꞈ ngaˬ hui shiˍ htaˇ, ngaˬ hui nyi haꞈ shaˉ paˍ htaꞈ gʼa kʼoˆ piˇ ve yoˬ. Ngaˬ hui nyi haꞈ shaˉ paˍ htaꞈ maˇ kʼoˆ piˇ sheˍ htaˇ, ngaˬ hui yawˇ htaꞈ haꞈ ve tehꞈ hpeuꞈ maw piˇ gʼa ve lehˬ, yawˇ hkʼaˇ yawˇ nyi haꞈ shaˉ paˍ htaꞈ ca kʼoˆ piˇ tuˬ, ngaˬ hui awˬ gʼaˇ piˇ gʼa ve yoˬ. Yawˇ nyi haꞈ shaˉ paˍ htaꞈ maˇ kʼoˆ piˇ ve kʼo, ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ, nyi haꞈ shaˉ paˍ htaꞈ gʼa kʼoˆ piˇ ve yoˬ. Na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te chi hkʼe te ve lehˬ ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ ve le?
-
Aˬ htoꞈ ma te chi hkʼe te ve lehˬ ngaˬ hui te yaꞈ ve chaw htaꞈ haꞈ ve tehꞈ hpeuꞈ maw piˇ ve le?
-
Aˬ htoꞈ ma te chi hkʼe te ve lehˬ ngaˬ hui Hkriꞈ yaˇ awˬ moˍ hkʼaw ve chaw htaꞈ haꞈ ve tehꞈ hpeuꞈ maw piˇ ve le?
Awˬ viˉ awˬ nyi Hkriꞈ yaˇ te yaꞈ htaˇ, nawˬ yawˇ htaꞈ ga piˇ sheˍ!
5. Uiˍ ve Baˍbuˍlonˍ venˇ htaꞈ taˇ caˉ daꞈ
Luˉkaꞈ liꞈ 4:8 leh Hpeuꞈ maˍ ve liꞈ 18:4, 5 gʼaw leh na hkawˇ chi teˇ hpaˍ htaꞈ hkʼawꞈ laˇ sheˍ:
-
Ngaˬ ve awˬ meh maˇ heˆ heˆ ve bon liˇ hkʼaw cawˬ sheˍ ve laˇ?
-
Ngaˬ ve awˬ meh maˇ heˆ heˆ ve bon liˇ htaꞈ caˉ daꞈ ve kanˉ hkʼaˇ teˇ hpaˍ hkʼaw cawˬ sheˍ ve laˇ?
-
Ngaˬ te ve kanˉ maˇ heˆ heˆ ve bon liˇ htaꞈ ga piˇ chehˇ ve laˇ?
-
Maˇ heˆ heˆ ve bon liˇ htaꞈ caˉ daꞈ ve, ngaˬ ve a shaꞈ teꞈ hkʼaˇ hkʼaw te chehˇ sheˍ ve aˬ htoꞈ ma cawˬ ve le?
-
Na hkawˇ teˇ maˬ maˬ htaꞈ ngaˬ yoˬ tehꞈ kʼoˆ ve kʼo, ngaˬ aˬ htoꞈ ma te cawˇ ve le?
Nawˬ pa cawˇ ve teˇ ceuˬ ceuˬ cawˬ ve kʼo, daꞈ kehˬ ve dawˇ shiˍ puiˉ ve nyi ma cawˬ tuˬ dawˇ cheˆ leh, nawˬ Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw piˇ sheˍ.
Bon htaꞈ caˉ daꞈ ve hpu tanˇ tanˇ laˇ tuˬ lawˬ laˇ htaˇ, nawˬ hkʼaˬ hkʼe te tuˬ le?
Chaw teˇ hpaˍ kʼoˆ ve: “Ngaˬ ve yonˍ hkʼaˇ htaꞈ haꞈ shaˉ gʼa tuˬ, Gʼuiˬ sha htaꞈ hpfuhˆ ve chaw lehˬ Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve awˬ lawn yawˇ hui hkʼaˬ hkʼe kʼoˆ ve htaꞈ, ngaˬ awˉ lawˉ gʼa shiˍ cawˇ sheˍ ve yoˬ.”
-
Nawˬ dawˇ kʼo, chi hkʼe dawˇ ve lehˬ cawˇ˗aw laˇ? Aˬ htoꞈ ma pa taw le?
A yeˇ uiˍ ve awˬ lawn
Ngaˬ hui Yaˬhoˉvaˬ htaꞈ ka tiꞈ yeˬ tuˬ, yawˇ htaꞈ ka tiꞈ maˇ yeˬ ve chaw htaꞈ maˇ gʼa caˉ daꞈ ve yoˬ. Chi hkʼoˆ kaꞈ, ngaˬ hui lehˬ maˇ heˆ heˆ ve bon liˇ hkʼaw maˇ gʼa caˉ daꞈ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw Gʼuiˬ sha htaꞈ hpfuhˆ ve chaw hui ve liꞈ kʼoˆ, VDO, leh yawˇ hui ve hkawˇ htaꞈ ngaˬ hui maˇ na cawˇ ve le?
-
Yaˬhoˉvaˬ ve Shaˉhkiˆhkanˍ ve chaw maˇ hpehꞈ gaˇ˗o ve chaw htaꞈ, ngaˬ hui hkʼaˬ hkʼe te piˇ cawˇ ve le?
-
Maˇ heˆ heˆ ve bon liˇ hkʼaw tawˆ la˗oˆ tehꞈ shaˍ tiꞈ peꞈ laˇ ve hkawˇ htaꞈ, ngaˬ hui hkʼaˬ hkʼe te na yuˬ gʼa ve le?
Kʼawꞈ caˉ nyi gʼa ve
Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve maˇ heˆ heˆ ve awˬ lawn gʼa kaˇ htaˇ, nawˬ hkʼaˬ hkʼe te tuˬ le, gʼaw nyi sheˍ.
“Nawˬ awˬ tehˬ ve awˬ lawn shiˍ˗aˬ laˇ?” (Shaw nyi kuiˬ Taꞈ yehˬ 2018 hkʼawꞈ ha pa 8 maˬ)
Kanˉ hkʼaˇ hkʼaˬ ve teˇ maˬ Uiˍ ve Baˍbuˍlonˍ htaꞈ caˉ daꞈ ve tehꞈ, nawˬ hkʼaˬ hkʼe te shiˍ gʼa ve le?
Gʼuiˬ sha htaꞈ hpfuhˆ ve chaw teˇ hpaˍ hpaˍ lehˬ ngaˬ hui ve yonˍ hkʼaˇ awˬ gʼaˇ nuˇ tuˬ, yawˇ hui hkʼaˬ hkʼe te laˇ ve le?
Bon awˬ hoˉ teˇ gʼaˇ aˬ htoꞈ ma te yawˇ yonˍ ve bon hkʼaw tawˆ la ve htaꞈ shiˍ tuˬ, “Ngaˬ yaˇ ehˉ htaˇ kaꞈ Gʼuiˬ sha htaꞈ ca ve” awˬ lawn htaꞈ, gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2011 hkʼawꞈ ha pa 7 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
