Kolai Maa Veaitiɛ ta ɣaa ɓaazu ga nu ta nɛpɛ ɔɔ ŋɛni ta nɛpɛ mɛlɛ kɛ tɔ ɓeteve Jehova ʋeli ʋai va. Gé kwɛ̃ni ɓɔɔ ga vele ɣana e ɣi-gaa-ziɛzu la. Jehova wuuzu nɛɛvɛ ga velei ɓɔɔ e losu la kpã feli ʋai zu. (1 Chronicles 28:9 lodo.) Zɛɓɛi ya kɛ tanisu na ɓaa ga de lo kpã Jehova ʋeli ʋai zu? Na ɣa ɣɛɛna ya leve ɣɛ le e te yee maazu ɣale?

1. Zɛɓɛi tanisu numaa ta kɛ ga e kɛ na ɓaa ga de lo kpã Jehova ʋeli ʋai zu?

Numaa ta ɣaa-ɓaa ga te de ɓeteve Jehova ʋeli ʋai va. Ɓɛɛni ka ɓɔɔ ta nii ɣɛ? Nu taniga te ɣɛni gaamai zu, kɛ te wulu ɣaa ʋega gaamai va. Na e kɛɛ ta ɣɛ zɛɛ ʋaa wosu e vile Jehova na ɓulugi va, nii nɔ ya kɛ te de ʋiiɓɛɛ Jehova ʋeli ʋai va. Gala feli vea taniga ta zɛɛ ʋaa wo e vile ge va, nii nɔ ya kɛ taitiɛ tɛ lɛ faa wɛ̃ni e vile zɛɛ ʋai niitiɛ va te wulo kuuwui va. De mɛlɛ laalɛ te ta nɛpɛ bu ga kpɔɛ, de mɛlɛ ta wɔlɔitiɛ lodo, de mɛlɛ li ta ʋãga wɔlɔi ma ɔɔ nɔ ɣɛ ga de wɛlɛ ta ʋiliogitiɛ va. Taitiɛ te ɣaa ɓaazu ga te kɛ numaa te mɛlɛ Jehova ʋeli, nii ɣa Ziizɛ boni e vile te va: “A ɓe te va. Ta ga gaazu-wele vele-wulo vea. Tɔwɔ ani gaazu-wele nu ɣa ɣɛ na pele wulozu ga bɔɔ ɣaazu-wele nu, te felegɔ pɛ ta loo zeɣe zu.”​—Mafiyu 15:​14.

E nui ta wɛ̃ni e deʋea ga lɛ sa wɔlɔ-wɔlɔ wõini ɔ ɣɛ ga Jehova Na Seeleitiɛ te ta? Ani da ziɛ-pului ta ɔɔ da nui ta ɣa fai nii ta ɣɛɛna de yii ɣa zuuli ɓɔɔ ga ʋike. Kɛni ɓɔɔ da deʋe ani da Jehova yii-mai ɣɛ ɔɔ da vile manui wulu. Manɛɛ ɓɔɔ de ɣaa-ɓaa de Jehova ʋeli ʋai lo faa pɛ tuo da ŋeteai zu. (Mafiyu 10:​37) Na ma, da ziɛ ga tɛnɛgi Jehova fea ga de mɛlɛ nui na ɣɛ ga da ziɛ-pulu.​—1 Kɔlĩitiɛ 5:​11 lodo.

2. Deʋe zɛɓɛi da bo e kɛ tanisu na ɓaa ga de lo kpã Jehova ʋeli ʋai zu?

Ani wõila ɣa de ya Jehova ʋaa ma towa kɛ de wulu ɣaa ʋe faa nɛpɛ ba ya kɛ de yee vili zɛɛ ʋaa ɣala feli ʋaazu. De mɛlɛ tii ta nɛpɛ kɛ ɔ nɔ ɣɛ ga de vɛɛ ɓulu nɛpɛ ba pilegɛi zɛɛ ʋaa ɣala feli ʋaa va. Jehova de lɛnɛga ga: “Nà numaitiɛ, a wulo Babelɔ̃ Laa Ɓakpa Walai zu.”​—Faa wuloai kɛnɛ ma 18:​2, 4.

 FAA LAMAA MAA WOLI

3. Kwɛ̃ɛ ga zɛɛ ʋaa ɣalabo beaitiɛ ta na

Zɛɓɛi manɛɛ de kɛ ani da faa yowũ mɛnina e vile Jehova na ɓulugi va? A Proverbs 14:​15 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛ maa lɛ nɛɛni dɔ la ga niitiɛ ɓɔgapɛ da mɛni?

A 2 Jɔ̃ 10 lodo, wo gaa-zaɣa-kɛɛ niitiɛ ɣaa wote:

• Taitiɛ te ɣɛni kuuwui va kɛ tɛ lɛ sa ba manɛɛ de te zo ɣɛ le?

• Taitiɛ te wulu ɣaa ʋega kuuwui va ani dɛ lɛ daani ma da ta ɣala-bogitiɛ maa zɔlɔwo ɣɛ le?

• E ɣisu Jehova ɣa ɣi-gaa-ziɛ ɣɛ le ani da ɣɛna wuitosu faa yowũitiɛ ma numaa ta bo e vile ba ta na ɓulugi?

4. Lo kpã Jehova ʋeli ʋai zu ani e ɣaa yɔwɔ̃i ta ɣa faa yowũ ɣɛɛna

Ani da kwɛ̃ɛna ga nui ta faa yowũ ɣɛɛ kuuwui zu zɛɓɛi manɛɛ de kɛ? Wɛlɛ nii va da maa woli tɔgi nii zu Jehova feeni Yezɔitiɛ ya wɔlɔ-wɔlɔi zu. A Leviticus 5:1 lodo.

E ɣɛ velei Gala goi nii boga la ani da kwɛ̃ɛna ga nui ta faa yowũ ɣɛɛ kuuwui zu manɛɛ de bo kuuwu wũ-tuo veaitiɛ ma. Dɔ vɛɛ bosu kuuwu wũ-tuo veaitiɛ ma, towa ɣɛ ga faa vagɔ ga de bo manui ma ga e li e bo kuuwu wũ-tuo veaitiɛ ma tɔ ɓɔɔ. Ani manui lɛ ɣɛ kɛɛni, wõilai e de ya Jehova ʋaa ma towa kɛ de li de bo kuuwu wũ-tuo veaitiɛ ma. Ani da ɣaa ɓaana de nii ɣɛ towa dɛ ɣɛ le ga wõila ɣa de ya . . .

• Jehova ʋaa ma?

• nui nii ʋaa ma e faa yowũi ɣɛɛ?

• kuuwui ʋaa ma?

 5. Maa wooza Babelɔ̃ laa Ɓakpa Walai va

 NII SA È MAA WOLIA

Ga de lo kpã Jehova ʋeli ʋai zu kɛni de wulu ɣaa ʋe niitiɛ va te wuloa ɓulugi va. Manɛɛ kɔnɔ de yee wulo zɛɛ ʋaa ɣala feli ʋai zu?

Ma-ɓigitiɛ

• Taitiɛ te wuloa ɓulugi va zɛɓɛi e kɛɛ lɛ vani ga dɔ wuito te ma, dɔ ta wɔlɔi ta lodo ɔ nɔ ɣɛ ga de wɛlɛ ta ʋiliogi ta va?

• Taitiɛ tɛ lɛ sa wõini tɔ ɣɛ ga Jehova Na Seeleitiɛ te ta manɛɛ de te zo ɣɛ le?

• Da leve ɣɛ le de ziɛ ga tɛnɛgi nii Gala Kɔlɔi fea ga de maa wooza zɛɛ ʋaa ɣala feli ʋai va?