TUTO 58
Muzwelepili Kusepahala ku Jehova
Bakreste ba niti baikatulezi kusatuhelela mutu kamba nto ifi kamba ifi kubapalelwisa kulapela hande Jehova. Ni mina ki mona momuikutwela luli. Jehova waitebuha busepahali bwamina. (Mubale 1 Makolonika 28:9.) Ki miinelo mañi yekona kutahisa kuli kube taata ku mina kusepahala ku Jehova, mi mukona kuezañi kuli miinelo yeo isike yamipalelwisa kusepahala?
1. Batu babañwi bakona kulika kumipalelwisa cwañi kusepahala ku Jehova?
Batu babañwi bakalika kumipalelwisa kusebeleza Jehova. Ki bo mañi babakona kueza cwalo? Batu babañwi babatuhezi kusebeleza Jehova bakona kubulela litaba za buhata ka za kopano ya Mulimu kuli bafokolise tumelo yaluna. Batu bao ki bakwenuheli. Kuzwa fo, baeteleli babañwi ba bulapeli bakona kuhasanya litaba za buhata ka za luna kuli bazwafise batu babafokola kwa moya. Haiba lukanana ni batu babalulwanisa, kubala libuka zabona kamba litaba zebañozi, kukena fa mawebusaiti abona, kamba kubuha mavidio abona, lwakona kukena mwa butata. Jesu naabulezi cwana ka za batu babalika kupalelwisa babañwi kusebeleza Jehova ka busepahali: “Hamu batuhele honacwalo. Ki baeteleli babali libofu. Haiba sibofu sietelela sibofu sesiñwi, bubeli bwazona likawela mwa musima.”—Mateu 15:14.
Mukona kuezañi haiba mutu yemuziba uikatulezi kuli hasalata kuba yomuñwi wa Lipaki za Jehova? Lwakona kuikutwa hahulu bumaswe muta mutu yeluutwana hahulu ni yena atuhela kusebeleza Jehova. Mutu yo ukona kutahisa kuli lukete yelulata mwahalaa hae ni Jehova. Luswanela kuikatulela kuzwelapili kusepahala ku Jehova kufita ku mutu ufi kamba ufi. (Mateu 10:37) Mwa muinelo ocwalo, lukalatelela taelo ya Jehova ya kuli lusike lwasalisana ni batu babacwalo.—Mubale 1 Makorinte 5:11.
2. Ki likatulo zecwañi zekona kulupalelwisa kuzwelapili kusepahala ku Jehova?
Bakeñisa kuli lwalata Jehova, haluna kuswalisana ni bulapeli bwa buhata mwa nto ifi kamba ifi. Lukaambuka kukena musebezi, kuba mwa katengo kakañwi, kamba kukena misebezi yemiñwi yeswalisana ni bulapeli bwa buhata. Jehova ululemusa kuli: “Hamuzwe ku [Babilona Yomutuna], mina sicaba saka.”—Sinulo 18:2, 4.
MUBATISISE
Muitute momukona kuhanela mutu yabata kumipalelwisa kusepahala ku Jehova. Hape mubone momukona kuboniseza kuli mwasepahala ku Jehova ka kuzwa ku Babilona Yomutuna.
3. Mutokomele kuswalisana ni baluti ba buhata
Luswanela kuezañi haluutwa batu bababulela litaba zemaswe ka za kopano ya Jehova? Mubale Liproverbia 14:15, mi kihona mukanyakisisa puzo yelatelela:
-
Ki kabakalañi haluswanela kunyakisisanga litaba zeluutwa lusika lilumela kale?
Mubale 2 Joani 10, mi kihona mukanyakisisa lipuzo zelatelela:
-
Luswanela kuunga cwañi batu babakwenuhezi Jehova?
-
Ki nto mañi yekona kutahisa kuli lubone lituto zebaluta bakwenuheli kusina taba kuli mwendi halubonani ni bona pata ka pata?
-
Munahana kuli Jehova ukona kuikutwa cwañi haiba luteeleza kwa litaba zemaswe zebabulela batu ka za hae kamba kopano yahae?
4. Muzwelepili kusepahala ku Mulimu haiba muzwale aeza sibi sesituna
Luswanela kuezañi haiba luziba kuli mutu yomuñwi mwa puteho uezize sibi sesituna. Halunyakisiseñi sikuka sesiñwi sesi mwa Mulao wa Mulimu wanaafile kwa Maisilaele ba kwaikale. Mubale Livitike 5:1.
Sina moi lutaluseza timana yeo, haiba luziba kuli mutu yomuñwi uezize sibi sesituna, luswanela kutaluseza baana-bahulu zeluziba. Kono lusika eza kale cwalo, neikaba hande kutaluseza mutu yo yafosize kuli ayo ipiha kwa baana-bahulu. Kono haiba apalelwa kueza cwalo, kusepahala kwaluna ku Jehova kuswanela kulususueza kutaluseza baana-bahulu zeluziba. Kueza cwalo kubonisa cwañi kuli lwasepahala ni kulata . . .
-
Jehova Mulimu?
-
mutu yafosize?
-
mizwale ni likaizeli mwa puteho?
Haiba mulumeli sina luna u mwa butata, mumutuse!
5. Muzwe ku Babilona Yomutuna
Mubale Luka 4:8 ni Sinulo 18:4, 5, mi kihona mukanyakisisa lipuzo zelatelela:
-
Kana libizo laka lisa liteñi fa mukoloko omuñwi wa mwa bulapeli bwa buhata kone nilapelanga?
-
Kana nifumaneha mwa katengo kakaswalisana ni bulapeli busili?
-
Kana musebezi onieza uzwisezapili bulapeli bwa buhata ka nzila yeñwi?
-
Kana kunani mokuñwi monitokwa kuikauhanya kwa bulapeli bwa buhata?
-
Haiba nialabile eni ku yeñwi ya lipuzo zeo, ki licinceho mañi zenitokwa kueza?
Mubone teñi kuli katulo yemuka eza yamitusa kuba ni lizwalo lelikenile ili lelibonisa kuli mwasepahala ku Jehova.
Mukona kuezañi haiba mukupiwa kuli mufe tuso yekatusa mwa musebezi wa bulapeli bobuñwi?
BABAÑWI BABULELANGA KULI: “Nitokwa kuziba zebabulela bakwenuheli ka za Lipaki za Jehova ilikuli niyemele litaba za niti.”
-
Kana kwaswanela kueza cwalo? Ki kabakalañi hamualaba cwalo?
LITABA KA BUKUSWANI
Kuli luzwelepili kusepahala ku Jehova, lutokwa kuambuka kuswalisana ni batu babasa sepahali ku yena. Kuzwa fo, lutokwa kuikauhanya ka kutala kwa bulapeli bwa buhata.
Mulundulule
-
Ki kabakalañi halusa swaneli kubuhanga, kubala, kamba kuteeleza kwa litaba zebabulela bakwenuheli?
-
Luswanela kuunga cwañi batu babaikatulezi kuli habasa lata kuba Lipaki za Jehova?
-
Lukona kulatelela cwañi temuso ya kuli lusabe kwa bulapeli bwa buhata?
MUBONE LITABA ZEÑWI
Muitute zemukona kueza muta batu babañwi bahasanya litaba za buhata ka za Lipaki za Jehova.
“Kana Mwaziba Litaba Kaufela?” (Tawala ya Mulibeleli, August 2018)
Mukona kuziba cwañi kuli kopano yeñwi kamba musebezi omuñwi uswalisana ni Babilona Yomutuna?
Balwanisi babañwi baezizeñi kuli bafokolise tumelo yaluna?
Mwa likande lelili, “Nenikalile Kubata Mulimu Kuzwa Feela Kwa Bwanana,” mubale ka za muprisita wa Sishinto yanaatuhezi kuswalisana ni bulapeli bwa buhata.
“Bibele Yacincanga Bupilo Bwa Batu” (Tawala ya Mulibeleli, October-December, 2011)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
