DILONGESHA DIA 58
Shala mulamate Yehowa
Bena Kristo balelela kabena bitabata bua muntu anyi tshintu nansha tshimue kubapangisha bua kutendelela Yehowa to. Tudi batuishibue ne: lungenyi alu ke luudi pebe nalu. Yehowa udi wangata lulamatu luebe kudiye ne mushinga wa bungi. (Balayi 1 Kulondolola 28:9.) Mmalu kayi adi mua kukubueja mu diteta dia kufuana kupangila lulamatu kudi Yehowa? Udi mua kuatshimuna mushindu kayi?
1. Bantu badi mua kukeba bua kutupandulula ne Yehowa mushindu kayi?
Bamue nebatete bua kutupangisha bua kuenzela Yehowa mudimu. Mbanganyi abu? Ba kumpala mbatontolodi, tuambe ne: mbantu bakadi balekele kuenzela Yehowa mudimu kadi bashale bashiminyina bulongolodi buende malu bua kunyanga ditabuja dietu. Bakuabu mbalombodi ba bitendelelu batu batunyangila lumu ne malu a mafi bua kufikisha bamue ba kutudi badi kabayi ne dijingulula dia malu ku dilekela bulelela. Kuelangana mpata ne baluishi betu, kubala mikanda yabu anyi malu adibu bafunda ku Enternete, kubuela mu site yabu anyi kutangila filme yabu kudi ne njiwu. Yezu wakamba bua bantu badi bakeba kupangisha bakuabu lulamatu luabu kudi Yehowa ne: “Balekelayi. Mbalombodi bampofu. Nunku, bikala mpofu ulombola mpofu mukuabu, bonso babidi nebakuluke mu tshina.”—Matayi 15:14.
Tshia kuenza ntshinyi padi muntu utuvua bibidilangane nende ulekela buntemu? Padi muntu utuvua balamatangane nende wenza nanku, bidi mua kututatshisha bikole. Muntu au udi pamuapa nansha mua kutusuya bua tusungule bua kumulata yeye anyi bua kulamata Yehowa. Mu nsombelu wa nanku, tudi ne bua kusungula bua kushala balamate anu Yehowa kumpala kua bionso. (Matayi 10:37) Mmumue ne: tudi tushala tutumikila tuetu dîyi dia Yehowa dia kubenga kulamakana ne muntu wa nanku.—Balayi 1 Kolinto 5:11.
2. Lulamatu luetu kudi Yehowa ludi lumuenekela mu bitudi tusungula bua kuenza mushindu kayi?
Dinanga ditudi nadi kudi Yehowa didi ditusaka bua kuepuka bualu buonso budi mua kutubuejakaja ne ntendelelu ya dishima. Nansha malu a midimu anyi a malongolodi kampanda atudi babuele, peshi bintu bikuabu kayi bionso bitudi tuenza, kabiena ne ne bua kuikala bilamakane ne ntendelelu wa dishima to. Yehowa udi utudimuija bua “Babilona Munene” ne: “Bantu banyi, patukayi munkatshi muende.”—Buakabuluibua 18:2, 4.
BUELA MU BUONDOKE
Tumanye tshia kuenza bua kubenga kulekela muntu nansha umue utekesha lulamatu luebe kudi Yehowa. Netumone kabidi muudi mua kupatuka mu Babilona Munene bua kuleja lulamatu kudi Nzambi.
3. Dimukila balongeshi ba dishima
Tshia kuenza ntshinyi tuetu bumvue babipisha bulongolodi bua Yehowa? Balayi Nsumuinu 14:15, pashishe nuandamune lukonko elu:
-
Bua tshinyi katuena ne bua kuitaba anu malu onso atudi tumvua?
Balayi 2 Yone 10, pashishe nuandamune nkonko eyi:
-
Tudi ne bua kuenzela batontolodi malu mushindu kayi?
-
Nansha mutudi katuyi tuyukila ne batontolodi buludiludi, mmunyi mutudi bafuane kupetangana ne malongesha abu?
-
Buebe wewe, tuetu tuteleja malu mabi adibu bamba Yehowa ne bulongolodi buende, Yehowa udi mua kumvua bishi?
4. Leja lulamatu padi muena Kristo nebe wenza mpekatu
Tuetu bumvue ne: muena Kristo netu mmuenze mpekatu mutambe bubi, ndibanza kayi ditudi nadi? Tangila dîyi dinene dia mu mikenji ivua Nzambi muelele bena Isalele ba kale. Balayi Lewitiki 5:1.
Anu mudi mvese eu muleje, tuetu bumvue ne: muena Kristo netu mmuenze mpekatu mutambe bubi, tudi ne bua kuambila bakulu tshitudi bamanye. Kadi kumpala kua kubambila, bua kuleja wetu udi muenze mpekatu au muoyo mulenga, mbimpe tuanji tumulombe bua yeye nkayende aye kutondela bakulu mpekatu wende. Yeye kayi muye, dîba adi lulamatu luetu kudi Yehowa nelutusake bua kuambila bakulu tshitudi bamanye. Bua tshinyi kuenza nanku kudi kuleja mutudi ne dinanga dia lulamatu kudi . . .
-
Yehowa Nzambi?
-
muntu udi muenze mpekatu?
-
bakuabu badi mu tshisumbu?
Muena Kristo netu yeye ne lutatu, muambuluisha!
5. Shala mutapuluke ne Babilona Munene
Balayi Luka 4:8 ne Buakabuluibua 18:4, 5, pashishe nuandamune nkonko eyi:
-
Batshidi bambala mu tshitendelelu kampanda tshia dishima bu muena kuitabaja wabu anyi?
-
Ndiku mu malu a bulongolodi budi bulamakane ne tshitendelelu tshikuabu anyi?
-
Mudimu wanyi udi utantshishaku malu a tshitendelelu tshia dishima mu mushindu kampanda anyi?
-
Kutshidiku malu makuabu andi ne bua kuenza bua kukosa malanda ne tshitendelelu tshia dishima anyi?
-
Bingikala muandamune lumue lua ku nkonko eyi ne: eyowa, mu mmalu kayi mundi ne bua kushintuluka?
Dienzeja mu mishindu yonso bua kusungula malu akushiya ne kondo ka muoyo kimpe adi aleja muudi ne lulamatu kudi Yehowa.
Ntshinyi tshiwenza bobu bakulomba makuta a ka pa luse kudi bena tshitendelelu kampanda bua baye kuambuluishangana nawu?
BAMUE BATU BAMBA NE: “Ndi musue kumanya bidi batontolodi bamba Bantemu ba Yehowa bua mmanye mua kubingisha bulelela.”
-
Kuenza nanku nkuikala ne meji anyi? Bua tshinyi?
TSHIA KUKUATA
Bua kushala ne lulamatu kudi Yehowa, tudi ne bua kubenga kulamakana ne bantu badi kabayi ne lulamatu kudiye. Tudi kabidi ne bua kuenza bua kuditapuluilamu ne ntendelelu wa dishima.
Diambulula
-
Bua tshinyi katuena ne bua kutangila filme ya batontolodi, kuteleja ngenyi yabu, anyi kuyibala?
-
Tudi ne bua kuenzela bantu badi balekele buntemu malu mushindu kayi?
-
Mmunyi mutudi mua kutumikila didimuija dia kupatuka mu tshitendelelu tshia dishima?
BIA KUTANGILA KABIDI
Manya tshia kuenza padi bantu banyangila Bantemu ba Yehowa lumu ne malu a dishima.
“Udi mumanye malu mudiwu anyi?” (Tshibumba tshia Nsentedi, 8/2018)
Mmunyi muudi mua kumanya malongolodi anyi midimu idi itantshisha malu a Babilona Munene?
Ntshinyi tshikadi baluishi betu bakuabu batete kuenza bua kutekesha ditabuja dietu?
Bala tshitupa tshia “Mvua anu ngenda nkeba Nzambi katshia ku buana buanyi,” umone muvua muakuidi wa mu tshitendelelu tshia Shinto mukose malanda ne ntendelelu wa dishima.
“Bible utu ushintulula bantu” (Tshibumba tshia Nsentedi, 1/7/2011)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
