CHILONGESA 58
Twalaho Kupwa Wakushishika Kuli Yehova
Vaka-Kulishitu vamuchano kavasaka kala chuma chipwe mutu avahonese kulemesa Yehovako. Twafwelela ngwetu omu mukiko weji kwivwanga nayove. Yehova amona kushishika chove kupwa chachilemu. (Tanga Mijimbu 1, 28:9.) Vyuma muka vinahase kukulingisa chikukaluhwile kupwa wakushishika kuli ikiye, kaha vyuma muka navikukafwa?
1. Uno vakwetu vanahase kutulingisa ngachilihi chitukaluhwile kupwa vakushishika kuli Yehova?
Vatu vamwe vanahase kutulingisa twechenga kuzachila Yehova. Uno veya vanahase kulinga chuma kana? Vatu vamwe vaze vaseza muchano, veji kuhanjikanga vyuma vyavipi haliuka lyaKalunga mangana vazeyese lufwelelo lwetu. Vatu kana vavavuluka ngwavo vaka-kulikanga kuli Kalunga. Kaha nawa vatwamina vamwe vamukwitava veji kutuvangijikilanga vyuma vyamakuli mangana valingise vaze kavazamineko vaseze muchano. Shikaho nachipwa chaponde kulipula jipami navaka-kutufumbukila, chipwe kutanga mikanda yavo, chipwe kuya hajikeyala javo jahaInternet chipwe kutala jivindiyo javo. Yesu ahanjikile hali vaze veji kusakanga kuhonesa vakwavo kuzachila Yehova nakashishi ngwenyi: “Vechenu. Vanapu vatwamina vatupuputa. Kachi nge kapuputa mwatwaminyina mukwavo kapuputa, kaha vosena vavali navaholokela muwina.”—Mateu 15:14.
Uno naulinga ngachilihi nge mutu uze watachikiza keshi nakusaka kupwa cheka Chinjiho chaYehovako? Tunahase kwivwa kukola kumuchima nge mutu twazanga mwalinga chuma kana. Mutu kana nahase kutushinjila tusakuleho kuzanga ikiye chipwe kuzachila Yehova. Twatela kulikasa mumuchima wetu ngwetu natutwalaho kupwa vakushishika kuli Yehova kaha. (Mateu 10:37) Shikaho tweji kukavangizanga lushimbi lwaYehova lwakutukanyisa kulikata namutu kana.—Tanga Wavaka-Kolinde 1, 5:11.
2. Uno vyuma natusakula navisolola ngachilihi nge twapwa vakushishika kuli Yehova?
Kuzanga Yehova chikiko nachitulingisa tulihende kukwazana mukala chuma chize chakundwiza kwitava chamakuli. Katwatela kwingila milimo yize yakundwiza kwitava chamakuli, chipwe kulisonekesa muliuka lize lyakundwiza kwitava chamakuli, chipwe kulinga kala chuma chize chapandama kukwitava chamakuliko. Yehova atuhuhumuna ngwenyi: “Enu vatu jami, fumenu [muMbavilone Yayinene].”—Kusoloka 18:2, 4.
LINANGULE VYAKUJIMINYINA
Wana vyuma navikukafwa ufungulule mutu uze mwasaka kukuhonesa kupwa wakushishika chikuma kuli Yehova. Wana nawa omwo unahase kusolola kushishika chove hakufuma muMbavilone Yayinene.
3. Zangama navaka-kunangula vamakuli
Uno natulinga ngachilihi nge tunevu vatu vali nakuhanjika vyuma vyavipi haliuka lyaYehova? Tangenu Vishimo 14:15, nakushimutwila hachihula chino:
-
Mwomwo ika katwatela kwitavila vyuma vyosena natwivwako?
Tangenu WaYowano 2, 10, nakushimutwila havihula vino:
-
Uno vaka-kulikanga kuli Kalunga twatela kuvamona ngachilihi?
-
Numba tuhu katweshi kulikata navaka-kulikanga kuli Kalungako, oloze vyuma vanangula vyeji kuwanyiwanga kulihi?
-
Washinganyeka ngwove Yehova mwevwa ngachilihi nge natwivwililanga kuvyuma vyavipi veji kuhanjikanga hali ikiye nahaliuka lyenyi?
4. Twalaho lika kupwa wakushishika kuli Kalunga nge ndumbwove nalingi shili
Chuma muka twatela kulinga nge tunatachikiza ngwetu ndumbwetu muchikungulwilo nalingi shili yayinene? Ivwa lundongi lwatwama mujishimbi jize Kalunga ahanyine vaIsalele vakushikulu. Tangenu VyavaLevi 5:1.
Ngana muze yinahanjika eyi vesi, nge tunatachikiza ngwetu ndumbwetu nalingi shili yayinene, kaha twatela kulweza vakulwane. Oloze shimbu kanda tulinge ngocho, nachiwaha kumulweza ayenga nakulyambulula ivene kuli vakulwane. Nge keshi kuya nakulyambululako, kaha twatela kusolola kushishika chetu kuli Yehova hakuya nakulweza vakulwane. Uno kulinga chuma kana nachisolola ngachilihi nge twazanga . . .
-
Yehova Kalunga?
-
uze nalingi shili?
-
vandumbwetu muchikungulwilo?
Nge ndumbwove ali muukalu mukafwe
5. Fuma muMbavilone Yayinene
Tangenu Luka 4:8 naKusoloka 18:4, 5, nakukumbulula vihula vino:
-
Uno lijina lyami lichili kuliuka lyakwitava chamakuli kuze ngwapwilenga tahi?
-
Kutala ngwalisonekesa kuliuka lize lyazachila hamwe nakwitava cheka tahi?
-
Kutala milimo ngwazata yeji kukundwizanga kwitava chamakuli mujijila jimwe tahi?
-
Kutala kuliko vyuma vyeka ngwatela kwecha kulinga mukuyoya chami mangana ngusolole ngwami nguneche chikupu kukundwiza kwitava chamakuli tahi?
-
Nge ngunakumbulula vihula kana ngwami eyo, kaha vyuma muka ngwatela kwalumunako?
Sakulanga vyuma vize navikulingisa upwenga nachivezu chitoma nakusolola nawa ngwove wapwa uwakushishika kuli Yehova.
Naulinga ngachilihi nge vanakulombo wana kuliuka lyakwitava?
VATU VAMWE NGWAVO: “Ngwatela kutachikiza vyuma vize vali nakuhanjika vaka-kulikanga kuli Kalunga hali Vinjiho jaYehova mangana nguhakwile muchano.”
-
Uno vishinganyeka kana vyakwoloka tahi? Mwomwo ika?
CHISHINA UNALINANGULA
Hakusaka tutwaleho lika kupwa vakushishika kuli Yehova, twatela kulihenda kukulikata navaze kavapwa vakushishika kuli ikiyeko. Twatela nawa kwecha kulinga vyuma vyosena vize vyapandama kukwitava chamakuli.
Kuhituluka
-
Mwomwo ika twatela kulihendela kujivindiyo, chipwe kumikanda chipwe kuvyuma veji kuhanjikanga vaka-kulikanga kuli Kalunga?
-
Uno vaze kaveshi nakusaka kupwa cheka Vinjiho jaYehovako twatela kuvamona ngachilihi?
-
Natukavangiza ngachilihi lushimbi luze lwatulweza tufume mukwitava chamakuli?
WANA VYAVIVULU
Wana vyuma watela kulinga nge vatu navahanjika vyuma vyamakuli hali Vinjiho jaYehova.
“Wanenunga Mashina naMasongo?” (Kaposhi Kakutalila, August 2018)
Uno unahase kutachikiza ngachilihi mauka chipwe milimo yize yakundwiza Mbavilone Yayinene?
Uno vyuma muka veji kulinganga vaka-kutufumbukila mangana vazeyese lufwelelo lwetu?
Muchihande chakwamba ngwavo “Ngwatondelenga Kalunga Putu Vene kuUnyike Wami,” wana mujimbu wakapilishitu wamukwitava chaShinto uze asezele kwitava chamakuli.
“Mbimbiliya Yeji Kwalumunanga Kuyoya chaVatu” (Kaposhi Kakutalila, October 1, 2011)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
