Qkyaqilx qaj tuʼn kukx qajbʼen te Jehová ex mlay txi qqʼoʼn ambʼil te jun xjal moqa te jun tiʼ tuʼn tel tiʼn ambʼil qe. Bʼalo ax jlu in kubʼ t-ximana, ex in tzalaj Jehová tuʼnju taja tuʼn kukx tajbʼena te (uʼjinktza 1 Crónicas 28:9). ¿Alkyeqe tiʼchaq jaku tzʼel qʼinte ambʼil teya tuʼn kukx tajbʼena te Dios? ¿Ex tiʼ jaku bʼant tuʼna tuʼn miʼn tkubʼ tiʼja kyuʼn?

1. ¿Alkye junjun tiʼ jaku bʼant kyuʼn txqantl tuʼn ya miʼn qajbʼen te Jehová?

Ateʼ junjun xjal kʼokel tilil kyuʼn tuʼn tkyaj qtzaqpiʼn tuʼn qajbʼen te Jehová. Jun techel, ateʼ junjun o kyaj kytzaqpiʼn axix tok ex jaʼlo in tzaj kyqʼamaʼn nya ax tok yol tiʼj ttnam Jehová tuʼntzun tchewix qʼuqbʼil qkʼuʼj. In nok qʼoʼn kybʼi xjal lu te apóstata. Ax ikx, ateʼ nejenel kye okslabʼil in xi kyqʼamaʼn nya ax tok yol qiʼj tuʼntzun ya miʼn kyxnaqʼtzan xjal tiʼj Tyol Dios qukʼil. Jaku tzaj nim nya bʼaʼn qiʼj qa ma tzʼok tilil quʼn tuʼn qyolin kyukʼil aj qʼoj kyiʼj tmajen Dios, qa ma jaw quʼjin kyuʼj, qa ma qo okx toj kypágina te Internet moqa ma tzʼok qqʼoʼn qwitz kyiʼj video in che bʼant kyuʼn. Tej tyolin Jesús kyiʼj xjal lu, tqʼama: «E kyten xjal lu; porke moẍ qe, ex ẍaqlul moẍ qe; qa ma tzʼok ten jun moẍ ẍaqlulte juntl moẍ, kykabʼil che xel tzʼaq tuj jul» (Mateo 15:​14).

¿Yajtzun qa ma tzʼel tpan tibʼ jun xjal ojtzqiʼn twitz quʼn tiʼj ttnam Jehová? Aj tbʼaj jlu, jakulo tzaj nim qbʼis ex kbʼel qximen alqe qo ajbʼel, qa te Jehová moqa te xjal. Pero tuʼnju mas kʼujlaʼn Jehová quʼn, kukx qo ajbʼel te (Mateo 10:​37). Tuʼntzunju, in xi qbʼiʼn tyol Jehová aj ttzaj tqʼamaʼn qe tuʼn miʼn tok qmojbʼan qibʼ kyukʼil xjal lu (uʼjinktza 1 Corintios 5:​11).

2. ¿Tzeʼn jaku kubʼ qyekʼin tukʼilju in kubʼ qximen qa tzʼaqli atoʼ twitz Jehová?

Tuʼnju kʼujlaʼn Jehová quʼn, nya qaj tuʼn tkubʼ qbʼinchaʼn qe tiʼchaq at toklen kyukʼil okslabʼil nya ax tok. Tuʼntzunju, nya qaj tuʼn tten jun qaqʼun, tuʼn tokx qqʼon qibʼ toj jun kʼloj xjal moqa alkyexku juntl tiʼ at toklen kyukʼil okslabʼil nya ax tok. In tzaj tqʼamaʼn Jehová jlu kye tmajen: «Kyetze tuj tnam lu», toj juntl yol, toj Nintz tnam Babilonia (Apocalipsis 18:​2, 4).

 QO JYON MAS TQANIL

3. Xqʼuqink tibʼa tiʼj nya ax tok xnaqʼtzbʼil

¿Tiʼ qmod kbʼel qyekʼin qa ma tzʼok qbʼiʼn nya ax tok tqanil tiʼj ttnam Jehová? Kyuʼjinktze Proverbios 14:​15 ex che yoline tiʼj xjel lu:

• ¿Tiquʼn nim toklen tuʼn tten qnabʼil ex tuʼn miʼn t-xi qnimen tkyaqilju in tzaj qʼamaʼn qe?

Kyuʼjinktze 2 Juan 10 ex che yoline kyiʼj xjel lu:

• ¿Tiʼ qmod kbʼel qyekʼin kyukʼil apóstata?

• Bʼalo mintiʼ in qo yolin kyukʼil apóstata, ¿pero alkyeqe nya bʼaʼn jaku tzaj qiʼj qa ma txi qbʼiʼn aju in tzaj kyqʼamaʼn?

• ¿Tiʼtzulo kbʼel tnaʼn Jehová qa ma tzʼok qqʼoʼn qwiʼ tiʼj nya ax tok tqanil in tzaj qʼamaʼn tiʼj ex tiʼj ttnam?

4. Kukx tena tzʼaqli twitz Jehová aj tkubʼ tbʼinchaʼn jun erman jun il

Qa ma tzʼok qbʼiʼn qa at jun erman ma kubʼ tbʼinchaʼn jun matij il, ¿tiʼ kbʼantel quʼn? Tuʼn tel qnikʼ tiʼj, qo xnaqʼtzan tiʼj jun ley xi tqʼoʼn Jehová kye aj Israel. Kyuʼjinktze Levítico 5:1.

Ik tzeʼn in tzaj tqʼamaʼn versículo lu, qa ma tzʼok qbʼiʼn qa at jun erman o kubʼ tbʼinchaʼn jun matij il, kxel qqʼamaʼn kye ansyan tkyaqilju ojtzqiʼn quʼn. Naʼmxtoq tbʼant jlu quʼn, tnejel qo onil tiʼj erman tukʼil kʼujlabʼil tuʼn t-xi tqʼamaʼn kye ansyan qa o kubʼ tbʼinchaʼn jun il. Pero qa mintiʼ ma bʼant tuʼn, aqoʼ qo xel qʼamante kye ansyan tuʼnju qaj tuʼn qten tzʼaqli twitz Jehová. Aj tbʼant jlu quʼn...

• ¿Tzeʼn in kubʼ qyekʼin qa kʼujlaʼn Jehová quʼn ex qa tzʼaqli atoʼ twitz?

• ¿Tzeʼn in kubʼ qyekʼin qa kʼujlaʼn erman quʼn aju otoq kubʼ tbʼinchaʼn jun il ex qa tzʼaqli atoʼ twitz?

• ¿Tzeʼn in kubʼ qyekʼin qa kʼujlaʼn qe erman quʼn ex qa tzʼaqli atoʼ kywitz?

 5. Pamil tibʼa tiʼj Nintz tnam Babilonia

 TOJ CHʼIN YOL

Qa qaj tuʼn kukx qajbʼen te Jehová, mintiʼ tuʼn tok qmojbʼan qibʼ kyukʼil qeju in nel kypan kyibʼ tiʼj. Ax ikx, il tiʼj tuʼn tel qpan qibʼ toj tkyaqil tten tiʼj okslabʼil nya ax tok.

Aju ma qo yolin tiʼj

• ¿Tiquʼn mintiʼ tuʼn tok qkeʼyin, tuʼn tjaw quʼjin ex tuʼn tok qbʼiʼn aju in tzaj kyqʼamaʼn apóstata?

• ¿Tiʼ qmod kbʼel qyekʼin kyukʼil qeju ya nya kyaj tuʼn kyok te testigo de Jehová?

• ¿Tiʼ kbʼantel quʼn tuʼn t-xi qbʼiʼn ley o tzaj tqʼamaʼn Jehová tuʼn tel qpan qibʼ kyiʼj okslabʼil nya ax tok?