Iesui mohey sēse haria taꞌatuꞌaira raꞌyn taꞌatupyꞌa pyi ȳt karāmpeꞌi taꞌatuꞌatoiat Ieuwa hamuat hap. En miꞌitā̃ hap etiꞌaira raꞌyn hanti. Ieuwa tipuenti waku kahato tomontypot epyꞌa pyi hap. (Etimowempāp o 1 Koronika 28:9.) Maꞌato kat hap koꞌi asom eiãꞌãg̃ kuap niatpo etimontypot Ieuwa yne epyꞌa pyi hamo iꞌewȳte kat hap koꞌi asom epowȳro kuap miꞌi hap koꞌi akit hamo.

1. Aikotā̃ hap koꞌi puo pyi asom iraniaꞌīn aimoꞌakag̃ꞌia kuap ȳt watimontypotꞌi poꞌog̃ Ieuwa aipyꞌa pyi hamo.

Iraniaꞌīn aimoꞌakag̃ꞌia hamo ȳt watimontypotꞌi poꞌog̃ Ieuwa hamo hap ete. Maꞌato uwe asom miꞌi hap inug̃ terān aiwȳwo. Saꞌawyꞌi te iraniaꞌīn Ieuwa montypot haria maꞌato taꞌatuꞌatoiat Ieuwa hawyi iꞌatuehay saꞌag̃ Ieuwa emītꞌīn etiat iꞌewȳte Ieuwa mohey ahepiat hap taꞌatumomã terān. Miꞌiria set apóstata e. Iꞌewȳte iraniaꞌīn religião ȳt pȳwo piatꞌi rakaria akag̃ iꞌatueso ahetiat aimoꞌakag̃ꞌia hamo watoiat pȳwuat e hap koꞌi hamo. Meig̃muewuaria wȳwo waku aimitumo ȳt aimoꞌakag̃ꞌia hamoꞌi. Ȳt nakuꞌi iꞌatuwȳwo watuꞌuka sehay wo neig̃ watimowempāp iꞌatumiwan koꞌi popera neig̃ watuwanentup iꞌatuewowi internet puo pyi. Iesui toꞌe aimoꞌakag̃ꞌia terān haria etiat — Miꞌiria ti tukupteꞌen ȳt ihapytig̃ꞌi rakaria ewy. Miꞌiria ti karāmpe ȳt ihapytig̃ rakariaꞌi toꞌoporereto iraniaꞌīn hawyi meremo hewo yne yi kaꞌa pe e. — Mateu 15:14.

Maꞌato aimikuap Ieuwa Ehay Enoi Hat tiꞌaira tuwewi ȳt Ieuwa Ehay Enoi Hatnoꞌi poꞌog̃ toig̃neꞌen hamo pote. Miꞌi pote aiꞌarōt kahato maꞌato haty poꞌog̃ ahete karāmpe aimikyꞌe miꞌi hap aira pote. Asuwe miꞌi mīt henoi kuap uhupi hamo ereto sio etiꞌaira hamo Ieuwa montypot hap e kuap. Watiꞌaira hamo watiꞌywoporo Ieuwa montypot aipyꞌa pyi hap. Miꞌi hap poꞌog̃ waku torānia kai. (Mateu 10:37) Miꞌi pote watimontypot Ieuwa woꞌonãpin ȳt eweiwesat wesat teiꞌo iꞌewȳte ȳt erenuk teiꞌo iwȳwo e hap. — Etimowempāp o 1 Kurintiu 5:11.

2. Aikotā̃ rakat aimiꞌaira hap puo pyi asom watimoherep kuap watikyꞌe sēse Ieuwa aipyꞌa pyi hap.

Watikyꞌe kahato Ieuwa hap upi ȳt wato hamoꞌi religião ȳt pȳwo piat rakaria upi neig̃ watuwanentup hamo iꞌatumienoi koꞌi kape. Miꞌi pote ȳt karāmpe hamoꞌi religião ȳt pȳwo piatꞌi rakaria upi aipotpap iꞌatupowȳro hamo. Neig̃ kat koꞌi kat koꞌi watunug̃ hamo iꞌatuꞌupi. Ieuwa ainãpin — Uhemītꞌīn e eiwenõꞌẽ ro pya kahato Papironia wato pyi e. —  Iesui Aru E Hap 18:2, 4.

 EREWANENTUP O ETIKUAP POꞌOG̃ HAMO

3. Emitumo o woꞌopotmūꞌe ȳt pȳwo piatꞌi rakaria pupi

Karāmpe iꞌatuehay saꞌag̃ Ieuwa emītꞌīn etiat hawyi iꞌatuminug̃ koꞌi etiat pote. Kat asom waku watunug̃. Eweimowempāp o Porowepiu 14:15. Miꞌi hawyi eiwoꞌoꞌehay o apoꞌe hap etiat.

• Kat pote asom waku aimitumo ȳt watimohey yneꞌi sehay koꞌi ete hamo.

Eweimowempāp o 2 Iuwãu 10, TNM. Miꞌi hawyi apoꞌe hap koꞌi ete eiwoꞌoꞌehay.

• Wentup ok Ieuwa Ehay Enoi Hat tuwepyi neꞌi totoiat Ieuwa hawyi ihay saꞌag̃ kahato hemītꞌīn etiat. Miꞌi turān kan waku watunug̃.

• Wepyi Ieuwa atoiat haria hawyi ihay saꞌag̃ hemītꞌīn etiat rakaria wȳwo ȳt ahehayꞌi. Maꞌato aikotā̃ hap koꞌi puo pyi asom aimoꞌakag̃ꞌia kuap.

• Ieuwa emītꞌīn etiat ihay saꞌag̃ nakaria mienoi koꞌi kape watuwanentup tuereto pote. Aikotā̃ hamo asom Ieuwa topyhuꞌat.

4. Etiꞌywoporo o Tupana montypot yne epyꞌa pyi hap aikotā̃ aiwyriaꞌīn tiꞌaparap poityꞌi kahato pykai

Watikuap wentup ok congregação piat miꞌaparap poityꞌi kahato hap etiat. Miꞌi pote kan waku watunug̃. Etikuap hamo kat e nimo Tupana temītꞌīn Isareu ywaniaria piat hap puo pyi hamo. Eweimowempāp o Irewitiku 5:1.

Mesūwat hag̃a hit henoi watikuap wentup ok miꞌaparap poityꞌi hap etiat pote waku wahenoi akag̃ koꞌi pe. Maꞌato miꞌi hap eꞌyj̃an mete perupꞌi popuo watipowȳro mīt henoi tomiꞌaparap poityꞌi etiat akag̃ koꞌi pe hamo. Maꞌato miꞌi hap ȳt tutunug̃ꞌi pote watikyꞌe Ieuwa hap upi wahenoi hamo akag̃ koꞌi pe imiꞌaparap poityꞌi etiat. Kat pote asom aiminug̃ hap puo pyi watimoherep

• watikyꞌe Tupana Ieuwa hap.

• watikyꞌe iꞌaparap poityꞌi rakat hap.

• watikyꞌe congregação piaria hap.

 5. Pyꞌa o ereig̃neꞌen Papironia wato kai

 WATUWEMŪꞌE RAꞌYN

Watiꞌywoporo Ieuwa montypot yne aipyꞌa pyi hamo ȳt nakuꞌi ahehay wepyi Ieuwa atoiat haria wȳwo iꞌewȳte ihay saꞌag̃ Ieuwa etiat rakaria wȳwo neig̃ watuwewyꞌinug̃ iꞌewȳte waku watuwẽtem sēse religião ȳt pȳwo piatꞌi rakat pyi.

Hotꞌokꞌe te asom

• Wepyi Ieuwa atoiat hawyi iꞌatuehay saꞌag̃ hemītꞌīn etiat rakaria. Kat pote asom ȳt nakuꞌi watuwanentup iꞌatumienoi koꞌi saꞌag̃ kape iꞌewȳte watehaꞌat iꞌatuminug̃ popera sio vídeo koꞌi kape.

• Ieuwa atoiat haria iꞌewȳte ȳt tukupteꞌen terānꞌi poꞌog̃ Ieuwa Ehay Enoi Haria wo. Miꞌi turān kan waku watunug̃.

• Uhemītꞌīn eiwenõꞌẽ ro religião ȳt pȳwo piatꞌi rakat pyi e. Aikotā̃ me asom watimontypot sēse kuap mesūwat woꞌonãpin hap.