Niˈamukë Diosmëduumbë të ja jyot wyinmäˈäny tpëjktäˈäktë ko nitii ets nipën kyatukmastuˈudäˈänëdë Jyobaa. Seguurë ko mijts nanduˈunë mwinmäˈäny të xypyëjktaˈaky, etsë Jyobaa yajtsobatypy ko duˈun xymyëdunäˈäny (käjpxë 1 Crónicas 28:9). Per ¿tijaty jotmay mbäät mdukmastuˈutyëtyë Dios? ¿Ets wiˈix mbäät xywyinguwäˈägë?

1. ¿Wiˈix mbäädë wiink jäˈäy mdukmastuˈutyëtyë Dios?

Ta näägë jäˈäy mëdiˈibë xytyukmastuˈudäˈänëmë Jyobaa. ¿Pënë yäˈädë jäˈäyëty? Nääk, yëˈë mëdiˈibë të tmastuˈuttë ja tëyˈäjtënë ets tniˈoj tniyääxëdë ja Diosë kyäjpn parë dyajxaamäˈändë ja nmëbëjkënyëˈäjtëm. Taaˈäjtp nanduˈun pënaty nyiwintsënˈäjttëbë relijyonk mëdiˈibë tëgatsy xynyigäjpx xynyimaytyakëm parë nmëjagamgakëm ja Diosë kyäjpn. Jantsy kujotmay ko mëdë duˈumbë jäˈäy tijaty nyajtsiptakëm, ko ngäjpxëmë lyiibrë, ndëjkëm mä tmëdattë pyajina o nˈijxëmë bideo mëdiˈibë yajpajttëp. Yäˈädë jäˈäyëty mëdiˈibë xytyukmastuˈudäˈänëmë Jyobaa, yëˈë mëdiˈibë Jesus myaytyak ko jyënany: “Mastuˈuttë. Wiintsëtyëˈë o kyaj yˈixtë. Waˈan twijtsˈyoˈoyëdë jatuˈugë wiints. Es pën tuˈugë wiints wyijtsˈyeˈepy ja myëwiints, nimajtsk kyunaxtët mä tuˈugë jut” (Matewʉ 15:​14).

Ets ¿ti ndunäˈänëm ko tuˈugë nmëguˈukˈäjtëm kyaj nyekyTyestiigëˈatäˈäny? Mbäät mëk njantsy jyäˈäwëm pën yëˈë tuˈugë jäˈäy mëdiˈibë mëk ntsojkëm. Ets mbäädë net tsyiptaˈaky nwinˈijxëm pën yëˈë nbuwäˈägëyäˈänëmë yäˈädë jäˈäy o pën yëˈë Jyobaa. Per tsojkëbë winmäˈäny nbëjktakëm parë yëˈë nbuwäˈkëmë Jyobaa (Matewʉ 10:​37). Pääty nmëmëdoˈowëm ko tniˈanaˈamë ets kyaj nduˈukmujkëm mëdë duˈumbë jäˈäy (käjpxë 1 Korintʉ 5:​11).

2. ¿Wiˈix mbäät nyajnigëxëˈkëm ko nmëmëdoˈowëmë Jyobaa?

Kom ntsojkëmë Jyobaa, ninuˈun ngatuktëkëyäˈänëmë relijyonk mëdiˈibë kyaj tyëyˈäjtënëty. Nitii tuunk ngakupëjkëm mëdiˈibë yajjaˈäjttëp ets ni ngatuktëjkëm nituˈugë yˈorganisasion. Jyobaa duˈun tˈanëëmë nyax kyäjpn: “Pëtsëmdë mä tadë käjpn”, jaˈa njënäˈänëm, mä Mëj Babilonia (Diˈibʉ Jatanʉp o Apocalipsis 18:​2, 4).

 AK NIJAWË NIˈIGYË

3. Naygyuentëˈatëdë këdiibë myajwinˈëënët

¿Ti mbäät nduˈunëm ko nmëdoˈowëm tëgatsy yajnimaytyäˈägëdë Diosë kyäjpn? Käjpxtë Proverbios 14:​15 ets nimaytyäˈäktë mëdiˈibë yä yajtëëpy:

• ¿Tiko kyaj yˈoyëty nmëbëjktäˈäyëm tijaty nmëdoˈowëm?

Käjpxtë 2 Fwank 10 ets nimaytyäˈäktë mëdiˈibë yä yajtëëpy:

• ¿Ti mbäät nduˈunëm ko nbatëmë jäˈäy mëdiˈibë të tmastuˈuty ja tëyˈäjtën etsë net tniˈoj tniyääxë ja Diosë kyäjpn?

• Mbäät kyaj ndimynyaybyatëm wingëjxm jëjpkëjxm mëdë duˈumbë jäˈäy, per ¿wiˈix mbäät xytyukninäjxëm extëm wyinmaytyë?

• ¿Wiˈixëdaa Jyobaa nyayjyawëyaˈanyëty ko nmëdoowˈijtëm mä axëëk yajnimaytyaˈaky o ja nyax kyäjpn?

4. Këdii Dios xymyastuˈuty ko tuˈugë nmëguˈukˈäjtëm pyokytyunët

Pën nnijäˈäwëm ko tuˈugë nmëguˈukˈäjtëm të pyokytyuny, ¿ti mbäät nduˈunëm? Okˈix ti anaˈamën yajmooytyë ja israelitëty. Käjpxtë Levítico 5:1.

Yäˈädë tekstë jyënaˈany ko pën të nnijäˈäwëm pyokytyuny tuˈugë nmëguˈukˈäjtëm, tsojkëp ndukmëtmaytyakëm ja mëjjäˈäytyëjk. Per oy ko jawyiin nˈanmäˈäyëm ets yëˈë nëjkx ttukmëtmaytyaˈaky. Pën kyaj duˈun ttuny, ta ëtsäjtëm nimaytyakëm mët ko yëˈë nbuwäˈkëmë Jyobaa. Ko duˈun nduˈunëm, ¿tiko nety nyaˈijxëm ko ntsojkëm…

• ... ets nbuwäˈkëmë Jyobaa?

• ... ja mëdiˈibë të pyokytyuny?

• ... ja nmëguˈukˈäjtëm mëdiˈibë mëët nˈëxpëjkëm?

 5. Mëjagamgaˈagë Mëj Babilonia

 TI TË NJÄJTËM

Pën nmëdunäˈänëm xëmë Jyobaa, tsojkëp nnaygyuentëˈäjtëm ets kyaj nduˈukmujkëm mëdë jäˈäy mëdiˈibë të myastuˈudëdë. Ets ninuˈun nganekytyuktëjkëmë relijyonk mëdiˈibë kyaj tyëyˈäjtënëty.

Ajamyatsë

• ¿Tiko kyaj yˈoyëty ngäjpxëm, nˈijxëm o nmëdoowˈijtëm wixaty jyënäˈändë pënaty të tmastuttë ja tëyˈäjtën ets tniˈojëdë ja Diosë kyäjpn?

• ¿Wiˈix mbäät nˈijtëm mëdë jäˈäy mëdiˈibë kyaj nyekyTyestiigëˈatäˈäny?

• ¿Ti mbäät nduˈunëm ko nyaˈˈanmäˈäyëm ets ndukpëtsëëmdutëm ja relijyonk mëdiˈibë kyaj tyëyˈäjtënëty?