LECCIÓN 58
Nɨkani ná kuiñi tu̱u̱n-yo nu̱u̱ Jeová
Nda-yo ja kuu-yo cristiano nda̱a̱ nduu jeʼe-yo tuʼun ja ni ɨn ñayí axi tiñu saʼa téñú nu̱u̱-yo tágua chiñuʼun-yo nu̱u̱ Jeová. Ka ñúʼun ka̱jí ini-sa ja suni sukua kuu ini-ní, de Jeová teya̱ʼvi tuni-Ya ja iñi tu̱u̱n-ní nu̱u̱-Ya (kaʼvi-ní 1 Crónicas 28:9, TNM). ¿Na tiñu kuu koto túni̱ nu̱u̱-ní nu̱u̱ ja iñi tu̱u̱n-ní nu̱u̱ Yandios? ¿De naguá kuu saʼa-ní tágua kuiñi tu̱u̱n-ní?
1. ¿Na̱sa kuu koto túni̱ ja iñi tu̱u̱n-yo nu̱u̱ Jeová sɨkɨ ja kaʼan ji ja saʼa sava nda ñayí?
Sava nda ñayí nduu ka kúni-ji ja chiñuʼun-yo Jeová. ¿Nde ɨn kuu saʼa sukua? Tanu kuu, sava-ji ni ka sndoo̱-ji tuʼun nda̱a̱ de mita ka kaʼan-ji tuʼun túʼu̱n sɨkɨ ñuu Yandios tágua xnaa-ji fe-yo. Nda ñayí yaʼa kananí-ji apóstata. Suni ka iyo nda ñayí ka yosonu̱ú nu̱u̱ nda veñuʼun ja ka skuite nu̱u̱-ji tuʼun túʼu̱n sɨkɨ nda-yo tágua sava ka nda ñayí ja ka kandija ñama̱ ka kuji̱ka-ji nu̱u̱ tuʼun nda̱a̱. Yika tuni kuu ja tétáʼán-yo jín nda enemigo Yandios, ja kaʼvi-yo tutu-ji axi tuʼun ja chisó-ji nu̱u̱ internet, axi ja kɨ̱vɨ-yo nu̱u̱ página internet-ji de kundeʼe-yo video-ji. De ta kaʼan-yo sɨkɨ nda ñayí ja ndukú-ji ja na sndoo̱-yo ja kuiñi tu̱u̱n-yo nu̱u̱ Jeová, Jesús ni kachi-de: “Quíʼi̱n ndá máá de̱, chi cúu ndá de̱ modo te̱e cuáá […]. Chi tú iin te̱e cuáá stéʼe̱n de̱ ichi nu̱u̱ inca̱ te̱e cuáá, de ndúu̱ de̱ nincava xeʼva̱” (Mateo 15:14).
¿De naguá kenda kuu nú ta ɨn ñayí ja jíni̱-yo nduu kúni ka-ji kuu-ji testigo Jeová? Ta ɨn ñayí ja kuu taʼan-yo saʼa-ji sukua, kuu ɨn ja víjin tuni nu̱u̱-yo. Ñayí ñukua sanaa saʼa-ji ja kani uu ini-yo: a ka̱ji-yo Jeová axi maa-ji. De nda-yo jiniñuʼun ja chuʼun ini-yo kuiñi tu̱u̱n-yo nu̱u̱ Yandios vaʼani̱ na tundoʼo kenda (Mateo 10:37). De sukua kandija-yo tuʼun ja tatuni Jeová ja ma kitaʼan-yo jín nda ñayí ñukua (kaʼvi-ní 1 Corintios 5:11).
2. ¿Na̱sa kuu koto túni̱ ja iñi tu̱u̱n-yo nu̱u̱ Jeová sɨkɨ ja ka̱ji-yo saʼa-yo?
Sɨkɨ ja kutoo-yo Jeová, ma saʼa kuiti̱-yo ɨn ja saʼa nda religión túʼu̱n. Ñukua kuu ja ni tiñu ja saʼa-yo, ni organización nu̱u̱ iyo-yo, ni nda ja ka̱ji-yo saʼa-yo ma kuu yitaʼan jín nda religión túʼu̱n. Jeová kachi-Ya tuʼun yaʼa nu̱u̱ ñuu-Ya: “Quee ndá ro ini̱ ñuu̱ ji̱ña̱”, de ñukua kuu, Babilonia la Grande (Apocalipsis 18:2, 4).
NÁ KUTUʼVA KA-YO SƗKƗ TUʼUN YAʼA
Kani xini-ní naguá kuu saʼa-ní tágua ni ɨn ñayí saʼa ja nuu ja iñi tu̱u̱n-ní nu̱u̱ Jeová. Suni, kundeʼe-ní ja nú koo ji̱ka-ní nu̱u̱ Babilonia la Grande steʼen-ní ja iñi tu̱u̱n-ní nu̱u̱-Ya.
3. Koto-ní maa-ní nu̱u̱ nda teé steʼen tuʼun túʼu̱n
¿Naguá jiniñuʼun saʼa-yo nú kenda tuʼun túʼu̱n nu̱u̱-yo ja sɨkɨ ñuu Jeová? Ka kaʼvi-ní Proverbios 14:15, TNM de ka ndatuʼun-ní sɨkɨ nda tuʼun yaʼa:
-
¿Nakú jiniñuʼun koo ndito-yo de ma kandija-yo ndɨʼɨ tuʼun ja nini-yo?
Ka kaʼvi-ní 2 Juan 10 de ka ndatuʼun-ní sɨkɨ nda tuʼun yaʼa:
-
¿Naguá jiniñuʼun saʼa-yo jín nda apóstata?
-
Sanaa nduu nakitaʼan-yo jín nda apóstata; de, vese saá, ¿na̱sa kuu stíví nu̱u̱-yo tuʼun túʼu̱n ja ka steʼen-ji?
-
Nú kunini-yo nda tuʼun túʼu̱n ja kaʼan-ji sɨkɨ Jeová ji ñuu-Ya, ¿na̱sa jani ini-ní ja kuu ini-Ya?
4. Kuiñi tu̱u̱n-ní nu̱u̱ Yandios ta ɨn ñani̱ axi ɨn kuáʼa saʼa-ji ɨn kuachi
Nú ni jini-yo ja ɨn ñayí nu̱u̱ congregación ni saʼa-ji ɨn kuachi kaʼnu, ¿na ɨn tiñu kánuu iyo nu̱u̱-yo? Skuaʼa-ní ɨn principio ja ndaniʼi-yo nu̱u̱ Ley ja ni jeʼe Yandios nu̱u̱ ñuu Israel janaʼán. Ka kaʼvi-ní Levítico 5:1, TNM.
Tanu kachi nu̱u̱ versículo yaʼa, nú ni jini-yo ja ɨn ñani̱ axi kuáʼa ni saʼa-ji ɨn kuachi kaʼnu, jiniñuʼun ja nakani-yo nu̱u̱ nda anciano ja jíni̱-yo. De ja nda̱a̱, ta nchaʼa ja nakani-yo, ɨn ja vaʼa ka ja saʼa-yo kuu ja kaʼan-yo nu̱u̱ ñayí ja ni saʼa kuachi ja ná kaʼan-ji jín nda anciano de nakani-ji kuachi ja ni saʼa-ji. De, nú nduu saʼa-ji, nusaá maa-yo, nakani-yo nu̱u̱ nda anciano, sɨkɨ ja iñi tu̱u̱n-yo nu̱u̱ Jeová. ¿Nakú ndɨʼɨ ja yaʼa kuu ja steʼen ja kutoo ji ja kuiñi tu̱u̱n-yo nu̱u̱...
-
... Jeová?
-
... ñayí ja ni saʼa-ji kuachi?
-
... ñayí ja iyo nu̱u̱ congregación?
Nú ɨn ñani̱ axi ɨn kuáʼa ni kɨ̱vɨ-ji nu̱u̱ ɨn tundoʼo, ¡chíndeé-ní nu̱u̱-ji!
5. Kuji̱ka-ní nu̱u̱ Babilonia la Grande
Ka kaʼvi-ní Lucas 4:8 ji Apocalipsis 18:4, 5, de ka ndatuʼun-ní sɨkɨ nda tuʼun jikatuʼun yaʼa:
-
¿A yoso ka sɨvɨ-sa nu̱u̱ tutu ɨn religión túʼu̱n?
-
¿A yiʼi-sa nu̱u̱ ɨn organización ja yitaʼan jín inka religión?
-
¿A chíndeé tiñu saʼa-sa nu̱u̱ sava ka religión túʼu̱n?
-
¿A jiniñuʼun ja kuji̱ka ka-sa nu̱u̱ nda religión túʼu̱n ja sɨkɨ tiñu ja saʼa-sa ji na̱sa ndee-sa?
-
Nú nu̱u̱ ɨn tuʼun jikatuʼun yaʼa kachi-sa ja “sukua kuu”, ¿naguá jiniñuʼun sa̱ma-sa saʼa-sa?
Vese sá, saʼa-ní ja koo ñaníí janduni-ní jín tiñu ja ka̱ji-ní saʼa-ní ji ja steʼen ja iñi tu̱u̱n-ní nu̱u̱ Jeová.
¿Naguá saʼa-ní nú ɨn ñayí jikan-ji nu̱u̱-ní ja chíndeé-ní ɨn organización ja yiʼi nu̱u̱ ɨn religión ja chíndeé ñayí?
JA KACHI SAVA NDA ÑAYÍ: “De, nú nduu jíni̱-sa ja ka kachi nda apóstata sɨkɨ nda testigo Jeová, ¿na̱sa kuu nama-sa tuʼun nda̱a̱?”.
-
¿A vaʼa kuu ja saʼa-yo sukua? ¿Nakú?
JA NI KUTUʼVA-YO
Nú kúni-yo kuiñi tu̱u̱n-yo nu̱u̱ Jeová, jiniñuʼun ja ma kitaʼan-yo jín nda ñayí ja nduu kandija nu̱u̱-Ya. De suni, jiniñuʼun ja kuji̱ka-yo nu̱u̱ ndɨʼɨ nda religión túʼu̱n.
Tuʼun núku̱ʼun ini
-
¿Nakú jiniñuʼun ja ma kundeʼe-yo, kaʼvi-yo axi kunini-yo ja ka kachi nda apóstata?
-
¿Naguá jiniñuʼun saʼa-yo jín nda ñayí ja nduu kúni ka kuu-ji testigo Jeová?
-
¿Naguá jiniñuʼun saʼa-yo tágua kandija-yo tuʼun tatuni nu̱u̱-yo ja ná kuji̱ka-yo nu̱u̱ nda religión túʼu̱n?
NU̱U̱ NDANIʼI KA-NÍ TUʼUN
Kaʼvi-ní tuʼun yaʼa tágua kuni-ní naguá kuu saʼa-ní ta sava ka ñayí ka skuite nu̱u̱-ji tuʼun túʼu̱n sɨkɨ nda testigo Jeová.
“¿A jíni̱-yo ndɨʼɨ tuʼun?” (La Atalaya, yo̱o̱ agosto kuiya 2018)
¿Na̱sa kuu kuni-ní nú ɨn organización axi ɨn tiñu chíndeé nu̱u̱ Babilonia la Grande?
¿Naguá ni ka saʼa sava nda enemigo Yandios sɨkɨ ja ka kúni-ji ja ná nuu fe-yo?
Nu̱u̱ tuʼun nakani sɨkɨ nda ñayí “Ni nandukú-sa Yandios nde luli-sa”, kaʼvi-ní na̱sa ɨn sutu sintoísta ni sndoo̱-de religión túʼu̱n.
“Tuʼun nda̱a̱ Yandios ni sa̱ma ini-ji” (La Atalaya, 1 yo̱o̱ julio kuiya 2011)
