Kristian rait aihwa nani ba diara kumi ra sin, apia kaka upla kumi ra sin swiras sa Jehova ra mayuni ba alki takaskbia. Man sin baku lukisma kaia sa, bara Jehova kasakkam lâka ba tara kulkisa (1 Kronikas 28:9 aisi kaikma). ¿Ani piua nani ra Gâd ra kasak kaia karna mai munaia sip sa? Bara ¿nahki pura luaia sip sma?

1. ¿Upla wala nani ba dîa daukaia sip sa, Jehova ra wan kasakka lukan lâka ra traika kaikaia dukiara?

Upla kum kum ba trai munbia, yawan Jehova ra mayuni ba swibia. ¿Ani uplika nani baku daukbia? Tânka kum baku, upla nani kum kum tânka kasak ba swi si, Jehova asla takanka mapara kunin aisi, wan kasakka lukan lâka sauhkaia want sa. Baha nani ba Jehova witniska mapara bûi uplika nani sa. Baku sin rilidian tâ bri uplika kum kum ba, kupia pihni bri nani lal blakaia dukiara, Jehova witniska nani mapara kunin aisisa. Baha mita Gâd uplika nani waihla nani wal turi aisaia, ai bukka nani ba aisi kaikaia, bara Internet ra ai pliska bri ba ra dimi kaikaia, bara ai lilkika nani kaikaia ba pât ra wan dingkaia sip sa. Baha sât uplika nani dukiara Jisas ba win: “Baha nani ba swis, witin nani ba nakras bara nakras wala nani ba tâ brisa. Bara nakras kum nakras wala tâ brisa kaka, wâlsut unta kum ra kauhbia” (Matiu 15:14).

¿Bara wan kakaira kum danh Jehova witniska kaia want apia sa taim, dîa takisa? Latwan kaiki uplika kum baku daukisa taim, yawan mapara diara karna kum kaia sip sa. Baha uplika ba wan wiaia sip sa, yawan ani ba ra want sa: Jehova, apia kaka witin ra. Sakuna, diara sut purkara Jehova ra kasak kaia ba yawan mapara diara kau tara sa (Matiu 10:37). Baha mita Jehova smalkanka baha sât uplika nani wal prawras kira kaia wi ba bîla walisa (1 Korint 5:11 aisi kaikma).

2. ¿Wan rayaka ra dîa wahbi saki ba, nahki sip sa Jehova wina laihura wan sakaia?

Jehova ra latwan kaiki ba mita, rilidian kuninkira nani wal asla takaia want apia sa. Wan warkka ra, apia kaka asla takanka kum tâ baiki ba ra, rilidian kuninkira nani wal diara kumi sin âpu kaia sa. Jehova ai uplika nani ra naha smalkanka yabisa: “Yang upliki nani, baha tawanka [Babilon Tara] ba wina bal taks” (Param Marikan 18:2, 4).

 KAU LAN TAKS

3. Smasmalkra kuninkira nani ra aihwaki bas

¿Jehova asla takanka dukiara diara saura nani walan kaka, dîa daukaia sa? Sins Lâka 14:15 aisi kaikma, bara naha dukiara aisi banhma:

• ¿Dîa muni yawan tânkira kaia sa, bara dîa wali ba sut kasak lukaia apia sa?

2 Jan 10 aisi kaikma, bara naha dukiara aisi banhma:

• ¿Jehova witniska mapara bûi uplika nani wal asla takaia sip sa ki?

• Jehova witniska mapara bûi uplika nani wal aisaras kabia sin, ¿nahki sip sa ai lukanka nani ba wan sinska ra dimaia?

• Jehova bara ai asla takanka mapara sturi saura nani aisi ba wali, wan sinska mangkbia kaka, ¿Jehova nahki ai dara walbia?

4. Kristian kum saurka kum ra kauhan kra sin, man Jehova ra kasak bas

Kangrigisan kristian kum saurka tara kum ra kauhan yawan nu takan kaka, ¿yawan dîa daukaia sa? Patitara Israel uplika nani ra Gâd lâ kum yaban ba laki kaiks, naha piua ra nahki wan smalkisa. Libait Lâka 5:1 aisi kaikma.

Naha tikska aisi ba baku, upla kum saurka tara kum ra kauhan yawan nu takan kaka, kangrigisan almukka nani ra wiaia nit sa. Sakuna baha daukras kainara, pas ba saurka ra kauhan uplika wal aisi, ai kupia bukaia sip sa kangrigisan almukka nani wal aisi ai dahra sakaia. Sakuna witin baku daukras kaka, yawan Jehova ra kasak ba mita kangrigisan almukka nani ra wiaia sa. ¿Dîa muni baku daukaia ba latwan lâka bara kasak lâka marikisa...

• ... Jehova ra?

• ... saurka ra kauhan uplika ra?

• ... kangrigisan muihni bara lakri wala nani ra?

 5. Babilon Tara wina sait ra kap

 DÎA LAN TAKRAM

Jehova ra kasak kaia want sa kaka, Jehova mapara bûi uplika nani wal asla takaia apia sa. Baku sin rilidian kuninkira nani wina sait ra kaia nit sa.

Wan kupia krawaia

• ¿Dîa muni Jehova witniska mapara bûi uplika nani dîa smalki ba kaikaia, aisi kaikaia, apia kaka walaia apia sa?

• ¿Danh Jehova witniska kaia want apia uplika nani wal asla takaia sip sa ki?

• ¿Rilidian kuninkira nani wina sait ra kaia smalkanka ba nahki alki daukaia sip sa?