Aakriste yashili oya tokola toko kaaya ethe nando osha nenge omuntu gwontumba e ya ethithe po okulongela Jehova. Otu na einekelo kutya nangoye ito ka pitika sha shi ye moshipala ekwatathano lyoye naye. Jehova okwa lenga uudhiginini woye. (Lesha 1 Ondjalulo 28:9.) Oonkalo dhini tadhi vulu oku shi ninga oshidhigu kungoye wu kale omudhiginini kuye, noshike tashi vulu oku ku kwathela wu ungaunge nadho?

1. Ongiini yalwe taya vulu okumakela uudhiginini wetu kuJehova?

Aantu yamwe otaya ka ninga oonkambadhala ye tu ethithe po okulongela Jehova. Mbela oolye taya vulu okuninga oshinima shoka oshiwinayi? Yamwe mboka ya thiga po oshili ohaya popi iifundja kombinga yehangano lye, molwaashoka oya hala okunkundipaleka eitaalo lyetu. Aantu mboka ohaya ithanwa aashunimonima. Shimwe ishewe, aawiliki yamwe yomalongelokalunga ohaya taandelitha omahokololo giifundja kombinga yetu, opo mboka taya tege uudhila taya kotha, ya ethe po okulongela Jehova. Onkee ano, osha nika oshiponga okutompathana naapataneki nenge naashunimonima, okulesha omambo gawo, okuya komapandja gawo gokointaneta nenge okutala uuvidio mboka ya ninga. Jesus okwa popi kombinga yaamboka haya kambadhala okuteya yalwe omukumo noku ya ningitha ya ethe po okulongela Jehova nuudhiginini, a ti: “Ya etheni, oyo aakwatiketi lyaaposi aakwawo. Ngele ku na omuposi ta kwata keti lyomuposi omukwawo, nena ayehe yaali otaa gwile moshilambo.” — Mateus 15:14.

Mbela otatu ka ninga po shike ngele gumwe ngoka tu shi okwa tokola kutya ina hala we okukala Onzapo yaJehova? Oshiyemateka noonkondo uuna ngoka tu na ekwatathano lyopothingo naye, a tokola okuthiga po Jehova. Omuntu a tya ngawo otashi vulika e tu nwethe mo ngele inatu kotoka, natse e tatu etha po okulongela Jehova. Komeho giinima ayihe, natu kale twa tokola toko tu kale aadhiginini kuye. (Mateus 10:37) Onkee ohatu vulika kelombwelo lyaJehova li na ko nasha nokukala ihaatu endathana naantu mboka. — Lesha 1 Aakorinto 5:11.

2. Omatokolo gopaumwene geni tashi vulika ga makele uudhiginini wetu kuJehova?

Ngele otu hole Jehova otashi ke tu inyengitha tu yande kehe shoka shi na ekwatathano nomalongelokalunga giifundja. Onkee ano, iilonga yetu nomahangano moka tu li nenge kehe shoka tatu ningi, inashi kala shi na ekwatathano nomalongelokalunga giifundja. Jehova ote tu londodha ta ti: “Zii mo [muBabilon Oshinene], one aantu yandje!” — Ehololo 18:2, 4.

 ILONGA OSHINDJI

3. Kala wa kotokela omalongo giifundja

Otu na okwiinyenga ngiini ngele otu uvu ehangano lyaJehova tali popilwa muuwinayi? Lesha Omayeletumbulo 14:15, e tamu kundathana epulo tali landula:

• Omolwashike kaatu na okwiitaala shaa shoka tatu uvu?

Lesha 2 Johannes 10, e tamu kundathana omapulo taga landula:

• Otu na okuungaunga ngiini naashunimonima?

• Ongiini tashi vulika tu kwatathane nomalongo gaashunimonima, nonando ihatu endathana nayo?

• Mbela Jehova ota ka kala e uvite ngiini, ngele ohatu pulakene kwaamboka taye mu popile muuwinayi nenge ehangano lye?

4. Kala omudhiginini kuKalunga, uuna omumwaho a yona

Ngele otu shi kutya gumwe megongalo okwa yona eyono lya kwata miiti, otu na okuninga po shike? Tala ekotampango limwe lyomOompango dhaKalunga ndyoka a li a pa Aaisraeli yonale. Lesha Levitikus 5:1.

Ngaashi twa lesha movelise ndjono, ngele otwa mono gumwe a yona eyono lya kwata miiti, otu na okutseyithila aakuluntugongalo, noku ya lombwela ashihe shoka tu shi. Ihe manga inaatu ya lombwela, oshi li nawa tu ladhipike omuyoni e ke ya lombwele ye mwene. Ngele ine shi ninga, uudhiginini wetu kuJehova otawu ke tu inyengitha tu ke ya lombwele. Onkatu ya tya ngawo otayi ka ulika ngiini kutya otu hole . . .

• Jehova Kalunga?

• omuntu ngoka a yona?

• aamwatate naamwameme megongalo?

 5. Za mo muBabilon Oshinene

 OWI ILONGO SHIKE?

Opo tu kale aadhiginini kuJehova, otu na okuyanda okweendathana naantu mboka kaaye shi aadhiginini kuye. Otu na wo okuthiga po thiluthilu omalongelokalunga giifundja.

Omapulo geendululo

• Omolwashike kaatu na okutala, okulesha nenge okupulakena kiinima yaashunimonima?

• Otu na okuungaunga ngiini naamboka inaaya hala we okukala Oonzapo dhaJehova?

• Ongiini tu na okuvulika kelondodho lyokuza mo momalongelokalunga giifundja?