Ta bɛta wakristo lengbi ti hɛ̃ngɔ lége ya zo bere ye kɔi gbanzi lo na vɔrɔngɔ Yehova ma. Ta kitɛ da ma gwɛ̃ tɛ mɔ nga la. Yehova ndo hũ mbilimbili tɛ mɔ ya adu ngbondoni. (Di 1 Ntango 28:9.) Aye mɛ lengbi ti kpãngɔ mbilimbili tɛ mɔ na ya tara nɛ? Wa ye mɛ mɔ li ti nɛngɔ ya mɔ bata mbilimbili tɛ mɔ nɛ?

1. Ngasia la ambanga azi lengbi ti kpãngɔ mbilimbili tɛ e ka tɛ Yehova na ya tara nɛ?

Azi mɛndɛ̃ lengbi ti tongɔ e ya e kɛ̃ vɔrɔngɔ Yehova. Azi mɛ ndo li ye niko la na? Adu azi mɛ ta la dɛ kaya mbilimbili ma, mɛ ndo pa nvɛ̃nɛ na ili linɔ tɛ Yehova ti nɛngɔ ya agbɛ̃ loyengɔ tɛ e. Adu azi mɛ saba tɛrɛ Nzapa (apostat). Agbia ti sambela ndo pa nvɛ̃nɛ na lo tɛ e ti nɛngɔ ya ato azi mɛ ta ala na kpengba lɛ ma ya ala zia vɔrɔngɔ Yehova. Adu siɔni tɛnɛngɔ tɛnɛ na ala, dingɔ ambɛti, lingɔ kaya sitɛ ti intɛrnɛt nga na bangɔ avideo tɛ la. Ba tɛnɛ mɛ Yezo tɛnɛ na lo tɛ azi ko la ndo gi gbɛ̃ngɔ loyengɔ tɛ e ya: “Ĩ zia la. Ala du nga ma awa ziba mɛ ndofa lege na awa ziba mɛ ndɛ̃! Ko se wa ziba afa lege na wa ziba ko, ala zu sɛ asa ya du.”​—Matie 15:14.

Ye mɛ mɔ li se zo mɛ mɔ hĩnga lo mu ekateli ti singɔ kaya bombi nɛ? Alengbi ti hɛ̃ngɔ mɔ pɛnɔ gba se du ya zo niko du kwa mɔ bere nyita mɔ ti ndasewa. Lo lengbi ti tongɔ mɔ na ngunu ya mɔ pɔna zo mɛ mɔ ye lo, ni bere Yehova. Ayɔ ya e mu ekateli ti ngbãngɔ mbilimbili ka tɛ Yehova, ɔngɔ dungɔ mbilimbili ka mbage tɛ azi mɛndɛ̃. (Matie 10:37) Ni ndo to e ya e tɔndɔ ndia tɛ Yehova mɛ gbanzi e na tingɔ kwa azi ti ngaso.​—Di 1 Kɔrinto 5:11.

2. Ngasia la ekateli mɛ e ndo mu ndo fa ya e du mbilimbili ka tɛ Yehova nɛ?

Songo tɛ e ka mbage tɛ Yehova ndo to e ya e kɛ̃ aye zu mɛ na mangbi na asambela ti nvɛ̃nɛ. Adu nzɔ̃ni ya ta ye kɔi ti sambela ti nvɛ̃nɛ adu kaya kwa mɛ e ndo li, kaya bombi mɛndɛ̃ mɛ e ka da bere kaya ye mɛndɛ̃ mɛ e ndo li ma. Yehova pa hɛ̃ e ya: “Azi tɛ mbi, ĩ lo ka popo tɛ la [Babilɔnɛ mɛ kota kɔdɔrɔ], ĩ si.”​—Suma 18:2, 4.

 GI HĨNGANGƆ LO MƐNDƐ̃

3. Du na kpengba lɛ na ndo awa hangɔ lo ti nvɛ̃nɛ

Se mɔ ma zo kɔi tɛnɛ siɔ ni na ili linɔ tɛ Yehova ye mɛ mɔ li nɛ? Di Masese 14:15, wa na pɛni hɛ̃ gbinya ti hũnda olo mɛ:

• Nda mɛ ayɔ ya e du na kpengba lɛ ti nɛngɔ ya ta e ye atɛnɛ zu mɛ e ndo ma, ma nɛ?

Di 2 Yoanɛ 10, wa na pɛni hɛ̃ gbinya ti ahũnda olo mɛ:

• E ba azi mɛ saba tɛrɛ Nzapa ngasia?

• Abɛse du ya ta e ndo tɛnɛ tɛnɛ na azi mɛ saba tɛrɛ Nzapa ma, ye mɛ lengbi ti lingɔ ya e ma tɛnɛ mɛ ala ndo ha nɛ?

• Mɔ da bɛ mɔ ya Yehova ndo ma ngasia na ngoi mɛ e ndo kpã ma e ndo siɔ tɛnɛ mɛ ndo tɛnɛ na ili lo nga na linɔ tɛ lo nɛ?

4. Ngbã mbilimbili na mbage tɛ Yehova na ngoi mɛ nyita kɔi li siɔ kpale

Ye mɛ ayɔ ya e li na ngoi mɛ e hĩnga ya nyita kɔi ti ya bombi li siɔ kpale kɔi mɛ kotani nɛ? Ba ndia kɔi ti ya Ngbangɔ mɛndó Nzapa hɛ̃ azi ti Izraɛlɛ. Di Balevi 5:1.

Na bangɔ vɛrsɛ mɛ se e hĩnga ya zo kɔi li siɔ kpale mɛ kotani ko, ayɔ ya e tɛnɛ hɛ̃ abiazi. Uzu ti nɛngɔ ya e li ngaso adu nzɔ̃ni ya e tɛnɛ hɛ̃ wa lingɔ siɔ kpale ya lo nvɛ̃ni gwe tɛnɛ hɛ̃ abiazi. Wa se ta lo tɛnɛ hɛ̃ la ma ko, ayɔ ya e kambisa hɛ̃ abiazi siɔ kpale mɛ lo li ti nɛngɔ ya e bata mbilimbili tɛ e ka mbage tɛ Yehova. Nda mɛ lingɔ ngaso ndo fa ya e fa songo na mbage tɛ . . .

• Yehova Nzapa nɛ?

• Zo mɛ li siɔ kpale nɛ?

• Ayata mɛndɛ̃ ti ya bombi nɛ?

5. Si kaya babilɔnɛ mɛ kota kɔdɔrɔ

 NA NDUNU NI

Ti nɛngɔ ya e ngbã mbilimbili ka mbage tɛ Yehova ko, ayɔ ya e kɛ̃ dungɔ na mangbi na azi mɛ kɛ̃ ngbãngɔ mbilimbili ka mbage tɛ lo, wa e fa mangbi zu na asambela ti nvɛ̃nɛ.

Bozongeli

• Nda mɛ ayɔ ya ta e ba, e di bere e ma tɛnɛ tɛ awa sabangɔ tɛrɛ Nzapa ma nɛ?

• Ndenge mɛ ngasia la e lengbi ti bangɔ na azi mɛ kɛ̃ ngbãngɔ Atɛmwɛ tɛ Yehova nɛ?

• Ngasia la wakristo lengbi ti fangɔ ya ni si kaya sambela ti nvɛ̃nɛ nɛ?