Akin melauak tikchiuaj ken Cristo yotikijtokej ika xtlaj nion xakaj kichiuas maka sa matiktlakamatikan Jehová. Kuajli tikmatstokej ika tejua tikneki ijkon tikchiuas, niman yejon melak kipatiojkaita Jehová (xkita 1 Crónicas 28:9). ¿Tlenon ueliskia kichiuas maka sa xtlakamati Jehová? ¿Niman tlenon uelis tikchiuas niman ijkon nochipa uelis tiktlakamatis?

1. ¿Tlenon ueliskiaj kichiuaskej oksekimej niman ijkon maka sa matiktlakamatikan Jehová?

Miyekej kiyejyekoskej maka sa matiktekichiuilikan Jehová. Ueliskia ijkin kichiuaskej sekimej akin yokikaujkej Jehová niman aman kijtouaj tlen xmelauak itech ikalpan toTajtsin pampa kinekij ika tejuamej noijki matijkauakan Jehová. Yejuamej noixmatij ken akin kixnamikij ikalpan toTajtsin. Noijki, sekimej akin tlayekanaj ipan religiones kijtouaj tlen xmelauak itech iteixpantijkauan Jehová niman ijkon kintlaneltokiltiskej akin xmás notlajpiyaj itech yejon tlakajkayaualistin. Melak xkuajli tla tejuamej tokamauijsokij imiuan akin kitlajtolchijchiuiliaj ikalpan toTajtsin, tla tikinamapouaj inlibros, tla tikitaj tlen kijkuilouaj ipan Internet noso tla tikimitaj invideos. Ijkuak Jesús otlajto intech akin kichiuasnekij maka sa matiktlakamatikan Jehová, yejua okijto yejuin: “Maka xkinkakikan. Yejuamej ken on ciegos yejuan kinyekanaj oksekimej ciegos. Tla sen ciego kiyekanas okse ciego, nochimej on omemej onxiniskej ne kampa uejkatlan” (Mateo 15:14).

Kemantika, sekimej akin tikimixmatij kitlapejpeniaj kikauaskej Jehová. Tla ijkon panoskia, ¿tlenon nonekiskia tikchiuaskej? Ijkuak yakaj akin melak tiktlasojtlaj ijkon kichiua, melak toyolkokouaj. Yejua kanaj hasta uelis techijlis matiktlapejpenikan tla yejua iuan touikaskej noso tiktlakamatiskej Jehová. San ika, tejuamej tiknekij nochipa tiktlakamatiskej Jehová maski san tlenon mapano (Mateo 10:​37). Jehová technauatia maka matouikakan imiuan akin xok kitekichiuiliaj, niman tejuamej tiktlakamatij tlen techijlia (xkita 1 Corintios 5:11).

2. ¿Kenijki uelis tikteititiskej ika tiknekij nochipa tiktlakamatiskej Jehová?

Tejuamej melak tiktlasojtlaj Jehová, ika yejon, xtiknekij tikchiuaskej tlen kichiuaj religiones tlen xmelajkej nion xtiknekij ompa titeuamej yeskej. Kuakon, noneki kuajli tikitaskej ika totekiyo, grupos kampa tinemij niman okseki tlemach tlen tikchiuaj maka makipaleui religiones tlen xmelajkej. Jehová kijlia ikalpan: “Xkisakan ipan on ueyikalpan”, tlen noixmati ken Ueyixtika Babilonia (Apocalipsis 18:2, 4).

 OKSEKI XKASIKAMATI

3. Maka xkinkaki akin kiteijliaj tlen xmelauak

Sekimej xkuajli tlajtouaj itech ikalpan Jehová, ¿tlenon noneki tikchiuaskej tla kemantika tijkakij tlen kiteijliaj? Xkitakan Proverbios 14:15 niman xtlajtokan itech yejuin:

• ¿Tleka noneki titlamachilisejkej yeskej niman xtikneltokaskej nochi tlen tijkakij?

Xkitakan 2 Juan 10 niman xtlajtokan itech yejuin:

• ¿Kenijki noneki tikimitaskej akin kixnamikij ikalpan toTajtsin?

• Kanaj tejuamej xtikinnotsaj akin kixnamikij ikalpan toTajtsin, san ika ¿kenijki ueliskia techijtlakos tlen kijtouaj?

• ¿Kenijki tiknemilia nomachiliskia Jehová tla kita ika melak tikinkakij akin kijtouaj tlen xmelauak itech ikalpan?

4. Xtlakamati Jehová ijkuak se tokniuj kichiua se ueyi tlajtlakojli

Tla tejuamej tikmatij ika se tokniuj okichiuj se ueyi tlajtlakojli, ¿tlenon noneki tikchiuaskej? Xkita tlenon techmachtia tlanauatijli tlen toTajtsin okinmakaka israelitas. Xkitakan Levítico 5:1.

Yejuin texto techmachtia ika tla tejuamej tikmatij ika yakaj okichiuj se ueyi tlajtlakojli, noneki tikimijliskej tlayekankej tlen tikmatij. Aman tej, melak kuajli tla kachtopa tikijliaj akin otlajtlako makimijli tlayekankej nochi tlen okichiuj. San ika, tla xijkon kichiua, nonekis tejuamej tikimijliskej tlayekankej nochi tlen okichiuj yejon tokniuj, ijkon tikteititiskej ika tiknekij nochipa tiktlakamatiskej Jehová. ¿Tleka tikijtouaj ika tla ijkin tikchiuaj tikteititiaj ika...

• ... tiktlasojtlaj Jehová?

• ... tiktlasojtlaj akin otlajtlako?

• ... tikintlasojtlaj nochimej tokniuan?

 5. Xtlalkaui Ueyixtika Babilonia

 TLEN OTIUEL

Tla tiknekij nochipa tiktlakamatiskej Jehová, xnoneki touikaskej imiuan akin xok kinekij kitlakamatiskej. Noijki, xnoneki tikchiuaskej itlaj tlen ualeua itech religiones tlen xmelajkej niman xtiknekij ompa titeuamej yeskej.

¿Kenon titlanankiliskia?

• ¿Tleka xkuajli tla tikitaj, tla tikpouaj noso tla tijkakij tlen kijtouaj akin kixnamikij ikalpan toTajtsin?

• ¿Kenijki noneki tikimitaskej akin xok kinekij iteixpantijkauan Jehová yeskej?

• ¿Tlenon uelis techpaleuis maka matikchiuakan itlaj tlen ualeua itech religiones tlen xmelajkej?