FAKAAKOAGA 58
Mahani Fakamooli Tumau ki a Iehova
Eketaha e tau Kerisiano mooli ke nakai fakaatā ha mena po ke ha tagata ke fakatauhele e tapuakiaga ha lautolu ki a Iehova. Pihia foki e logonaaga haau. Uho e mahani fakamooli haau ki a Iehova. (Totou 1 Nofoaga he Tau Patuiki 28:9.) Ko e heigoa e tau tuaga ka kamatamata e mahani fakamooli haau ki a Ia, ti fehagai fēfē a koe ki ai?
1. Kamatamata fēfē he falu e mahani fakamooli ha tautolu ki a Iehova?
Lali falu tagata ke taofi a tautolu he fekafekau ki a Iehova. Ko hai ka taofi a tautolu? Falu ne tiaki e kupu mooli ne pikopiko hagaao ke he fakatokatokaaga he Atua he lali ke moumou e tua ha tautolu. Ko lautolu ia ko e tau tagata tiaki taofiaga. Falu takitaki lotu foki ne fakaholofa e tau tala pikopiko hagaao ki a tautolu ke fakaohooho a lautolu ne nakai mataala ke tiaki e kupu mooli. Kua hagahagakelea ki a tautolu ke taufetoko mo e tau tagata totoko, totou e tau tohi po ke tau vala tala ha lautolu he initanete, onoono ke he tau faahi kupega hila, po ke kitekite e tau vitiō ha lautolu. Ko lautolu ia ne lali ke fakalolelole e falu ne fekafekau fakamooli ki a Iehova, pehē a Iesu: “Toka ai pihia a lautolu, ko e tau matapouli a lautolu ke takitaki e tau matapouli; kaeke ke takitaki he matapouli e taha matapouli, ti veveli ai a laua tokoua ke he luo.”—Mataio 15:14.
Ka e kua kaeke kua fai tagata ne iloa e tautolu kua fifili ke nakai manako ke eke mo taha he Tau Fakamoli a Iehova? Ko e mena fakamomoko lahi ka fai tagata ne tata ki a tautolu ka fifili ke taute pihia. Liga fakaohooho he tagata ia a tautolu ke fifili ki a ia po ko Iehova. Lata a tautolu ke eketaha ke fakamooli tumau ke he Atua ke he tau mena oti. (Mataio 10:37) Ti omaoma a tautolu ke he poakiaga ha Iehova ke nakai lafi mo lautolu ia.—Totou 1 Korinito 5:11.
2. Ko e heigoa e tau fifiliaga ha tautolu ni ka kamatamata e mahani fakamooli ki a Iehova?
To omoomoi he fakaalofa ki a Iehova a tautolu ke kalo kehe he putoia ke he tau mena he lotu fakavai. Ko e gahua ha tautolu po ke tau fakatokatokaaga ne ha ha i ai a tautolu po ke tau gahua ne taute e tautolu kua nakai lata ke matutaki mo e lotu fakavai. Hataki e Iehova a tautolu: “Haku motu na e, ati o kehe ā mutolu ia [Papelonia Lahi].”—Fakakiteaga 18:2, 4.
KUMIKUMI FAKAHOKULO
Fakaako ke ua fakaatā ha tagata ke fakalolelole e mahani fakamooli haau ki a Iehova. Kitia foki e puhala ke fakakite e koe e mahani fakamooli he fano kehe mai i Papelonia Lahi.
3. Mataala ke he tau faiaoga pikopiko
Fēfē e tali atu ha tautolu ka logona e tau tala pikopiko hagaao ke he fakatokatokaaga ha Iehova? Totou Tau Fakatai 14:15, ti tutala ke he hūhū nei:
-
Ko e ha kua lata a tautolu ke fakaeneene ke nakai talitonu ke he tau mena oti ne logona e tautolu?
Totou 2 Ioane 10, ti tutala ke he tau hūhū nei:
-
Fehagai fēfē a tautolu ke he tau tagata tiaki taofiaga?
-
Pete kua nakai lafi auloa a tautolu mo e tau tagata tiaki taofiaga, matutaki fēfē a tautolu ke he tau fakaakoaga ha lautolu?
-
Fēfē e logonaaga ha Iehova he manatu haau ka fanogonogo a tautolu ke he tau tala fakavai hagaao ki a Ia po ke fakatokatokaaga Haana?
4. Fakamooli tumau ke he Atua ka agahala e matakainaga
Ka iloa e tautolu kua agahala kelea lahi e taha he fakapotopotoaga, ko e heigoa ha tautolu kua lata ke taute? Manamanatu ke he matapatu fakaakoaga he Fakatufono he Atua ki Isaraela i tuai. Totou Levitika 5:1.
Poaki mai he kupu ia, ka iloa e tautolu kua taute he tagata e agahala kelea lahi, lata a tautolu ke tala age ke he tau motua e mena ne iloa e tautolu. Ato taute e mena ia, kua totonu ke tomatoma ki a ia ne taute e hehē ke fano ke he tau motua mo e tala age e agahala haana. Ka kaumahala a ia ke taute pihia, ko e mahani fakamooli ha tautolu ki a Iehova ke tala age ke he tau motua e mena ne iloa e tautolu. Fakakite fēfē he puhala ia e fakaalofa fakamooli . . .
-
ki a Iehova ko e Atua?
-
ke he tagata ne agahala?
-
ki a lautolu he fakapotopotoaga?
Ka fai lekua e matakainaga, kia lagomatai a ia!
5. Nonofo kehe mai i Papelonia Lahi
Totou Luka 4:8 mo e Fakakiteaga 18:4, 5, ti tali e tau hūhū nei:
-
Fakamau agaia kia e higoa haaku he lotu fakavai?
-
Ko au kia he fakatokatokaaga ne matutaki mo e taha lotu?
-
Lalago kia he gahua haaku e lotu fakavai?
-
Fai vala kia he moui haaku kua lata au ke vevehe kehe mai he lotu fakavai?
-
Ka tali au ē ke he tau hūhū nei, ko e heigoa e tau hikiaga kua lata au ke taute?
He tau tuaga oti, taute e fifiliaga ke moua e koe e loto manamanatu meā mo e fakakite haau a mahani fakamooli ki a Iehova.
Ko e heigoa haau ka taute he ole ki a koe ke lagomatai e matagahua fakalotu?
PEHĒ FALU TAGATA: “Lata au ke iloa e tau tala he tau tagata tiaki taofiaga hagaao ke he Tau Fakamoli a Iehova ke maeke au ke lalago e kupu mooli.”
-
Pulotu nakai e mena ia? Ko e ha ne manatu pihia a koe, po ke ko e ha ne nakai manatu pihia a koe?
MANATU KATOA
Ke fakamooli tumau ki a Iehova, lata a tautolu ke kalo kehe he lafi mo lautolu kua nakai fakamooli ki a Ia. Lata foki a tautolu ke vevehe kehe katoatoa mai he lotu fakavai.
Liu Fakamanatu
-
Ko e ha kua nakai lata a tautolu ke kitekite, totou, po ke fanogonogo ke he tau manatu he tau tagata tiaki taofiaga?
-
Fēfē e puhala kua lata a tautolu ke fehagai mo lautolu kua nakai tuai manako ke eke mo Tau Fakamoli a Iehova?
-
Muitua fēfē e tautolu e hatakiaga ke o kehe mai he lotu fakavai?
KUMI FOKI
Fakaako ke fehagai mo e falu ka fakaholofa e tau tala fakavai hagaao ke he Tau Fakamoli a Iehova.
“Hako Nakai e Tau Vala Tala Haau?” (Ko e Kolo Toko, Aokuso 2018)
Kitia fēfē e koe e tau fakatokatokaaga po ke tau gahua ne lalago a Papelonia Lahi?
Ko e heigoa kua taute he falu tagata totoko he lali ke fakalolelole e tua ha tautolu?
He tala “Kumi Au ke he Atua Tali Mai he Vahā Tote,” totou hagaao ke he akoako Shinto ne fakamamutu mai he lotu fakavai.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
