CHILAYIJO 58
Lamba Ukabimbika Kuna Jehova
MaKristo echokomende alozupila kusovumila chimwe chinu kuti chibakoneje kunamata Jehova. Tozuziba kuti nawi unowha alo. Jehova unokoshesa kubimbika kuko. (Balani 1 Ndungulujo 28:9.) Ini zungakukoneja kuti ulambe ukabimbika kuna iye akale ini zungakubhancha?
1. Bamwe bangatikoneja chini kuti tilambe tikabimbika kuna Jehova?
Bamwe banhu bangakweja kutikoneja kunamata Jehova. Ndibani bangata zunu zwakadayi? Bamwe banhu bakasiya ichokomende banonda belebeleka zokunyepa pezhulu peshangano lyaMwali kutila kuti besiye kunamata. Banoshobwa bewi bapanduki. Akale batungamilili bamachechi banonda bebuja banhu zunu zokunyepa nozwedu betila kuti basilosima pokunamata besiye ichokomende. Ndizo tisinokwelela kunyenyejana nabo, kubala mabhuku abo, kungwina pama webhusayiti abo nokuyeba mavidiyo abo pezhulu pokuti zunotikubaja. Elebeleka pezhulu paabo banonyakija banhu banonamata Jehova bekabimibika, Jesu wakati: “Balekeni. Ndibo batungamilili mapofu. Kana limwe ibhofu litungamilila limwe ibhofu, ose anowila mudizwa.”—Mateu 15:14.
Zunowini kana unhu watinoziba eshaluja kusiya kuba umwe wabaSumikiji baJehova? Yozu zunolwaja kasa kana lili gamu lyedu. Unhu yoyo uchata kuti tishaluje kuba kubhazu lilye kana kuti lyaJehova. Tokwelela kuzumisela kuda Jehova kupinda zunu zwose. (Mateu 10:37) Ndizo tikwelela kuwhilila undawu waJehova unoti tisilyijane nabanhu bakadalo.—Balani 1 BaKolinte 5:11.
2. Zwatinoshala zungakweja chini kubimbika kwedu kuna Jehova?
Kuda kwatinota Jehova kuchata kuti tisiye kuzubhatanisa nobunamati bwamanyepwa. Unshingo wedu kana zunu zwatinota azutokwelela kubhataniswa nobunamati bwamanyepwa. Jehova unotilimukisa: “Bhudani [muBhabhiloni iGulwana] banhu bangu.”—Zwakatondejelwa 18:2, 4.
FUNDA ZUNJI
Layijwa kuti ungata chini kuti ani nani esikukoneje kulamba ukabimbika kuna Jehova. Akale kuti ungatondejela chini kubimbika kuko nokubhuda muBhabhiloni Gulwana.
3. Chenjelela banolayija manyepwa
Tokwelela kutani kana tingowha umwe unhu elebeleka bubi nozweshangano lyaJehova? Balani Zwichimbe 14:15, akale kwejisani nombuzo yoyu:
-
Neni tikwelela kuchenjelela kusovuma zwose zwatinowha?
Balani 2 Johani 10, akale kwejisani nemibhuzo yeyi:
-
Tokwelela kubabhata chini bapanduki?
-
Kojoba tisinolebeleka nabo pachena, tingalyijana nabo munajipi inzila?
-
Ubweni sokuti Jehova unowha chini yopo tiwhilila unhu paanolebeleka bubi nozuzwe akale neshangano lilye?
4. Lamba ukabimbika kuna Mwali kana umwe watinonamata naye engota chibi
Kana tingoziba kuti umwe unhu womugubungano wata chibi chikulwana tokwelela kutani? Atibone chimiso chimomundawu waMwali waakapa baIsrayeli. Balani Umpilo 5:1.
Sozwalebwa muvesi yeyi, tingoziba kuti umwe unhu wata chibi chikulwana tokwelela kubuja bakulwana zwatinoziba nozwaakata. Tisanu tabuja bakulwana zubuya kuti tibuje unhu wata chibi yechi enozufija emene kubakulwana. Kana akonelwa kuta alo isu tichatondeja kubimbika kuna Jehova nokubuja bakulwana zwatinoziba nozwaakata. Kuta alo kunotondeja chini kuti toda . . .
-
Jehova Mwali?
-
unhu wata chibi?
-
bamwe mugubungano?
Kana wawunonamata naye elimubukukutu, umbhanche!
5. Bhuda muBhabhiloni iGulwana
Balani Luka 4:8 naZwakatondejelwa 18:4, 5, akale shandulani mibhuzo yeyi:
-
Izina lyangu lyichimo na mumabhuku okunamata kwamanyepwa?
-
Ndimomushangano limutungamililwa nechechi yamanyepwa na?
-
Unshingo wandinota unobhanchija bunamati bwamanyepwa na?
-
Pana zumwe zunu zwandinota mubupenyu na zwandinokwelela kusiya zunondibhatanisa nokunamata kwamanyepwa?
-
Kana pelipo pamibhuzo yeyi pandashandula kuti ichokomende, ndokwelela kutani kuti ndichinche?
Muzumo zwose ita zushalujo zunokusiya ulinehana ilochena akale utondeja kuti ulobimbika kuna Jehova.
Ungata chini ungokumbilwa imali yokubhanchija amwe machechi?
BAMWE BANOTI: “Ndokwelela kuziba zumulebwa nabapanduki pezhulu pabaSumikiji baJehova kutila kuti ndibabhisile pachena manyepwa abo.”
-
Buchenjeli na kuta alo? Neni udalo?
INI ZWAWAFUNDA
Kuti tilambe tikabimbika kuna Jehova tokwelela kusiya kukamujana nabo basijilobimbika kuna iye. Atitokwelela kuta ini zwazwo zunotibhatanisa namachechi amanyepwa.
Kubwilulula
-
Neni tisinokwelela kuyeba, kubala kana kuwhilila zunolebelekwa nabapanduki?
-
Tokwelela kubabhata chini yabo basichidi kuba baSumikiji baJehova?
-
Tingatondeja chini kuti towhilila kulimukisa kokuti tibhude mubunamati bwamanyepwa?
PAMIJA PANA ZWAWAWANA
Tokwelela kutani kana tingowha umwe unhu elebeleka bubi nozwabaSumikiji baJehova.
Tingalibona chini ishangano kana kuti mishingo inobhanchija iBhabhiloni iGulwana?
Bamwe bapanduki bangakweja kutani kuti tisiye kunamata?
Bala uwhe inyaya inoti “Ngangifisa Ukwazi UNkulunkulu Kusukela Ngimncane,” nozomwe umprisiti wechiShinto wakasiya kunamata kwamanyepwa.
“IBhayibhili Liyatshintsha Umuntu” (INqabayokulinda, July 1, 2011)
