ESOMO 58
Uyitsinge eribya mutaleghula oko Yehova
Abakristo b’ekwenene babiriyisogha kundu eritendilighira omwatsi kutse omundu wosi-wosi eritwa obwira bwabo haghuma na Yehova. Twikirirye ngoko naghu ko wabiriyisogha utya. Yehova akalangira obutaleghula bwaghu mo b’omughaso. (Soma 1 Emyatsi y’Emigulu 28:9.) Ni myatsi yahi eyangaleka eriyitsinga eribya mutaleghula oko Yehova iryakukalako, kandi niki kyo kyangakuwatikya?
1. Abandi banganasonda eritsandya obutaleghula bwetu oko Yehova bati?
Abandu balebe banganasonda eritukakirya erikolera Yehova. Abangakola omwatsi owali ng’oyo ni bahi? Abandu balebe ababirileka ekwenene bakabugha oko ndondeka ya Yehova kw’amabehi busana n’erianza eritsandya obwikirirya bwetu. Abandu abo bakahulawamo abakayisamambula oko bwikirirya. Kandi, abasondoli balebe b’ebisomo bakabugha amabehi okw’itwe bakasonda erihira omo bandu mw’eritikatikira ekwenene n’erileka erikolera Yehova. Twamabya tukahulikirira ababiriyisamambula oko bwikirirya, erikania nabo, erisoma ebitabu byabo, eriya oko syosite syabo sye Enternete n’erikwama esyovideo syabo, itukayihira omo bwiko. Busana n’abandu abanza eribuna abandi b’omutima baleke erikolera Yehova butaleghula, Yesu mwabugha ati: “Mulekebo, ni basondoli ndimatime b’abandu ndimatime. Omundu ndimatime, amasondola ogundi mundu ndimatime, ababiri bosi basyatogera omo buhya.”—Matayo 15:14.
Byangabya biti omughulu omundu oyo twanzire amayisogha eritendisyabya mughuma w’oko Bimiri ba Yehova? Kyangaluma oko mutima omughulu omundu oyo tubeghereko kutsibu amakola omwatsi owali ng’oyo. Omundu oyo anganatuhatikana ati tusombole oyo twanzire omo kati-kati kiwe na Yehova. Litolere itwayisogha kundu eriyitsinga eribya bataleghula oko Mungu kulenga obuli mundu wosi-wosi. (Matayo 10:37) Omwikola tutya, tukasikaya omughambo wa Yehova ow’akabugha ati isitwatamba n’abandu abali ngabo.—Soma 1 Abanya Korinto 5:11.
2. Eriyisogha lyetu likakanganaya liti ngoko tuli bataleghula oko Yehova kutse iyehe?
Olwanzo lwetu oko Yehova lukatukuna eritendikola omwatsi wosi-wosi owahambene n’ebisomo by’amabehi. Omubírí wetu kutse ebitunga ebyo tulimo kutse ekyosi-kyosi ekyo twangakola sibitolere bikabya ibinahambene n’ebisomo by’amabehi. Yehova akatukunga ati: “Abandu baghe, mulwe mugho [Babeli Mukulu].”—Eribisulirwa 18:2, 4.
WIGHE BINGYI
Wighe ngoko wangatoka eritendilighira omundu wosi-wosi eryolobya obutaleghula bwaghu b’oko Yehova. Kandi wighe ngoko wangakangania obutaleghula bwaghu omwikolesya erihano erikatusaba erilua omo Babeli Mukulu.
3. Uyiteghaye oko bakangirirya b’amabehi
Wangakolaki omughulu wamowa bakabugha oko ndondeka ya Yehova kw’amabehi? Musome Emisyo 14:15, neryo musubiraye oko ribulyo rino:
-
Busanaki tukayiteghaya eritendikirirya obuli mwatsi owo tukowa?
Musome 2 Yoane 10, neryo musubiraye oko mabulyo ano:
-
Tutolere itwalangira tuti abandu abakayisamambula oko bwikirirya?
-
Nomo twangabya isitulikanaya n’abandu abakayisamambula oko bwikirirya, twanganakwama amakangirirya wabo w’omo nzira syahi?
-
Ukalengekanaya uti Yehova anganayowa ati omughulu tukahulikirira amabehi awakabughawa okwiye kutse oko ndondeka yiwe?
4. Uyitsinge eribya mutaleghula oko Mungu omughulu mughala wetu mulebe amakola erilolo
Twamabiminya ngoko omundu mulebe w’omo ndeko abirikola erilolo erikalire, ni mwatsi wahi owo tutolere itwakola? Lengekanaya oko kanuni akakasungika omo mughambo owo Mungu aha Abaisraeli ba kera. Soma Abalawi 5:1.
Ngoko kisakire omo risako eryo, twamabiminya ngoko omundu abirikola erilolo erikalire, litolere itwabwira abasyakulu emyatsi yosi eyo twasi oko rilolo eriryakolawa. Embere sy’erikola utya, ni ky’amenge eritsuka wabwira oyulyakola erilolo uti ayabisule erilolo liwe ly’oko basyakulu b’endeko. Amataluka erikola atya, obutaleghula bwetu oko Yehova butolere ibwatukuna eriyabwira abasyakulu b’endeko emyatsi eyo twasi oko rilolo eryo. Erikola tutya likakanganaya liti ngoko tuli n’olwanzo olutaleghula oko . . .
-
Yehova Mungu?
-
omundu oyulyakola erilolo?
-
abandi bandu b’omo ndeko?
Omukristo mulikyenyu amabya omo maligho, iwamuwatikya!
5. Uyilusaye omo Babeli Mukulu
Musome Luka 4:8 ne Eribisulirwa 18:4, 5, neryo musubiraye oko mabulyo ano:
-
Erina lyaghe likine oko mighanzo y’amena w’abandu abali omo kisomo ky’amabehi?
-
Nyine omo kitunga ekihambene n’ekisomo ky’amabehi?
-
Omubírí owo ngakola akanawatikaya ebisomo by’amabehi omo nzira nyilebe?
-
Hane eyindi myatsi eyo nyitolere inakola omo ngebe yaghe nyitoke eriyihighula oko bisomo by’amabehi?
-
Ekisubiryo kyaghe oko ribulyo righuma ly’oko mabulyo aya kyamabya ini inga, ni mbinduka syahi syo nyitolere inakola?
Omo mibere yosi, ukole eriyisogha erikendikuwatikya eribya n’obunya- mutima obuwene n’erikangania obutaleghula bwaghu b’oko Yehova.
Wangakolaki bamabikusaba eriteka esyofranga busana n’eriwatikya omwatsi mulebe owahambene n’ebisomo by’amabehi?
ABANDU BALEBE BAKABUGHA BATI: “Nyitolere inaminya ebyo abakayisamambula oko bwikirirya bakabugha oko Bimiri ba Yehova imo naminya ebyo nangabugha erilwira oko kwenene.”
-
Ekyo nina ky’amenge? Busanaki wamabugha utya?
MUKIGHA MYATSI YAHI?
Eriyitsinga eribya bataleghula oko Yehova, litolere itwayihighula oko bandu abate bataleghula okwiye. Kandi litolere itwayihighula olosi oko bisomo by’amabehi.
Eriyibukya
-
Busanaki situtolere erikwama, erihulikirira, kutse erisoma emyatsi eyikalua oko bandu ababiriyisamambula oko bwikirirya?
-
Tutolere itwalangira tuti abandu abamabugha bati sibakyanzire eribya Bimiri ba Yehova?
-
Twangakangania tuti ngoko tusikirye ekyalayiro ekikatusaba erilua omo kisomo ky’amabehi?
EBINDI EBY’ERIMINYA
Wighe ebyo wangakola abandu balebe bamabugha amabehi w’oko Bimiri ba Yehova.
Wangaminya wuti ebitunga kutse emibírí eyikakoleka mw’emyatsi eyihambene ne Babeli Mukulu?
Abakayisamambula oko bwikirirya babiripima erileghetsania obwikirirya bwetu bo bati?
Omo mwatsi “Nabya ingarondaya oMungu erilua omo bwana,” ulangire ngoko omupe mughuma we Shinto aleka erisangira n’ekisomo kyamabehi.
“EBiblia ikabindula esyongebe sy’abandu” (Mnara wa Mlinzi, Julai 1, 2011)
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
