MUTU 58
Pitilizhyani Kunkhala Wokhulupilika kwa Yehova
Akhristu acendi olola lini munthu aliyense olo cinthu ciliconse kuŵakangisha kutumikila Yehova. Mosakaikila, namwe mukumvwa cimozimozi. Yehova oyamikila ngako kukhulupilika kwanu. (Ŵelengani 1 Mbiri 28:9.) Ni zocitika zotyani zamene zingayese kukhulupilika kwanu kwa Yehova? Nanga n’cinji cingakuyavyeni kuti mupitilizhye kunkhala wokhulupilika?
1. Kansi ayakine angayese tyani kukhulupilika kwasu kwa Yehova?
Ŵanthu ayakine angayese kutilesha kutumikila Yehova. Ni ŵanthu otyani angayese kutilesha kutumikila Yehova? Ŵanthu ayakine amene eleka kutumikila Yehova, olaŵila vinthu vawenye vokhuza gulu yasu, na colinga cakuti afookeshe cikhulupililo casu. Aŵa ŵanthu oitiwa kuti ampatuko. Koma soti, asogoleli a vipembezo olaŵila vinthu vawenye vokhuza gulu yasu, kuti acitishe ayakine kuleka kutumikila Yehova. Tufunika lini kusushana nao ŵanthu oteti, kuŵelenga mabuku yao, kuonelela mavidyo yao, kuluta pa mawebusaiti yao olo kuŵelenga zinthu zakuika pa intaneti. Ponena za ŵanthu amene ofuna kutilekesha kutumikila Yehova mokhulupilika, Yesu ekamba kuti: “Alekeni, cifukwa ni asogoleli aliye menso. Tetyo, ngati munthu aliye menso osogolela aliye menso muyake, onse aŵili aponele m’cisengu.”—Mateyu 15:14.
Nanga tyani ngati munthu watuziŵa wasankha kusiya gulu ya Yehova? Payakine izi zingatifookeshe. Ngati zoteti zacitika, kukhulupilika kwasu kwa Yehova kungankhale pangozi, cifukwa tingafunike kusankhapo yove olo Yehova. Koma tufunika kunkhala osimikizhya kunkhala okhulupilika kwa Yehova kupambana ku munthu aliyense. (Mateyu 10:37) Tetyo, tufunika kumvwila lamulo ya Yehova yakuti tikopewa kukatizhyana na ŵanthu otetyo.—Ŵelengani 1 Akorinto 5:11.
2. Kansi zosankha zatupanga zingaoneshe tyani kuti nise okhulupilika kwa Yehova?
Kukonda kwasu Yehova kutisonkhezela kupewa ciliconse cokatizhyana na kulambila kwawenye. Tetyo, tufunika lini kuloŵa nchito, kujoina kagulu ka ŵanthu olo kucita ciliconse cokatizhyana na cipembezo cawenye. Yehova oticenjeza kuti: “Fumam’moni [mu Babulo Mkulu], mweo ŵanthu ŵangu.”—Chivumbulutso 18:2, 4.
PHUNZILANI ZINYINJI
Onani zamungacite kuti musalole aliyense kukukangishani kutumikila Yehova mokhulupilika. Ndipo onani soti mwamungaoneshele kuti nimwe okhulupilika mwa kupewa Babulo Mkulu.
3. Cenjelani na aphunzisi awenye
Kansi tufunika kucita cinji ngati tamvwa nkhani zawenye zokhuza gulu ya Yehova? Ŵelengani Miyambo 14:15, nokambilana konsho iyi:
-
Ndaŵa yanji tufunika lini kukhulupilila ciliconse catamvwa?
Ŵelengani 2 Yohane 10, nokambilana makonsho aŵa:
-
Kansi ŵanthu ampatuko tufunika kuŵaona tyani?
-
Olo kuti tucita lini zinthu mwacindunji na ampatuko, n’cinji cingacitike ngati tuŵelenga mabuku yao, kuonelela mavidyo yao olo kuluta pa mawebusaiti yao?
-
Muganiza kuti Yehova angamvwe tyani ngati tumvwishila ku nkhani zawenye zokhuza yove kapena gulu yake?
4. Pitilizhyani kunkhala wokhulupilika kwa Mulungu ngati mkwasu wacita colakwa cikulu
N’cinji catufunika kucita ngati taziŵa kuti munthu muyakine mumpingo wacita cimo ikulu? Onani mfundo yatingatolepo pa lamulo yamene Yehova epasa Aisiraeli. Ŵelengani Levitiko 5:1.
Molingana na mwayukambila lemba iyi, ngati taziŵa kuti munthu muyakine wacita cimo, tufunika kuuzhya akulu zatuziŵa. Koma tikaliyocita izo, tufunika kuuzhya ula munthu ecita colakwa kuti akaulule yeka kwa akulu. Koma ngati oŵauzhya lini akulu, kukhulupilika kwasu kwa Yehova kufunika kutilimbikisha kuyoŵauzhya. Kansi kucita izi kuonesha tyani kuti nise okhulupilika . . .
-
kwa Yehova Mulungu?
-
kuli ula munthu ecita colakwa?
-
ku ŵanthu ayakine mumpingo?
Ngati mwaziŵa kuti wokhulupilila muyanu wacita colakwa cikulu, citamponi kanthu kuti mumuyavye!
5. Pewani Babulo Mkulu
Ŵelengani Luka 4:8 na Chivumbulutso 18:4, 5. Pavuli pake, yankhani makonsho aŵa:
-
Kansi nikaluziŵika kuti nine membala wa cipembezo cawenye?
-
Kansi nili m’kagulu kamene ni kokatizhyana na cipembezo ciyakine?
-
Kansi nchito yangu yucilikiza cipembezo cawenye m’njila iliyonse?
-
Kansi pali mbali ziyakine za umoyo wangu zanufunika kucinja kuti nipewe kukatizhyana na cipembezo cawenye?
-
Ngati nayankha kuti eee pa makonsho aŵa, ni mbali zotyani zanufunika kucinja?
Mulimonse mwazingankhalile, mufunika kupanga cosankha camene cikusiyeni na cikumbumtima cituŵa noonesha kuti nimwe wokhulupilika kwa Yehova.
Kansi mungacite tyani ngati akusengani kuti mupeleke ndalama zocilikizila kagulu kokatizhyana na cipembezo cawenye?
ŴANTHU AYAKINE OKAMBA KUTI: “Nufuna kuziŵa zakulaŵila ampatuko zokhuza Mboni za Yehova kuti niteteze cendi.”
-
Muona kuti cingankhale cinthu canzelu kucita izo? Ngati muona tetyo, ndaŵa yanji? Nanga ngati muona lini tetyo, ndaŵa yanji?
MFUNDO ZACIDULE
Kuti tipitilizhye kunkhala okhulupilika kwa Yehova, tufunika kupewa kukatizhyana na ŵanthu osakhulupilika. Tufunika soti kupewa kukatizhyana na cipembezo cawenye.
Kuwelezhya mfundo zikulu-zikulu
-
Ndaŵa yanji tufunika lini kutamba, kuŵelenga olo kumvwishila zokamba za ŵanthu ampatuko?
-
Kansi tufunika kuŵaona tyani ŵanthu amene esiya gulu ya Yehova?
-
Tingaoneshe tyani kuti tumvwila cenjezo yakuti tifumemo m’cipembezo cawenye?
FUFUZANI
Onani zamungacite ngati mwamvwa kuti ŵanthu ayakine okamba zawenye zokhuza Mboni za Yehova.
“Kansi Muiziŵa Bwino Nkhani Yonse?” (Nsanja ya Mlonda, August 2018)
Kansi mungaziŵe tyani kuti gulu kapena zocitika ziyakine zucilikiza Babulo Mkulu?
Ni zinthu zotyani zakucita osusha kuti afookeshe cikhulupililo casu?
M’nkhani yakuti “Kuyambila Penenze Mwana, Nenzofunishisha Kuziŵa Mulungu,” ŵelengani za wansembe wa cipembezo ca Cishinto, wamene eleka kukatizhyana na cipembezo cawenye.
“Baibo Yucinja Umoyo wa Ŵanthu” (Nsanja ya Olonda, July 1, 2011)
