THUTO 58
Dula o Tshepagalela Jehofa
Bakriste ba nnete ga ba nyake go dumelela selo le ge e le sefe, goba motho le ge e le ofe a ba thibela go hlankela Jehofa. Re a tshepa gore le wena o ikwa bjalo. Jehofa o thaba kudu ge a go bona o tshepega. (Bala 1 Dikoronika 28:9.) Eupša ke maemo afe ao a ka dirago gore go be thata gore o dule o tshepagalela Modimo? Gona o ka thušwa ke’ng gore o dule o mo tshepagalela?
1. Batho ba bangwe ba ka dira eng gore re thatafalelwe ke go tshepagalela Jehofa?
Batho ba bangwe ba tlo leka go re thibela gore re se sa hlankela Jehofa. Ke bomang bona bao ba ka dirago selo se sebe ka tsela ye? Ke batho ba bangwe bao ba tlogetšego go hlankela Jehofa, gomme gona bjale ba botša batho maaka ka mokgatlo wa rena. Ka gobane ba nyaka gore le rena re se sa ba le tumelo go Jehofa. Batho bao ba bitšwa bahlanogi. Le gona, le baruti ba dikereke tše dingwe ba phatlalatša maaka ka rena, gore ba dire gore bao ba sa lemogego maaka ao ba tlogele go hlankela Jehofa. Go kotsi go ngangišana le batho bao, go bala dipuku tša bona, go tsena di wepesaeteng tša bona, le go bogela dibidio tša bona. Ge Jesu a be a bolela ka batho bao ba lekago go nyamiša batho ba bangwe gore ba se ke ba hlankela Jehofa, o itše: “A ba kgopišege. Ke bahlahli ba foufetšego. Ka gona, ge e ba sefofu se hlahla sefofu, di tla wela moleteng ka bobedi.”—Mateo 15:14.
O tla dira’ng ge e ba motho yo o mo tsebago a kgetha gore yena ga a sa nyaka go ba Hlatse ya Jehofa? Go kweša bohloko kudu! Kudukudu ge e ba motho yo e le wa geno goba o be o mo tlwaetše. Eupša re swanetše go dula re ikemišeditše go tshepagalela Modimo go feta motho le ge e le ofe. (Mateo 10:37) Ka gona, re tla be re ekwa taelo ya Jehofa ge e ba re sa gwerane le batho bao.—Bala 1 Bakorinthe 5:11.
2. Diphetho tšeo re di tšeago di ka bontšha bjang gore re tshepagalela Jehofa goba ga re mo tshepagalele?
Go rata Jehofa go tlo re dira gore re se ke ra tsenatsena dilong tša dikereke. Ka gona, mešomo ya rena, mekgatlo yeo re lego go yona goba dilo le ge e le dife tšeo re di dirago, ga se tša swanela go sepedišana le dikereke. Jehofa o re go rena: “Etšwang go [Babilona o Mogolo] batho ba ka.”—Kutollo 18:2, 4.
ITHUTE KA MO GO TSENELETŠEGO
Ekwa gore o ka dira eng gore o se ke wa dumelela motho le ge e le ofe a go dira gore o se sa tshepagalela Jehofa. Le gona ekwa gore o ka bontšha bjang gore o tshepagalela Jehofa ka go tšwa go Babilona o Mogolo.
3. Itlhokomele gore o se ke wa forwa ke bahlanogi le baruti
Re swanetše go dira’ng ge re ekwa batho ba bolela dilo tše mpe ka mokgatlo wa Jehofa? Balang Diema 14:15, gomme le boledišaneng ka potšišo e latelago:
-
Ke ka baka la’ng re se ra swanela go no dumela dilo ka moka tšeo re di kwago?
Balang 2 Johane 10, gomme le boledišaneng ka dipotšišo tše di latelago:
-
Re swanetše go dirišana bjang le bahlanogi?
-
Le ge re sa boledišane le bahlanogi, ke dilo dife tšeo re se ra swanelago go di dira gore re se kwe dithuto tša bona?
-
O nagana gore Jehofa o tlo ikwa bjang ge re theetša batho bao ba bolelago dilo tše mpe ka yena le mokgatlo wa gagwe?
4. Dula o tshepagalela Jehofa le ge yo mongwe ka phuthegong a ka dira sebe
Ge re ka tseba gore motho yo mongwe ka phuthegong o dirile sebe se segolo, re swanetše go dira’ng? A re kweng molao wa motheo, go molao woo Modimo a bego a o file Baisiraele. Balang Lefitiko 5:1.
Go ya ka lengwalo le, ge e ba re tseba gore motho o dirile sebe se segolo re swanetše go yo botša bagolo. Eupša pele re ka ya go bagolo, re tla be re bontšha motho yoo botho ge re ka ya go yena pele, ra mmotša gore e be yena a botšago bagolo. Ge e ba motho yoo a ka se botše bagolo, gona rena re swanetše go botša bagolo seo re se tsebago. Ge re dira bjalo, re tla be re bontšha gore re tshepagalela Jehofa. Go botša bagolo ka sebe seo motho a se dirilego go tla be go bontšha bjang gore re rata . . .
-
Jehofa Modimo?
-
motho yo a dirilego sebe?
-
le batho ba bangwe ka phuthegong?
Ge e ba Mokristegotee le wena a le mathateng, mo thuše!
5. Etšwa go Babilona o Mogolo
Balang Luka 4:8 le Kutollo 18:4, 5, gomme le boledišaneng ka dipotšišo tše di latelago:
-
Na leina la ka le sa ngwadilwe ka pukung ya kereke go bontšha gore ke sa le yo mongwe wa kereke yeo?
-
Na ke tsenetše mokgatlo wo o sepedišanago le kereke e itšego?
-
Na mošomo wa ka o thekga kereke e itšego ka mokgwa le ge e le ofe?
-
Na go na le dilo tšeo ke swanetšego go di tlogela gore ke kgaogane le dikereke?
-
Ge e ba go na le potšišo yeo ke e arabilego ka ee, gona ke swanetše go dira diphetogo dife?
Dilong ka moka tšeo o di dirago, netefatša gore diphetho tšeo o di dirago di tla dira gore o dule o na le letswalo le lebotse le go dula o tshepagalela Jehofa.
O tla dira’ng ge e ba o kgopelwa gore o ntšhe moneelo dilong tšeo di sepedišanago le dikereke?
BATHO BA BANGWE BA RE: “Ke nyaka go tseba dilo tšeo bahlanogi ba di bolelago ka Dihlatse tša Jehofa, gore ke kgone go emela Jehofa.”
-
Na o nagana gore go dira bjalo ga go na bothata? Go re’ng o re’alo?
O ITHUTILE ENG?
Ge e ba re nyaka go dula re tshepagalela Jehofa, ga se ra swanela go gwerana le batho bao ba sa mo tshepagalelego. Le gona, re swanetše go tšwa ka mo go feletšego dikerekeng.
Dipotšišo
-
Ke ka baka la’ng re se ra swanela go bogela dibidio tša bahlanogi, go bala dipuku tša bona le go theetša dilo tšeo ba di bolelago?
-
Re swanetše go dirišana bjang le batho bao ba kgethilego gore ga ba sa nyaka go ba Dihlatse tša Jehofa?
-
Re ka bontšha bjang gore re kwa taelo ya Jehofa ya gore re tšwe go Babilona o Mogolo goba dikerekeng?
ITHUTE KA MO GO OKETŠEGILEGO
Ithute gore o swanetše go dira eng ge batho ba bolela maaka ka Dihlatse tša Jehofa.
O ka tseba bjang mekgatlo goba dilo tšeo di thekgago Babilona o Mogolo?
Batho ba bangwe bao ba hloilego mokgatlo wa Jehofa, ba dirile eng go leka gore le rena re se sa ba le tumelo go Jehofa?
Bala sehlogo seo se rego, “Ke be ke Dutše ke Nyaka Modimo go Tloga Bjaneng,” gore o kwe gore moruti wa Boshinto o ile a thušwa ke eng gore a tlogele kereke.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
