EISHOMO 58
Guma Ohamiire Ahari Yehova
Abakristaayo ab’amazima bamaririire kutaikiriza ekintu kyona nari omuntu weena kubaremesa kuramya Yehova. Nituhamya ngu naiwe nikwo orikwehurira otyo. Yehova naakutwara nk’ow’omuhendo ahabw’okumuhamiraho. (Shoma 1 Obusingye 28:9.) Ni bintu ki ebirikubaasa kukuremesa kuguma ohamiire ahari Yehova, kandi noobaasa kubisingura ota?
1. Abandi nibabaasa kuturemesa bata kuguma tuhamiire ahari Yehova?
Abamwe nibateeraho kuturemesa kuheereza Yehova. Ni baahi abarikubaasa kukora ekintu nk’eki? Bamwe abaarugire omu mazima nibagamba ebishuba aha kibiina kya Ruhanga, kubaasa kutuubya okwikiriza kwaitu. Nibeetwa abeehagwire aha mazima. Kandi, abeebembezi b’ediini abamwe nibatugambaho ebishuba kureetera abatahami kuruga omu mazima. N’eky’akabi kuhaajaana n’abeehagwire aha mazima, kushoma ebitabo byabo nari obutumwa bwabo, nari kuza aha mikura yaabo, nari kureeba vidiyo zaabo. Yesu akagamba ahari abo abarikuteeraho kuremesa abandi kuheereza Yehova omu bwesigwa ati: ‘Mubarekye! N’abeebembezi empumi. Mumanye ngu empumi yaayebeembera endiijo, zombi nizigwa omu kiina.’—Matayo 15:14.
Kandi shi omuntu ou turikumanya yaagira ngu takyenda kuba omwe aha Bajurizi ba Yehova? Buzima eki n’ekintu ekirikuhenda omutima, yaacwamu kukora atyo. Naabaasa kukugira ngu oine kucwamu kimwe, yaaba kugyenda nawe, nari kuguma ohamiire ahari Yehova. Oine kumariirira kuguma ohamiire ahari Ruhanga, kukira ekindi kintu kyona. (Matayo 10:37) N’ahabw’ekyo nitworobera ekiragiro kya Yehova eky’okutakwatanisa n’abantu nk’abo.—Shoma 1 Abakorinso 5:11.
2. Ni by’okucwamu ki ebirikubaasa kutureetera kugumirwa kuhamira ahari Yehova?
Rukundo ei twiniire Yehova neija kutuhiga kwetantara ekintu kyona ekiine akakwate n’ediini y’ebishuba. Yaaba emirimo yaitu, nari ebigombe ebi turimu, nari ekintu kyona eki turikwejumbamu, tihaine ekishemereire kuba kiine akakwate n’ediini y’ebishuba. Yehova naaturabura ati: ‘Murugye [omuri Babulooni Orurembo Orukuru] imwe bantu bangye ’mwe.’—Okushuuruurwa 18:2, 4.
SHWIJUMA GYE
Manya oku orikubaasa kwetantara kwikiriza omuntu weena kukuremesa kuguma ohamiire ahari Yehova. Kandi reeba n’oku orikubaasa kworeka ngu ohamiire ahari Yehova orikuruga omuri Babulooni Orukuru.
3. Yegyendesereze abeegyesa b’ebishuba
Nitwija kutwaza tuta twahurira ebitahikire ebirikukwata aha kibiina kya Yehova? Shoma Enfumu 14:15, kubaasa kugarukamu ekibuuzo eki:
-
Ahabw’enki nitwegyendesereza kutaikiriza buri kimwe eki turikuhurira?
Shoma 2 Yohaana 10, kubaasa kugarukamu ebibuuzo ebi:
-
Twine kutwariza tuta abeehagwire aha mazima?
-
N’obu twakuba tutagambire butunu n’abeehagwire aha mazima, nitubaasa kushanga nkahi enyegyesa zaabo?
-
Noogira ngu Yehova naayehurira ata twahurikiza ebishuba ebi barikumugambaho n’ekibiina kye?
4. Ow’eishe-emwe yaakora ekibi, guma ohamiire ahari Yehova
Twamanya ngu haine okozire ekibi ky’amaani omu kibiina, twine bujunaanizibwa ki? Yetegyereze omusingye kuruga omu Biragiro ebi Ruhanga yaahaire Abaisraeli aba ira. Shoma Abaleevi 5:1.
Nk’oku kirikworekwa omu kyahandiikirwe eki, twamanya ngu omuntu akozire ekibi ky’amaani, twine kumanyisa abareeberezi. Kwonka tutakabagambiire, nikiba kiri ekikorwa ky’embabazi kuhiga omusiisi kugyenda akaaturira abareeberezi ekibi kye. Yaayanga kukikora, nitworeka ngu tuhamiire ahari Yehova turikugambira abareeberezi eki turikumanya. Eki nikyoreka kita rukundo etarikuhinduka ei twiniire . . .
-
Yehova Ruhanga?
-
omuntu okozire ekibi?
-
abandi omu kibiina?
Ow’eishe-emwe mugyenzi waawe yaaba aine oburemeezi, muhwere!
5. Yetantare Babulooni Orukuru
Shoma Luka 4:8 na Okushuuruurwa 18:4, 5, kubaasa kugarukamu ebibuuzo ebi:
-
Okiine akakwate koona n’ediini y’ebishuba?
-
Ori omu kigombe ekiine akakwate n’ediini endiijo?
-
Omurimo ogu orikukora haine oku gurikushagika ediini y’ebishuba?
-
Hariho emiringo endiijo yoona oku oine kwetaanisa aha diini y’ebishuba?
-
Waagarukamu ngu eego kimwe aha bibuuzo ebi, ni mpinduka ki ezi oine kukora?
Omu mbeera zoona, cwamu ebiraakureetere kuguma otarikweshinja, kandi ebirikworeka ngu ohamiire ahari Yehova.
Noobaasa kukora ki waashabwa kuhayo obuhwezi omu diini?
ABAMWE NIBAGIRA NGU: “Nyine kumanya eki abeehagwire aha mazima barikugamba aha Bajurizi ba Yehova kugira ngu njuririre amazima.”
-
Ekyo shi n’eky’obwengye? Ahabw’enki noogamba otyo?
OMU BUGUFU
Kubaasa kuguma tuhamiire ahari Yehova, twine kwetantara kukwatanisa n’abarikwanga kuguma bamuhamiireho. Twine kwetaanisiza kimwe aha diini y’ebishuba.
Okweijutsya
-
Ahabw’enki tutaine kureeba vidiyo z’abeehagwire aha mazima, kushoma ebiteekateeko byabo, nari kubihurikiza?
-
Twine kutwariza tuta abo abatakyenda kuba Abajurizi ba Yehova?
-
Twine kworobera tuta okuraburwa kuruga omu diini y’ebishuba?
JUMBURA EBINDI
Manya oku oshemereire kutwaza, abandi baagamba ebitahikire aha Bajurizi ba Yehova.
“Oine Obuhame Obuhikire?” (Omunaara gw’Omurinzi, Agusto 2018)
Noobaasa kumanya ota emirimo nari ebigombe ebirikushagika Babulooni Orukuru?
Abahakanisa abamwe nibateeraho bata kutuubya okwikiriza kwaitu?
Omu byafaayo “Nkaba Ntwire Ninsherura Ruhanga Kuruga omu Buto,” shoma aha munyamurwa w’Abashinto owaarugire omu diini y’ebishuba egyo.
“Baibuli Neehindura Emitwarize y’Abantu” (Omunaara gw’Omurinzi, Gyuraayi 1, 2011)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
