IKIMANYILO 58
Amukindilileghe Ukuya Basubiliwa kwa Yehova
Abakristu babwanaloli bikubikapo indumbula ukuti kingayangapo kimo ikya kubatolesya ukumwiputa Yehova. Kisita kukayika mo muno nanumwe mukwipilikila. Yehova ikuketa ubusubiliwa bwinu ukuya bwapamwanya fiyo. (Belenga 1 Syambukulu 28:9.) Ngimba fyakubombiwa filiku ifi fibaghile ukughela ubusubiliwa bwinu kumyake kangi findu fiki fibaghile ukubatula?
1. Ngimba abangi babaghile ukutupangisya bulebule ukuti tuleke ukuya basubiliwa kwa Yehova?
Abandu bamo babaghile ukutukanisya ukumbombela Yehova. Ngimba yo nani uyu abaghile ukubomba isi? Abangi aba balekile ubwanaloli bikuliyobela igulu lya Yehova ubutungulu panongwa yakuti bikulonda ukonanga ulwitiko lwitu. Abandu aba, bikukoleliwa ukuti bakusambukila. Kangi abalongosi bamo ba matchalichi bikwanda ukufumusya inkhani isyabutungulu isyakufwana na uswe ukuti abandu bamo babuleke ubwanaloli. Yibaghile ukuya ngozi inywamu linga tubaghile ukwanda ukuyobesania na bakusambukila, ukubelenga amabuku ghabo, ukwingila pa webusayiti yabo pamo ukuketelela amavidiyo ghabo. Pankhani ya bandu aba bikubasofania abinabo ukuti baleke ukumbombela Yehova, Yesu ayobile ukuti: “Amubaleke bababa. Namanga bo bafwamaso aba bikubalongosya abafwamaso abinabo. Linga umfwamaso ikundongosya umfwamaso unnine bosa bo babili bikubulutukila mbwina.”—Matai 15:14.
Bule linga umundu yumo uyu tummenye kanunu asalile ukuleka ukuya yumo wa Baketi ba Yehova? Sikuya syakukubaba fiyo linga um’manyani witu abombile isi. Umundu uyu abaghile ukutufimbilisya ukuti tusale ukuya nawe pampene pamo ukuya kulubafu lwa Yehova. Tukulondiwa ukwitendekesya ukuya basubiliwa kwa Kyala ukukinda kilikyosa. (Matai 10:37) Polelo tukupilikila ululaghilo lwa Yehova mwakuleka ukuya pabumanyani na bandu aba.—Belenga 1 Bakorinti 5:11.
2. Ngimba ifi tukusala fibaghile ukutupangisya bulebule ukuti tuleke ukuya basubiliwa kwa Yehova?
Ulughano lwitu kwa Yehova lukuya pakutupangisya ukuleka ukwingisiwamo mfyakubombiwa fya matchalichi. Polelo imbombo yitu, igulu litu pamo ifi tukubomba fitikulondiwa ukukolelana nu kwiputa kwa butungulu. Yehova ikutusoka ukuti: “Amusokemo mmyake [Babeloni Unkulumba], mwe bandu bangu.”—Ubusetuli 18:2, 4.
MANYILA NYINGI
Manyila muno mubaghile ukubombela linga yumo ikubapangisya ukuti muleke ukuya basubiliwa kwa Yehova. Keta kangi muno mubaghile ukunangisyila ukuti muli basubiliwa mwakusokamo mwa Babeloni Unkulumba.
3. Mukulondiwa ukuya maso na bamanyisi ababutungulu
Ngimba tukulondiwa ukubomba isyafiki linga tukupilika ifindu ifibibi ifyakufwana ni gulu lya Yehova? Belenga Isya Mbupingamu 14:15, kangi muyobesanie ilalusyo ili:
-
Nongwa yafiki tukulondiwa ukuya maso ukuti tuleke ukusubila kilikyosa iki tukupilika?
Belenga 2 Yohani 10, kangi muyobesanie amalalusyo agha:
-
Ngimba tukulondiwa ukubomba bulebule ifindu na bakusambukila?
-
Nalinga ukuti tutikwangala nabo maso na maso na bakusambukila, ngimba isi bikumanyisya sibaghile ukutusofania bulebule?
-
Ngimba mukwinong’ona ukuti Yehova abaghile ukwipilika bulebule linga tukupilikisya ifindu ifibibi ifi bikumbombela umwene ni gulu lyake?
4. Amukindilileghe ukuya basubiliwa kwa Yehova linga unkamu pamo umulumbu abombile ubutulanongwa
Linga tusyaghenie ukuti yumo nkipanga abombile ubutulanongwa ubunywamu, ngimba tukulondiwa ukubomba isyafiki? Keta ifundo iyi yili ndulaghilo lwa Kyala ulu abapele Abaisraeli. Belenga Abanyalevi 5:1.
Ukufwana ni vesi ili, linga tusyaghenie ukuti umundu yumo abombile ubutulanongwa ubunywamu, tukulondiwa ukubabula abakulumba isi tusimenye. Bo tukali ukubomba isi, tukulondiwa ukunkasya tasi umundu uyu abombile ubutulanongwa ukuti abuke ni nkhani iyi ku bakulumba. Linga atoliwe ukubomba isi, ubusubiliwa bwitu kwa Yehova bukuya pakutupangisya ukubabula abakulumba isi tusimenye. Ngimba isi sikunangisya bulebule ukuti tuli nu lughano . . .
-
kwa Yehova Kyala?
-
ku mundu uyu abombile ubutulanongwa?
-
ku bangi nkipanga?
Linga unketi umwinitu aghene nindamyo tukulondiwa ukuntula.
5. Amusokemo mwa Babeloni Unkulumba
Belenga Luka 4:8 na Ubusetuli 18:4, 5, kangi muyobesanie amalalusyo agha:
-
Ngimba ingamu yangu yilimo mu buku lya kipanga kyabutungulu?
-
Ngimba ndi mu gulu ili likukolelana nu kwiputa kwabutungulu?
-
Ngimba imbombo iyi ngubomba yikukitula ikipanga kyabutungulu munjila yiliyosa?
-
Ngimba filipo ifindu fimo pabumi bwangu ifi ngulondiwa ukufileka ukuti nepukeko ukwiputa kwabutungulu?
-
Linga namwile ukuti ena pa malalusyo ghamo mwa agha, ngimba ngulondiwa ukuchenja ifindu fiki?
Mulimosa muno siyilile, mukulondiwa ukusala ikyakubomba iki kibaghile ukubapangisya ukuya na mabyebye amanunu nu kunangisya ukuti muli basubiliwa kwa Yehova.
Ngimba mubaghile ukubomba isyafiki linga babasumile ukuti mubike ifyabupe ifi fibaghile ukutula itchalichi limo?
ABANDU BAMO BIKUYOBA UKUTI: “Ngulondiwa ukumanya isi abakusambukila bikuyoba isyakufwana na Baketi ba Yehova ukuti mfighilile ubwanaloli.”
-
Ngimba agha ghabaghile ukuya mahala? Nongwa yafiki mukuyoba bo ulu?
IFUNDO INYWAMU
Ukuti tukindilile ukuya basubiliwa kwa Yehova tukulondiwa ukuleka ukwangala na bandu aba bakaya basubiliwa kumyake. Tukulondiwa kangi ukuleka ukubomba kilikyosa iki kikukolelana nu kwiputa kwa butungulu.
Ukughomokelamo
-
Nongwa yafiki tutikulondiwa ukuketelela, ukubelenga pamo ukupilikisya inkhani sya bakusambukila?
-
Ngimba tukulondiwa ukubomba bulebule ifindu na aba babulekile ubwanaloli?
-
Ngimba tubaghile ukupilikila bulebule amasyu aghakutusoka aghakuti tusokemo nkipanga ikyabutungulu?
KETA KANGI IFINGI
Manyila muno mubaghile ukubombela linga yumo ikufumusya inkhani sya butungulu isyakufwana na Baketi ba Yehova.
Ngimba mubaghile ukumanya bulebule linga igulu limo pamo ifyakubombiwa fimo fikutula imbombo sya Babeloni Unkulumba?
Ngimba abakususya bikubomba isyafiki ukuti bapangisye ukuti ulwitiko lwitu luleke ukuya lwamaka?
Mu nkhani yakuti “Nkhapenjanga Chiuta Kwambira Waka pa Wanichi Wane,” belenga isyakufwana nu mputi wa Shinto uyu alekile ikipanga ikyabutungulu.
“Baibolo Likusintha Umoyo wa Ŵanthu” (Gongwe la Mulinda, Julayi 1, 2011)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
