Nɔhalɛ Kilisienema ɛbɔ kpɔkɛ kɛ bɛnrɛmaa awie anzɛɛ debie biala ɛnrɛhwe bɛ ɛnrɛvi Gyihova ɛzonlenlɛ nwo. Ɔda ali kɛ adwenle mɔɔ ɛlɛ la ɛne. Gyihova anye die wɔ nɔhalɛlilɛ ne anwo. (Kenga 1 Edwɛkɛsisilɛ 28:9.) Tɛnlabelɛ boni mɔ a bamaa yeahola yeayɛ se kɛ ɛbali nɔhalɛ wɔamaa ye a, na kɛzi ɛbahola wɔali nwolɛ gyima ɛ?

1. Kɛzi awie mɔ kola maa ɔyɛ se kɛ yɛbali nɔhalɛ yɛamaa Gyihova ɛ?

Bie mɔ babɔ mɔdenle kɛ bɛnrɛmaa yɛnrɛzonle Gyihova. Nwane mɔ a bayɛ debie zɛhae a? Menli mɔɔ ɛvi nɔhalɛ ne anu la bie mɔ ka Nyamenle ahyehyɛdeɛ ne anwo adalɛ edwɛkɛ ɔluakɛ bɛkulo kɛ bɛsɛkye yɛ diedi. Bɛle kpɔkyevolɛma. Eza ɛzonlenlɛ nu mgbanyima bie mɔ ka yɛ nwo adalɛ edwɛkɛ amaa bɛdabɛ mɔɔ bɛannwu bɛ nzi la avi nɔhalɛ ne anu. Esiane wɔ nu kɛ yɛ nee dwazotiama bɛazu kpolera, yɛbagenga bɛ mbuluku anzɛɛ ninyɛne gyɛne mɔɔ bɛkɛlɛ la anzɛɛ yɛbahɔ bɛ yintanɛte ɛleka ne mɔ anzɛɛ yɛbanlea vidio ngakyile mɔɔ bɛyɛ la. Gyisɛse hanle menli mɔɔ bɔ mɔdenle kɛ bɛnrɛmaa awie mɔ ɛnrɛva nɔhalɛlilɛ ɛnrɛzonle Gyihova la anwo edwɛkɛ kɛ: “Bɛgyakyi bɛ. Bɛle adekilevolɛma anyenzinliravolɛma. Na saa anyezinliravolɛ kile anyezinliravolɛ adenle a, bɛ mu nwiɔ bɛgua kuma nu.”​—Mateyu 15:14.

Na saa awie mɔɔ yɛze ye la si kpɔkɛ kɛ ɔngulo kɛ ɔyɛ Gyihova Dasevolɛ bieko ɛ? Saa awie mɔɔ bikye yɛ kpalɛ la yɛ zɔ a ɔbamaa yɛ nwo abubu yɛ. Bie a ahenle zɔhane bayɛ ye kyengye kɛ yɛkpa kɛ yɛbadie ye anzɛɛ yɛbadie Gyihova. Ɔwɔ kɛ yɛbɔ kpɔkɛ kɛ yɛbahɔ zo yɛali nɔhalɛ yɛamaa Nyamenle yɛadɛla awie gyɛne biala. (Mateyu 10:​37) Ɔti yɛtie Gyihova mɛla ne mɔɔ se yɛ nee menli zɛhae mɔ mmatu la.​—Kenga 1 Kɔlentema 5:11.

2. Kɛzi yɛ kpɔkɛzilɛ kola maa ɔyɛ se kɛ yɛbali nɔhalɛ yɛamaa Gyihova ɛ?

Ɛlɔlɛ mɔɔ yɛlɛ yɛmaa Gyihova la ka yɛ maa yɛkpo kɛ yɛbava yɛ nwo yɛawula adalɛ ɛzonlenlɛ nu. Ɔnle kɛ yɛ gyima anzɛɛ eku bie mɔɔ yɛwɔ nu anzɛɛ debie gyɛne bie mɔɔ yɛyɛ la yɛ mɔɔ adalɛ ɛzonlenlɛ bie a gyi ɔ nzi a. Gyihova ɛbɔ yɛ kɔkɔ kɛ: “Bɛvi [Babelɔn Kpole ne anu], me menli.”​—Yekile 18:​2, 4.

 SUKOA DƆƆNWO

3. Nea boɛ wɔ adalɛ kilehilevolɛma anwo

Saa yɛte Gyihova ahyehyɛdeɛ ne anwo edwɛkɛ ɛtane bie a, duzu a ɔwɔ kɛ yɛyɛ a? Kenga Mrɛlɛbulɛ 14:​15, na akee bɛzuzu kpuya ɛhye anwo:

• Duzu ati a yɛnea boɛ amaa yɛanlie edwɛkɛ biala mɔɔ yɛkɛde la yɛanli a?

Kenga 2 Dwɔn 10, na akee bɛzuzu kpuya ɛhye mɔ anwo:

• Kɛzi ɔwɔ kɛ yɛbu kpɔkyevolɛma ɛ?

• Saa yɛ nee kpɔkyevolɛma ɛndendɛ bɔbɔ a, kɛzi yɛbahola yɛadie bɛ ngilehilelɛ ne bie ɛ?

• Saa yɛtie Gyihova anzɛɛ ye ahyehyɛdeɛ ne anwo edwɛkɛ mɔɔ ɛnle kpalɛ a, ɛnea a kɛzi ɔbade nganeɛ wɔ nwo ɛ?

4. Saa adiema bie yɛ ɛtane a kɔ zo di nɔhalɛ maa Nyamenle

Saa yɛnwu kɛ awie bie mɔɔ wɔ asafo ne anu la ɛyɛ ɛtane kpole bie a, duzu ɔwɔ kɛ yɛyɛ a? Nea ngyinlazo bie mɔɔ wɔ Nyamenle Mɛla ne mɔɔ ɔvale ɔmaanle tete Yizilayɛma anu la. Kenga Lɛvitikɔso 5:1.

Kɛ mɔɔ bɛhile ye wɔ ngyɛnu ɛhye anu la, saa yɛnwu kɛ awie ɛyɛ ɛtane kpole bie a, ɔwɔ kɛ yɛka mɔɔ yɛze ye wɔ nwolɛ la yɛkile mgbanyima ne mɔ. Noko, kolaa na yɛayɛ zɔ la, ɔbayɛ kpalɛ kɛ yɛbaha yɛahile ahenle kɛ ɔhɔha ɛtane mɔɔ yeyɛ la ɔhile mgbanyima ne mɔ. Saa yeanga yeangile bɛ a, ɔwɔ kɛ nɔhalɛ mɔɔ yɛdi yɛmaa Gyihova la ka yɛ maa yɛka mɔɔ yɛze ye wɔ nwolɛ la yɛkile mgbanyima ne mɔ. Kɛzi yɛyɛ ɛhye a ɔkile kɛ yɛlɛ ɛlɔlɛ kpundii yɛmaa . . .

• Gyihova Nyamenle ɛ?

• ahenle mɔɔ ɛyɛ ɛtane ne la ɛ?

• asafo ne anu amra mɔɔ ɛha la ɛ?

 5. Twe ɛ nwo fi Babelɔn Kpole ne anwo

 EDWƐKƐ TITILI

Saa yɛbahɔ zo yɛali nɔhalɛ yɛamaa Gyihova a ɔnle kɛ yɛ nee menli mɔɔ ɛnli nɔhalɛ ɛmmaa ye la tu. Eza ɔwɔ kɛ yɛtwe yɛ nwo yɛfi adalɛ ɛzonlenlɛ nwo bɔkɔɔ.

Ndinu

• Duzu ati a ɔnle kɛ yɛnea, yɛkenga anzɛɛ yɛtie mɔɔ kpɔkyevolɛma kilehile la ɛ?

• Kɛzi ɔwɔ kɛ yɛbu menli mɔɔ ɛngulo kɛ bɛyɛ Gyihova Alasevolɛ bieko la ɛ?

• Kɛ ɔkɛyɛ na yɛali kɔkɔbɔlɛ ne mɔɔ se yɛhwe yɛ nwo yɛvi adalɛ ɛzonlenlɛ nwo la azo ɛ?